A mostra ‘Viae ad limina Sancti Iacobi’ está composta por máis de 40 debuxos, do artista Chencho Pardo Valdés, nos que se amosan cidades e vilas galegas que forman parte da rutas xacobeas. Pode visitarse no Museo das Peregrinacións e de Santiago, cos horarios e precaucións establecidas, que se poden consultar aquí.
Retomáronse os traballos arqueolóxicos da campaña de escavación 2019-2020 no Castro de Viladonga, unha campaña que está proporcionando datos moi interesantes sobre a secuencia cronolóxica do asentamento, aproximando o castro aos 1.000 anos de ocupación.
Dentro das áreas que forman parte da Dirección Xeral de Políticas Culturais, a rede de bibliotecas e os sistemas de museos e de arquivos de Galicia artellan un ecosistema fundamental para garantir o acceso da cidadanía á cultura.
Os museos da Xunta de Galicia xa poden ser visitados, despois desta longa etapa por mor da epidemia da COVID-19, na que se puido acceder aos museos tan só de xeito virtual. As propostas a través das súas webs e as redes sociais continuarán a diario, nun esforzo por seguir compartindo.
Para as visitas hai que facer uso das novas normas e condicións de acceso. A visita está regulada atendendo ás normas preventivas e de seguridade, adecuadas para protexer a saúde e evitar contaxios.
#aculturasegue #Museonacasa
A iniciativa #Museonacasa que propuxo o Museo de Belas Artes nas súas redes sociais rematou, e fixéronse públicos os traballos achegados nunha exposición virtual coincidindo coa celebración do Día Internacional dos Museos.
A exposición Luís Seoane no Museo de Belas Artes da Coruña. O legado de Maruxa Seoane, que ía rematar a comezos do mes de marzo, ampliárase ata o 10 de maio debido ao éxito de visitantes. Con motivo da crise sanitaria xerada pola COVID-19, o Museo tivo que pechar as súas portas ao público. Durante este tempo, o persoal do Museo estivo a traballar para que a exposición se puidese desfrutar virtualmente e para poder ampliar a duración da mostra. A exposición poderá visitarse de novo presencialmente ata o vindeiro mes de setembro.
#aculturasegue #MuseumWeek
A MuseumWeek celebrouse a nivel mundial na semana previa á conmemoración do Día Internacional dos Museos (18 de maio). Este ano, a organización do evento elixiu como lema Togetherness (Tod@s xunt@s), motivo que cobra especial relevancia na situación de emerxencia sanitaria que vivimos a nivel mundial. Ante a crise sanitaria vinculada ao coronavirus reforzouse o desexo de promover esta mensaxe universal, e a MuseumWeek foi un apoio para as poboacións confinadas e para quen loita contra esta enfermidade.
Cada ano, o ICOM (Consello Internacional de Museos) celebra o Día Internacional dos Museos o 18 de maio, elixindo un tema no que se lle dea visibilidade ás preocupacións da sociedade.
A Xunta de Galicia vén de pór en marcha os Foros #aculturasegue. Reflexións sobre a cultura na era posCOVID-19. Trátase dunha serie de encontros on line –en formato webinario– con especialistas procedentes de distintos campos das industrias culturais e creativas, co obxectivo de convidar á reflexión e á análise dos retos aos que se enfronta o sector no panorama actual, marcado pola emerxencia sanitaria e o seu impacto no ámbito cultural.
O conselleiro de Cultura e Turismo, Román Rodríguez, acompañado do seu equipo e membros do Igape, presentou este xoves a través dun webinar no que se inscribiron máis de 600 profesionais e axentes do sector cultural o Plan de reactivación do sectores cultural e turístico fronte aos efectos derivados da COVID-19. Un proxecto pioneiro no ámbito autonómico que foi aprobado no Consello da Xunta que se porá en marcha este mesmo mes de maio.