O museo ocupa o antigo Pazo de Quiñones de León, construído no século XVII e reformado a fins do século XIX, sendo un edificio exemplar da arquitectura señorial de Galicia. Está rodeado polos xardíns deseñados polo portugués Jacinto de Matos en 1890.
O museo nace ao carón da doazón do seu benfeitor, o pintor Manuel Torres Martínez, dunhas 77 obras ao Concello de Marín. Manuel Torres naceu en Marín en 1901. Influído principalmente por Carlos Maside, a quen lle unía unha grande amizade, traballa en xornais con viñetas e debuxos nos que se deixa ver a súa admiración polo estilo e sátira de Castelao.
Inaugurado en 1989, o museo honra a figura do sacerdote D. Ramón María Aller Ulloa, destacado astrónomo e matemático nacido en Lalín en 1878 e finado en 1966. A antiga residencia do científico, un edificio do século XIX e onde se instalou o primeiro observatorio astronómico de Galicia adaptouse coma sede do museo. Consérvase o seu propio despacho, mobles e os instrumentos que este científico utilizou no seu traballo, así como documentos, fotografías e numerosos libros da súa biblioteca persoal.
O Museo de Pontevedra é unha das institucións culturais máis recoñecidas de Galicia polo seu labor investigador e de promoción cultural, e pola relevancia e heteroxeneidade das obras que custodia: pintura, escultura, fotografía, mobiliario, cerámica, fondos arqueolóxicos, etnográficos, documentais e bibliográficos. Ademais, posúe a maior colección de obras de Castelao, figura clave da cultura e a política galegas.
A Colección Etnográfica e do Viño está situada xunto a un dos lugares mais emblemáticos do concello, ao carón das ruínas da igrexa medieval de Santa Mariña Dozo (século XV).
O centro está dedicado a explicar todos os temas relacionados co cultivo da vide e coa produción vinícola; o discurso expositivo deseña un percorrido pola historia, a arte, a cultura popular, así como por todos os aspectos vitivinícolas das distintas variedades de cepas e a elaboración do viño da Denominación de Orixe Rías Baixas.
O Museo da Industria Conserveira é un referente do patrimonio industrial de Galicia. Ten como obxectivos a conservación do patrimonio material e inmaterial relacionado coa historia da industria conserveira en Galicia, o fomento da investigación sobre a mesma e a súa divulgación.
Como centro de documentación especializado na pesca e a súa transformación, conta cun arquivo e unha biblioteca especializada no mar e a súa industria. Entre os seus fondos documentais destacan: o da Unión de Fabricantes de Conserva de Galicia e o da empresa de conservas Bernardo Alfageme, S.A.
O Museo da Casa do Patrón é un museo etnográfico con máis de 4.000 pezas recollidas por toda a xeografía galega, que supera os 2.000 m2 de exposición distribuídos en tres edificios.
Conta con trece salas de exposición organizadas por temáticas, onde se pode observar as antigas escolas, pasando polos hábitos de vida dos nosos devanceiros, oficios esquecidos, unha taberna, un forno o unha forxa tradicional, así como os apeiros que singularizan todos os oficios e actividades da labranza e a gandería nos últimos séculos, como memoria viva da nosa historia.
A Fundación Laxeiro foi constituída en Vigo en 1999 para custodiar, conservar e difundir a colección que o pintor Xosé Otero Abeledo, Laxeiro (1908-1996) doou á cidade de Vigo. Formada por sesenta e catro obras, moitas delas auténticas xoias da arte galega do século XX, a colección permanente posibilita un completo percorrido pola traxectoria profesional de Laxeiro, quen é unha das figuras máis representativas do Movemento Renovador da pintura galega.