O Museo da Industria Conserveira é un referente do patrimonio industrial de Galicia. Ten como obxectivos a conservación do patrimonio material e inmaterial relacionado coa historia da industria conserveira en Galicia, o fomento da investigación sobre a mesma e a súa divulgación.

Como centro de documentación especializado na pesca e a súa transformación, conta cun arquivo e unha biblioteca especializada no mar e a súa industria. Entre os seus fondos documentais destacan: o da Unión de Fabricantes de Conserva de Galicia e o da empresa de conservas Bernardo Alfageme, S.A.

A colección organízase en función dos fitos que marcaron os inicios e o desenvolvemento dos alimentos conservados por esterilización; os seus fitos tecnolóxicos, científicos e sociais ao redor dos procesos produtivos dunha fábrica de conservas. Incídese na organización laboral nas fábricas, nas relacións laborais e humanas, e no importante papel desempeñado pola muller na industria do mar.

A través da colección ilústranse os aspectos sociolóxicos e culturais da industria conserveira; faise un percorrido polas marcas comerciais e os documentos que mostran a actividade que forma parte do Patrimonio Industrial de Galicia. Forman parte da exposición os relatos históricos sobre as sagas empresariais, e aspectos comunicativos desta industria como a publicidade (obxectos publicitarios, catálogos etc.), o deseño de envases, etiquetas, caixas, abrelatas etc.

Multimedia