Museos de Galicia

Actividades

Xoves 4 de maio ás 18h "El Mariscal Pedro Pablo", de Emilia Pardo Bazán. Lectura dramatizada

Unha xornada máis desenvólvese o faladoiro “Os xoves da Rúa Tabernas”, que con carácter mensual se desenvolve na Casa-Museo Emilia Pardo Bazán na Coruña.

Nesta ocasión farase unha lectura dramatizada da obra de Pardo Bazán, adaptada e dirixida por Santiago Fernández. O elenco de actrices e actores é o seguinte:  Jose M. Carballo, Mónica Carballo, Pedro Leiras, Rafael Enríquez, Santiago Fernández, Ana Sánchez, Concha Pardo, Daniel Loncán, Diana López, Giuliano Ancelotti e Iago Rego.

El Mariscal Pedro Pardo es un drama escrito por Emilia Pardo Bazán no que narra as últimas horas do Mariscal Pedro Pardo de Cela, partidario de Juana de Castilla, mal chamada La Beltraneja, nas loitas pola sucesión ao trono de Castela, no século XV.

Asediado polas tropas de Ladrón de Guevara e o Bastardo Mudarra, o Mariscal é traizoado por un dos seus homes, quen franquea as portas do Castelo da Frouxeira a cambio de favores, mais el consegue fuxir, e acode á Corte de Castela na procura de indulto real. O perdón non chega a tempo e Pardo é axustizado na Praza de Mondoñedo.

Venres 12 de maio ás 16h Xornada sobre Educación e Patrimonio: un diálogo interdisciplinar

Museo das Peregrinacións e de Santiago

A Dirección Xeral de Patrimonio Cultural está a desenvolver, dentro do Plan Proxecta, o programa “Mirando polo Camiño” orientado a promover o contacto directo dos alumnos co patrimonio cultural, empezando pola súa contorna inmediata.

No contexto deste programa, organízase a Xornada sobre Educación e Patrimonio: un diálogo interdisciplinar, dirixida a docentes e profesionais que desenvolven a súa actividade en relación co patrimonio cultural co obxectivo de crear un intercambio de experiencias en relación coa divulgación no ámbito da educación formal dende a docencia e dende o campo da xestión do patrimonio.

A Xornada terá lugar no Auditorio do Museo das Peregrinacións e de Santiago, en Santiago de Compostela. Pódese consultar máis información así como os datos de contacto para a inscrición en http://www.edu.xunta.gal/portal/node/21813

O programa será o seguinte:

16:00 h.: Presentación

16:15 h.–17:00 h.: A Educación Patrimonial, unha disciplina clave na xestión do patrimonio cultural. Olaia Fontal Merillas, profesora na Facultade de Educación e Traballo Social da Universidade de Valladolid e directora do Observatorio de Educación Patrimonial en España.

17:00 h.-17:45 h.: A paisaxe como marco para a identificación cidadá co patrimonio. Ramón López Facal, profesor de Didáctica das Ciencias Sociais na Facultade de Ciencias da Educación da Universidade de Santiago.

17:45 h. -18:15 h.: Descanso, pausa café

Mesa redonda (de 18:15 h. a 20:30 h.)

Coordinador: Ramón López Facal

Participantes: Olaia Fontal Merillas, Eva Garea Traba (profesora no IES de Ames), José Antonio Seoane Pardo (profesor do IES Arcebispo Xelmírez de Santiago de Compostela), Covadonga López de Prado Nistal (directora do Museo Massó, Bueu), José Manuel Rey García (director do Parque Arqueolóxico da Arte Rupestre, Campo Lameiro, Pontevedra).

17 de maio Celebración do Día das Letras Galegas

O Museo Liste de Vigo vén de facer pública a súa programación para o segundo semestre do ano, cunha gran variedade de actividades que abranguen exposicións, actividades cíclicas educativas, obradoiros de aprendizaxe e tamén a conmemoración de datas sinaladas no calendario galego como é a do Día das Letras Galegas.

Este ano o museo etnográfico fará a actividade “Apañando verbas perdidas”, na que se continúa a recollida de vocábulos en desuso. Tamén haberá actividades para nenos/as coa elaboración de murais e collages sobre a figura do homenaxeado.

Aprovéitese tamén esta data para facer a Entrega de premios do V Concurso de Relatos para nenos/as de primaria e E.S.O e do IV Concurso Fotográfico, ámbolos dous convocados polo museo.

18 de maio Celebración do Día Internacional dos Museos

O Museo Liste de Vigo ven de facer pública a súa programación para o segundo semestre do ano, cunha gran variedade de actividades que abranguen exposicións, actividades cíclicas educativas, obradoiros de aprendizaxe e tamén a conmemoración de datas sinaladas no calendario, neste caso internacional como é a do Día Internacional dos Museos, este ano baixo o lema “Museos e Historias controvertidas: dicir o indicible nos museos”, e no que se fará unha visita guiada especial relacionada co dito lema.

Mércores 14 de xuño ás 17h Marxes de liberdade feminina na Galicia medieval: sexo, propiedade e poder

Conferencia do historiador Miguel García-Fernández

O Museo Liste de Vigo vén de facer pública a súa programación para o segundo semestre do ano, cunha gran variedade de actividades que abranguen exposicións, actividades cíclicas educativas, obradoiros de aprendizaxe así como xornadas de comunicación como esta, na que o historiador Miguel García-Fernández afondará no manido concepto de Idade Media como época escura, que queda en dúbida á luz de investigacións recentes como a da propio poñente, quen defende a gran marxe de liberdade da que gozaban as mulleres no Medievo en comparación co deterioro que esta posición sufriu posteriormente.

Levarase a cabo na "Sala da Madeira Escavada" do Museo Liste, dirixida ao público en xeral e con entrada gratuíta.

Miguel García-Fernández é Licenciado en Historia e máster en “Estudios Medievales Europeos”, e realiza a súa tese de licenciatura na Universidade de Santiago de Compostela sobre a posición das mulleres na sociedade medieval.

Paginador

  1. 1
  2. 2
  3. 3