Museos de Galicia

Actividades

Mércores do 16 de novembro de 2016 ao 31 de maio de 2017, de 19 a 20:30 h Os ollos non queren pecharse. Persistencias e resistencias da mirada na historia do cinema

Centro Galego de Arte Contemporánea (CGAC)

A historia da humanidade é tamén a historia da mirada. Da luz das estrelas ás sombras das cavernas, o ser humano tratou sempre de ver máis aló, de transcender a súa realidade cotiá. E coa súa insaciable pulsión escópica, coa súa resistencia a pechar os ollos, naceron tamén a ilusión, o soño e a fantasía: o desexo, en definitiva. O cinema chegou moito despois, como prolongación natural dese desexo.

Este curso exponse como unha pequena e parcial historia da mirada a través de películas e cineastas que se resisten a pechar os ollos, que se rebelan e nos revelan novas maneiras de ver e de dar a ver, ampliando así o noso imaxinario. De Alfred Hitchcock a Werner Herzog; de Andrei Tarkovski a Terrence Malick; da melodrama dos anos corenta ao thriller do setenta; de Jean Vigo, Jean Epstein e Jean Cocteau ao cinema experimental do sesenta; de Yasujiro Ozu a John Ford, de Jacques Rivette a Chantal Akerman, de M. Night Shyamalan a Kiyoshi Kurosawa ou de Dziga Vértov a Luis Buñuel, que seccionou a mirada inocente do público coa mítica imaxe da navalla cortando un ollo.

Esas miradas afiadas, abertas en canle, son as que buscaremos neste curso; miradas que, en ocasións, foron paradoxalmente veladas ou esquecidas pola historiografía oficial e ás que trataremos de dar luz. Porque como dicía Jean-Luc Godard nas súas Histoire(s) du cinéma, “o cinematógrafo nunca quixo producir un acontecemento senón, en primeiro lugar, producir unha visión”.

Folleto da actividade

 

HORARIO: Mércores de 19:00 a 20:30 h

16 de novembro. O ollo da cámara (ou o cinema como pulsión escópica)
23 de novembro. O ollo e a navalla de Luis Buñuel
30 de novembro. Entre unha imaxe e outra imaxe: a sintaxe sentimental do cinema
14 de decembro. Entre un son e unha imaxe: a audiovisión
21 de decembro. Visións do absoluto I. Andrei Tarkovski
11 de xaneiro. Visións do absoluto II. Terrence Malick
18 de xaneiro. Quero ver o que ti ves: o cinema e a luz
25 de xaneiro. Imaxes a flor de pel: a autobiografía no cinema
1 de febreiro. Unha habitación con vistas: o cinema (de) interior de Chantal Akerman
8 de febreiro. A zona cero da mirada: Nobuhiro Suwa, o cineasta de Hiroshima
15 de febreiro. Retrato dunha obsesión: A bela mentireira de Jacques Rivette
22 de febreiro. Werner Herzog, testemuña da apocalipse
1 de marzo. O sublime e o sinistro na obra de M. Night Shyamalan
8 de marzo. Visións espectrais no melodrama norteamericano dos anos corenta
15 de marzo. Nós, as pantasmas: o cinema de Kiyoshi Kurosawa
22 de marzo. O espello de tres caras I. Jean Epstein (1897-1953)
29 de marzo. O espello de tres caras II. Jean Vigo (1905-1934)
5 de abril. O espello de tres caras III. Jean Cocteau (1889-1963)
19 de abril. Revelacións (e melancolía) da forma no cinema de Yasujiro Ozu e John Ford
26 de abril. O "alumbramiento" de Víctor Erice
10 de maio. A pantalla opaca: o thriller norteamericano dos anos setenta
24 de maio. José Luis Guerín e as sombras do real
31 de maio. Non ver / ver / deixar de ver: trompe l’oeil e miraxes da comedia

 

José Manuel López (Vigo, 1974)

Licenciado en Publicidade e Relacións Públicas e, actualmente, doutorando en Comunicación pola Universidade de Santiago. En 2004 funda a revista en liña de cinemaTren de sombras e actualmente forma parte do consello de redacción da revista Caimán Cadernos de Cinema (anteriormente coñecida como Cahiers du Cinéma. España).
En 2011 e 2012 traballa como dialoguista na cuarta e quinta tempada de Matalobos, a serie que a produtora Voz Audiovisual desenvolve para a Televisión de Galicia.
Colabora desde o 2012 co MARCO de Vigo e desde o 2014 co CGAC de Santiago como docente de cursos de cinema e participou en seminarios e impartiu charlas en diferentes lugares de España.
En 2008 edita o libro Naomi Kawase. El cine en el umbral para o Festival Internacional de Cinema de Las Palmas de Gran Canaria e participou en libros colectivos como La risa oblicua. Tangentes, paralelismos e intersecciones entre documental y humor (Documenta Madrid), Elegías íntimas. El cine visto por los cineastas (Documenta Madrid),Un extraño entre nosotros. Las aventuras y utopías de José Luis Borau (Filmoteca de Estremadura) o Paul Schrader. El cineasta frenta a los tiempos (Seminci. Festival de Cine de Valladolid). Colaboró en revistas especializadas como Secuencias, Transit, Blogs & Docs ou Nosferatu e con editoras de DVD como Intermedio ou Cameo.

DIRECCIÓN: José Manuel López

COORDINACIÓN: Virginia Villar

DESTINATARIOS: Profesores, estudantes e todas as persoas interesadas no tema proposto.

PRAZAS: 250

INSCRICIÓN: O prazo de inscrición estará aberto desde o 15 de xuño até o 16 de novembro de 2016. As persoas interesadas poden inscribirse enviando un correo electrónico a cgac.educacion@xunta.gal no que deberán indicar o seu nome completo, DNI, estudos, área de traballo ou interese, unha dirección de correo electrónico e un teléfono de contacto. Unha vez aceptada a solicitude, informarase ás persoas inscritas sobre como realizar o pago.

MATRÍCULA: matrícula anticipada (15 de xuño - 31 de agosto): 70 € / Matrícula ordinaria (1 de setembro - 16 de novembro): 80 € / Socios do Cineclube Compostela: 65 €

CERTIFICACIÓN: O CGAC entregará un certificado de asistencia a todas aquelas persoas que asistan ao 75% das sesións como mínimo.

COLABORA: Cineclube de Compostela

Domingo 5 de marzo ás 18:30 h Filocafé con Suso Fandiño

Centro Galego de Arte Contemporánea (CGAC)

O primeiro domingo de cada mes, desde setembro ata xuño (agás nos meses de decembro e xaneiro), o CGAC organiza un filocafé na súa cantina. Os filocafés son conversas públicas cun enfoque filosófico nas que poden participar todas as persoas interesadas en intercambiar inquietudes ou puntos de vista.

As sesións estarán dirixidas por profesionais de diversas disciplinas como María Meijide (artista), Carlos Santiago (dramaturgo, escritor e músico), Camilo Franco (xornalista, escritor, crítico teatral), María do Cebreiro (poeta, teórica da literatura), Suso Fandiño (artista plástico), María José de Castro López (médico pediatra, investigadora e especialista en enfermidades raras), Fermín Blanco (arquitecto) e Celso Fernández Sanmartín (poeta, contador de historias e filósofo).

A sesión do 5 de marzo diríxea Suso Fandiño (Santiago de Compostela, 1971). É doutor en Belas Artes pola Universidade de Vigo e Licenciado en Historia da Arte pola Universidade de Santiago de Compostela. Nos últimos anos, tivo exposicións individuais como La letra con sangre entra, na sala PALEXCO da Coruña, Space for Creative Works do Islington Mile en Birminghan ou Little Shepherd's Stories, na galería Adhoc de Vigo, e participou en mostras colectivas como Col., no CGAC; The Syndrome of the Eternal Traveller, en Edimburgo; ou Skywards. Space Artsandlabour, en Londres. Exhibiu a súa obra en espazos coma o Anexo do MARCO de Vigo ou a Zona C de Santiago de Compostela, o Goethe Institut de Frankfurt, a Fundación Barrié de la Maza na Coruña ou a Feira Internacional de Arte Contemporáneo ARCO en Madrid. A súa obra está incluída en coleccións como a da Fundación Pedro Barrié de la Maza, a Colección Fundación Coca-Cola España, a Colección ABANCA e a Colección CGAC. 

Consulta o folleto da actividade.

Sábado 18 e domingo 19 de marzo O corpo. Talleres para familias

Centro Galego de Arte Contemporánea (CGAC)

O CGAC presenta un novo ciclo de talleres de experimentación artística dirixidos a familias con nenos e nenas de idades comprendidas entre os 4 e os 9 anos. Os pequenos e pequenas poderán descubrir, crear e gozar en familia e achegarse xuntos ao fascinante universo da arte contemporánea. Nesta nova edición de Talleres para familas traballaremos a relación que existe entre o corpo e arte contemporánea. Coñeceremos as miradas de cinco artistas arredor do corpo. O corpo como modelo, como materia, como lenzo, como sombra, como ferramenta, como pegada... Analizaremos ademais os roles que asumimos e o modo de actuar dunha sociedade globalizada que parece obsesionada por seguir canons estéticos vinculados ao corpo sen se deter a descubrir o máis extraordinariodas persoas: as súas diferenzas.

REALIDADES. GEORGE SEGAL. 18 e 19 de marzo

Sábado 18, para familias con nenos e nenas de 4 a 6 anos

Domingo 19, para familias con nenos e nenas de 7 a 9 anos

Prazo de inscrición: Do 6 ao 17 de marzo

Os personaxes da obra de George Segal preséntanse como esculturas de tamaño natural que a miúdo aparecen en ambientes cotiáns rodeadas de obxectos comúns: nunha parada de autobús, nun semáforo, nunha cadeira... Neste taller intentaremos situar os nosos corpos nas nosas realidades recreadas. Repararemos no noso camiñar, expresións, posturas, respiración... Farémonos conscientes da nosa relación cos obxectos que nos rodean e de como reproducimos as mesmas accións día tras día coma rituais. Moldearemos os nosos corpos coma se fósemos barro ou plastilina ata atrapar un instante.

Máis información 

Venres 24 e sábado 25 de marzo Tentativas críticas

Centro Galego de Arte Contemporánea (CGAC)

Tentativas críticas é o núcleo discursivo e teórico do proyecto expositivo (EX)POSICIONES CRÍTICAS. En ningún caso debe entenderse como unha actividade paralela ou complementaria, senon como elementos e partes consustanciais da exposición. É un conxunto de actividades, mesas redondas, e publicacións que plantexa o debate e a producción de ideas, co obxectivo de configurar un posible mapa do pensamento crítico actual no noso país. Inclúe mesas de debate en tres momentos: 17 e 18 de febreiro, 24 e 25 de marzo e 5 e 6 de maio.

 

24 de marzo

16:30 h Políticas da beleza

Juan Navarro Baldeweg, Miguel Fernández-Cid, Guillermo Pérez Villalta

Modera: Óscar Alonso Molina

 

18:30 h Estetización do político

Daniel García Ándujar, Mateo Maté, Fernando Sánchez-Castillo

Modera: Jorge Luis Marzo

 

25 de marzo

11:00 h Estéticas net-pop

Ana Laura Aláez, Eloy Fernández Porta, David G. Torres

Modera: Bea Espejo

 

12:30 h Territorio.Gal

Suso Fandiño, Pablo Fanego, Manuel Segade

Modera: Chus Martínez Domínguez

 

Máis información na web do CGAC.

Sábado 25 e domingo 26 de marzo, de 11 a 13 h Mies é+. Talleres experimentais de arquitectura contemporánea

Centro Galego de Arte Contemporánea (CGAC)

MANIFESTA, IMAXINA, EXPERIMENTA, SINTE!

O arquitecto Fermín Blanco, a través do equipo didáctico do Sistema Lupo, propón unha serie de talleres de arquitectura dirixidos ao público infantil. O obxectivo é proporcionarlles aos nenos e nenas as claves necesarias para interpretar a arquitectura contemporánea mediante o legado das figuras máis relevantes do noso tempo neste eido.

O arquitecto David Antuña e Víctor González e os educadores Rebeca Mariño e Santiago Chenlo introducirán os participantes no apaixonante mundo da arquitectura contemporánea. Cada taller estará dedicado a un autor representativo das diferentes xeracións de arquitectos desde as vangardas até a actualidade e desenvolverase atendendo á filosofía de cada creador.

O xogo será fundamental durante todas as sesións. Utilizarase a didáctica do Sistema Lupo tanto no tocante ao material como aos contidos. Este sistema comprende unha serie de pezas modulares que permiten múltiples posibilidades combinatorias, formas, proporcións, xogos de equilibrio e estratexias de acción. É unha didáctica experimental que fomenta a reflexión e a creatividade individuais ademais do traballo en equipo a través de dinámicas de construción a grande escala.

A metodoloxía inclúe unha parte teórica, onde se fará un achegamento á figura e ao pensamento de cada arquitecto, e posteriormente proporase unha serie de retos construtivos.

Este segundo bloque de talleres, que continuará celebrándose a última fin de semana de cada mes, abordará o rigor de Mies van der Rohe, a palabra de Rem Koolhas, o aspecto lúdico de Charles e Ray Eames, o traballo visionario de Richard Buckminster Fuller, a vocación social de Alison e Peter Smithson e o ritmo, o sentimento e o sentido comunitario de Lina Bo Bardi nas súas producións arquitectónicas.

Charles e Ray Eames. Fala creativo

25 e 26 de marzo.

Sábado 25. Para nenos e nenas de 6 a 8 anos

Domingo 26. Para nenos e nenas de 9 a 11 anos

Horario: 11:00-13:00 h

 

Maís información

Paginador

  1. 1
  2. 2