O mosteiro de San Paio de Antealtares foi o primeiro que tivo a cidade de Santiago, posto que xurdiu no século IX por desexo de Alfonso II de Asturias, quen fixo vir doce monxes beneditinos para custodiar as reliquias do Apóstolo.
A Asociación “Patronato do Museo Etnográfico da Capela" está impulsada polo Concello da Capela e o C.E.I.P “Mosteiro de Caaveiro”, que achegou unha interesante colección etnográfica froito dunha experiencia sociopedagóxica iniciada no ano 1981 coas contribucións dos alumnos, profesores e veciños do centro, cun carácter eminentemente didáctico e coa intención de dar a coñecer e recuperar do esquecemento elementos da cultura tradicional galega.
O Museo de Arte Contemporánea 'Carlos Maside' xorde en 1970 ante a necesidade de recoller a obra e a documentación dos artistas da xeración dos anos trinta, ampliando posteriormente os seus obxectivos como testemuña da creación artística contemporánea galega. O museo atópase nun complexo arquitectónico que acolle ademais a fábrica de Cerámicas O Castro, un edificio destinado a mostra de cerámica, librería, e unha sala de exposicións temporais; o máis característico é o edificio do museo, formado por módulos hexagonais distribuídos en torno a un módulo central.
A Fundación Museo Eugenio Granell atópase no Pazo de Bendaña, un dos edificios máis emblemáticos do centro histórico de Santiago e exemplo da arquitectura civil de mediados do século XVIII. Situado na Praza do Toural, é un edificio destacado da arquitectura barroca compostelá, obra de Vicente Sarela. Na fachada loce o escudo do marquesado de Bendaña e, coroando o edificio, a figura de Atlas que soporta a bóveda celeste.
O Museo Militar Rexional da Coruña é un museo de historia que a través dunha rica e variada exposición permanente informa e testemuña as vivencias e as inquedanzas dos exércitos, e ofrece a posibilidade de aproximarse a unha comprensión máis integral e realista do pasado.
O Muncyt ten varias sedes. O 4 de maio de 2012 os Príncipes de Asturias inauguraron a sede coruñesa no edificio Prisma de Cristal. O edificio foi proxectado por Victoria Acivro e Anxo Alonso. O que externamente é un cubo de vidro sorprende ao penetrar no seu interior, revelando a existencia de dous edificios nun.
O Castelo de San Antón, antiga fortificación construída para a defensa da cidade da Coruña, sitúase fronte o Paseo do Parrote, na coñecida como “Illa da Pena Grande”. Durante o seu período insular (ata os anos 40 do século XX), San Antón comunicouse coa cidade dende a Casa de Botes ou do Boteiro, actualmente habilitada como biblioteca do Museo.
O Museo do Gravado á Estampa Dixital, encóntrase na localidade de Artes, concello de Ribeira (A Coruña). Artes forma parte do complexo dunar de Corrubedo e as lagoas de Carregal e Vixán, lugares que conforman unha das brañas máis singulares de España.
A Domus é un museo interactivo dedicado de forma global e monográfica ao ser humano, e encóntrase no Paseo Marítimo de Riazor, nun edificio construído polo arquitecto xaponés Arata Isozaki.
O lema deste museo é "Coñécete a ti mesmo, como individuo e como especie". Busca espertar a curiosidade e provocar a reflexión sobre a nosa especie. Todo iso sen prescindir da diversión, o ingrediente máis estimulante en calquera actividade humana.
O centro está situado no edificio coñecido como antiga Escola de Nenas, no centro da vila de Cee, erixido pola Fundación Fernando Blanco de Lema no soar da vella casa do seu mecenas.
A colección está formada na súa maior parte polo instrumental científico e o material didáctico das antigas cátedras, laboratorio e gabinetes do vello Instituto-Escola de Cee, de finais do século XIX, entre os que se atopan medidores de diversas magnitudes, aparellos de mecánica, acústica, óptica, etc. Cabe salientar tamén as coleccións de animais, minerais e fósiles.