O Centro conserva, ademais de instrumentos de música de raíz galega, arquivos sonoros, documentación e material audiovisual. É unha colección singular, resultado de máis de 40 anos de investigación de Xavier Blanco.

A exposición estrutúrase en tres salas temáticas:

• Sala 1. Instrumentos primixenios: creados con elementos da natureza, empregados para comunicarse, imitar sons ou realizar rituais.
• Sala 2. O ciclo festivo do ano: pezas vencelladas ás celebracións tradicionais, tanto relixiosas como ligadas ao traballo e ao ciclo produtivo.
• Sala 3. O movemento acompasado: instrumentos asociados á danza, ao ritmo do camiñar e ás cantigas de labor.

Este espazo está pensado para todas as persoas, sen restricións de idade nin perfil:

• Público xeral: familias, persoas adultas e viaxeiras curiosas pola música e a cultura galega.
• Comunidade educativa de todas as etapas académicas.
• Asociacións e grupos culturais: actividades enfocadas na recuperación e transmisión das tradicións.
• Persoas con necesidades específicas: un centro accesible e inclusivo, aberto a toda a sociedade.