Do 22 de novembro do 2019 ao 16 de febreiro do 2020 O Camiño Francés en 360 graos

Fotografías de Goyo González que amosan o Camiño dende un novo punto de vista

Museo das Peregrinacións e de Santiago

“O Camiño Francés en 360º” enmárcase dentro da liña expositiva de programación transversal do Museo. Esta modalidade fai posible a entrada de ofertas culturais de novos/as artistas ás salas expositivas, convertendo o Museo nun foro de portas abertas que potencie a creación cultural.

A exposición consta de 36 fotografías panorámicas circulares seleccionadas entre o amplo repertorio que ten o autor sobre lugares destacados do Camiño de Santiago. Foron realizadas durante máis de 10 anos nos que Goyo González realizou en repetidas ocasións o Camiño, principalmente en bicicleta. Nas instantáneas que se amosan na exposición plasmou o seu concepto tanto do Camiño como da propia peregrinación e os/as peregrinos/as. A súa visión transcende á dun mero observador que se achega ao fenómeno da peregrinación, neste caso do Camiño de Santiago, e capta coa súa cámara o que ao seu redor acontece. É unha aproximación “dende dentro” a través da mirada de alguén que coñece perfectamente como peregrino o Camiño e tamén os miles de peregrinos/as que atendeu durante anos na súa época de hospitaleiro.

As fotografías que imos poder desfrutar atenden a elementos intimistas pero utilizando unha visión fotográfica novidosa que permite achegarse ao Camiño de Santiago a través de panorámicas realizadas en 360 graos.

Galería

  • Unha foto da mostra