A Xunta leva a Ribadavia un percorrido polas denominacións de orixe e indicacións xeográficas do viño de Galicia a través da mirada de Xurxo Lobato
As máis de cen imaxes do fotógrafo coruñés estarán expostas na Alameda de Ribadavia ata o vindeiro mes de setembro.
O secretario xeral de Cultura, Anxo M. Lorenzo, inaugurou o 25 de xuño na Alameda de Ribadavia a exposición "O viño en Galicia", coa que o fotógrafo coruñés Xurxo Lobato ofrece un percorrido por todas as denominacións de orixe e indicacións xeográficas da comunidade. Trátase dunha mostra de rúa que forma parte da programación cultural do Museo do Viño de Galicia e que se poderá contemplar na Alameda do concello ourensán ata o vindeiro mes de setembro.
No acto de presentación, o representante da Consellería de Cultura, Educación e Universidade referiuse ás imaxes de Xurxo Lobato como “unhas das principais ventás de Galicia, un marco desde o que observar e entender o noso legado cultural que, nesta ocasión, amosan a importancia do patrimonio natural e paisaxístico ligado ao viño da nosa comunidade”. Do mesmo xeito, lembrou que o bo facer de Lobato levouno a ser o primeiro fotógrafo en ser recoñecido cos Premios da Cultura Galega, galardón que recibiu este mesmo ano.
Anxo M. Lorenzo engadiu que, ademais desta mostra, este verán a Xunta de Galicia vai impulsar máis de 3.000 actividades por toda a xeografía galega cun investimento superior aos 9 M€ ao abeiro do Plan de Reactivación da Cultura. Son actividades que se sumarán á programación especial do Xacobeo 21-22 e que favorecerán a posta en marcha de numerosos eventos que abranguen todas as artes escénicas e propostas culturais dirixidas a todo tipo de públicos, tanto en zonas urbanas como no rural.
A exposición inaugurada na Alameda de Ribadavia está deseñada para itinerar polas cidades e vilas das denominacións de orixe, así como polas dotacións culturais que estean especializadas no viño. Trátase de máis dun centenar de imaxes que abarcan desde o patrimonio natural ata as adegas e festas do viño e que están divididas nunha vintena de paneis especializados en diferentes temáticas que ofrecen a imaxe do viño en Galicia.
