A colección do Museo Diocesano de Santiago de Compostela reúne unha parte importante do patrimonio moble pertencente á Arquidiocese de Santiago de Compostela. 

Gran número de pezas proceden de parroquias da diócese, ben porque caeron en desuso ou porque non se dispoñía dos medios para a súa conservación, sendo depositadas en San Martiño Pinario, onde chegaron a ser expostas de forma temporal ou puntual. Outras pezas son de institucións vinculadas a este museo, como o Museo da Catedral ou a propia catedral de Santiago, mentres que outras foron realizadas ex profeso para o Diocesano. Así mesmo, súmanse os fondos do inmoble que acolle este museo, o antigo Mosteiro de San Martiño Pinario e o Seminario Maior que o ocupou desde o ano 1829. 

A maior parte da colección do Museo Diocesano constitúena pezas de arte sacra, aínda que está composta por pezas de natureza diversa, desde a época medieval ata a contemporaneidade: escultura relixiosa en distintos materiais (madeira, pedra, marfil ou alabastro), pintura (representación de escenas relixiosas, temática xacobea ou retratos de figuras eclesiásticas), artes decorativas, ourivaría e obxectos litúrxicos (pratería, copóns, portapaces ou cruces procesionais). Ademais, a sección máis antiga desta colección é arqueolóxica, xa que posúe unha colección de laudas sepulcrais relacionadas coa historia de Santiago e da catedral.