Oficios en extinción Imaxes que contan, persoas con historias

"Oficios en extinción" é unha exposición híbrida, formada por fotografías, litofanías e un vídeo (40 minutos).

Trátase dun proxecto elaborado polo alumnado de 3º e 4º da ESO do IES Manuel Chamoso Lamas (O Carballiño), dentro do programa Proxecta Foto - Fotografía en Curso.

O esquema a seguir para o desenvolvemento do traballo foi o seguinte: tras unha etapa de formación e estruturación dos grupos de traballo, pasouse á localización de persoas e documentación, recollida de material e concreción do espazo a fotografar. Tras elaborar un guión, fixéronse as saídas fotográficas. Coa edición das fotos elaborouse a exposición final. Neste caso nun formato multimedia, onde as fotografías interactúan nunha instalación coa linguaxe audiovisual e as novas tecnoloxías.

Os protagonistas que contan as súas historias son: Mari Carmen, que elaboraba "molidos" ou mulidos para carrear cestos; Antonio, campaneiro; Marina, muiñeira; Higinio, que se dedicou a facer corozas, cestos e bozos; Adolfo, coñecido como "o home da luz", que lía contadores polas aldeas e subía aos postes; Lito, ferreiro; e Ernesto, operador de cabina de cine en Leiro. De todos eles e todas elas, como o nome da exposición indica, recupérase a memoria dos seus oficios, unindo memorias a partir de bens mobles e documentais, coa implicación da xente máis nova.