Arte efémera para toda unha vida. Cuestións sobre a tatuaxe Proposta de artes plásticas do museo para participar na edición XVII do Festival Arteficial

O Festival Arteficial celebra a súa XVII edición no conxunto histórico da vila de Ribadavia; como aconteceu nas súas últimas edicións, o Museo Etnolóxico acolle unha exposición, en colaboración co Festival, buscando xerar un espazo de difusión, reflexión e visibilidade, neste caso, para unha arte plástica singular, a tatuaxe.

Comisariada por Aida Lojo, a mostra foxe dunha visión histórica ou retrospectiva da tatuaxe e aborda, dende a perspectiva das persoas que tatúan, a historia, formación, riscos, creacións, significados etc., desta arte milenaria e o que son os aspectos particulares e/ou singulares desta arte.

Así, a exposición é unha mestura onde poden atoparse audiovisuais de procesos creativos e execución de tatuaxes, láminas de creacións de deseños, fotografías de peles tatuadas, peles sintéticas tatuadas, máquinas de tatuaxes e outras pezas vinculadas ao deseño. Estas, ademais, están acompañadas polas reflexións dos e das artistas.