Museos de Galicia

Museo das Peregrinacións e de Santiago

15 de marzo do 2017 Inaugúrase no Museo das Peregrinacións e de Santiago a exposición "Na procura do pasado"

Museo das Peregrinacións e de Santiago

A exposición “Na procura do pasado” recupera o labor das principais figuras que impulsaron a  arqueoloxía na provincia de Ourense dende o século XIX ata a pasada década dos anos 70. Foi inaugurada o 14 de marzo no Museo das Peregrinacións e de Santiago o polo secretario xeral de Cultura, Anxo Lorenzo; pola directora xeral do Patrimonio Cultural, María Carmen Martínez Insua; polo alcalde de Ourense, Jesús Vázquez; polo director do museo, Bieito Outeiriño, e polo director do Museo Arqueolóxico Provincial de Ourense (MAPOu), Xulio Rodríguez.

A mostra, pretende dar unha visión das principais figuras que levaron a cabo a práctica da arqueoloxía desde finais do século XIX ata os anos 70 do século XX. Neste labor destacan os nomes de Marcelo Macías, Arturo Vázquez Núñez, Manuel Díez Sanjurjo, Florentino López Cuevillas, Xaquín Lorenzo Fernández, Xesús Ferro Couselo, Xesús Taboada Chivite, Conde Valvís, Rubén García Álvarez, Manuel Chamoso Lamas e Laureano Prieto, entre outros.

A exposición recolle fotografías destes pioneiros así como pezas arqueolóxicas directamente relacionadas coa súa actividade e que forman parte dos fondos do Museo Arqueolóxico Provincial de Ourense, como o guerreiro de Armeá, o sedente de Xinzo, a tábula de Castromao e o mosaico da Cigarrosa, entre outras.

A exposición é unha produción propia do Museo Arqueolóxico de Ourense, que, logo da súa exhibición na Sala de exposicións de Afundación en Ourense, agora itinera para transmitir ao maior público posible a importancia deste tema para toda a arqueoloxía galega.

“Na procura do pasado” poderá visitarse no Museo das Peregrinacións e de Santiago ata o próximo 28 de maio na sede da praza das Praterías.

 

Galería

  • Peza da exposición

  • Peza da exposición

  • Peza da exposición

  • Peza da exposición

13 de xaneiro do 2017 O Museo das Peregrinacións e de Santiago presenta unha obra de referencia para o estudo das iconas

Museo das Peregrinacións e de Santiago

O Museo das Peregrinacións e de Santiago presentou hoxe na capital de Galicia o catálogo da exposición ‘A contemplación do invisible’, no que se analizan en profundidade as preto de 300 pezas que conforman a colección Santos-Illueca de iconas rusas.

“O volume constitúe unha obra de referencia para a investigación arredor deste patrimonio artístico e cultural”, afirmou durante o acto de presentación o secretario xeral de Cultura, Anxo Lorenzo, quen lle agradeceu á familia propietaria das obras o seu depósito no espazo museístico xestionado pola Xunta de Galicia. Segundo asegurou, o catálogo dá boa mostra do excepcional valor das pezas da colección Santos-Illueca, que foron depositadas no museo entre os anos 2013 e 2015.

Tamén fixo fincapé o secretario xeral no interese de poder incorporar coleccións particulares de singular valor artístico a espazos expositivos públicos a través dos depósitos, co obxectivo de favorecer o acceso a estes bens por parte de toda a cidadanía, ademais de garantir a súa conservación e difusión.

O catálogo inclúe un estudo realizado polo comisario da exposición, Xoel Rodríguez, e o traballo da investigadora Ángela Franco, xefa honoraria do departamento de Antigüidades Medievais do Museo Arqueolóxico Nacional. Ambos os autores, que participaron no acto xunto coa directora xeral do Patrimonio Cultural, Mª Carmen Martínez Insua, e o director do museo, Bieito Pérez Outeiriño, explicaron os principais eixos da obra, que afonda no significado, nas técnicas, na temática e na procedencia de cada unha das pezas que conforman a exposición.

Un conxunto artístico singular

Preto de 17.000 persoas visitaron desde o pasado mes de xullo ‘A contemplación do invisible’, que aínda se exhibe ata o próximo día 28 de xaneiro na sede de Praterías do Museo das Peregrinacións e de Santiago. Nela pódense ver preto de 300 obras de gran calidade técnica e artística vinculadas coas distintas escolas que traballaron baixo a órbita da igrexa ortodoxa rusa e procedentes dos diversos países que conformaban a área soviética: Estonia, Letonia, Lituania, Bielorrusia, a antiga Checoslovaquia e Ucraína, ademais de Rusia.

As iconas son un produto da igrexa oriental dos primeiros séculos do cristianismo, similar ao que poden ser as efixies dos santos para o catolicismo. Cunha tradición de máis de mil anos de historia, tiñan como fin axudar ao fiel na súa oración; e incluso a moitas delas atribúenselle dotes milagreiras.

Galería

  • Obra da colección

  • Obra da colección

  • Presentación do catálogo

  • Presentación do catálogo

  • Presentación do catálogo

10 de novembro do 2015 O ministro de Cultura visita o Museo das Peregrinacións e de Santiago

Museo das Peregrinacións e de Santiago

O presidente da Xunta, Alberto Núñez Feijóo, acompañou esta mañá ao ministro de Educación, Cultura e Deporte, Íñigo Méndez de Vigo, na súa visita ao Museo das Peregrinacións e de Santiago.

O Museo das Peregrinacións e de Santiago comezou o pasado sábado unha nova etapa con nova sede museística e novo proxecto museográfico que reforza e clarifica o discurso expositivo e a posta en valor das pezas amosadas neste centro de titularidade estatal e xestión autonómica.

O novo programa expositivo, redactado polo equipo técnico do museo, pon de relevo a transmisión de valores como a tolerancia ou a interculturalidade a través dun discurso que, partindo do fenómeno universal das peregrinacións, mostra a relevancia da peregrinación xacobea e a súa incidencia na evolución da cidade compostelá.

A presentación dos contidos, confeccionada para resultar amena e interesante para un público diverso, estrutúrase en catro niveis de lectura para a comprensión dunha historia milenaria, que se desenvolve á marxe das barreiras políticas, das culturas e do tempo: tres grandes áreas temáticas que levan ao visitante do universal ao local e un epílogo.

Desde as distintas peregrinacións existentes en todas as latitudes, pasando polas peregrinacións cristiás e as tres grandes rutas: Santiago, Xerusalén e Roma, continuando pola historia, tradición e lenda xacobea, e rematando pola pegada histórica e evolución da urbe de Santiago, o museo ofrece un relato histórico, artístico e cultural extraordinario que permite comprender a peregrinación a través dos bens culturais relacionados con ela.

20 anos de Peregrinacións
Creado en 1951 como Museo de Santiago e das Peregrinacións, por iniciativa da Dirección Xeral de Belas Artes e o Municipio de Santiago, trátase dun museo de titularidade estatal e xestión transferida á Xunta de Galicia en 1995. Foi inaugurado de forma definitiva en febreiro de 1996 na súa sede da Casa Gótica.

A nova sede de Praterías, situada no edificio anteriormente ocupado polo Banco de España, en pleno casco histórico compostelá e ao lado da Catedral, foi rehabilitado polo arquitecto Manuel Gallego Jorreto e ofrece unha arquitectura actual adaptada ás necesidades dun museo do século XXI, que permite poñer en valor as colección atesourada e mostrala ao visitante nun novo discurso expositivo.

O museo amplía os seus espazos comprendendo a partir deste momento dúas sedes de acordo co establecido no seu Plan Museolóxico. Por unha banda, a Casa Gótica, que se define como sede administrativa e de xestión e, por outra, a sede de Praterías, como sede expositiva. Deste modo, o centro de Peregrinacións comeza unha nova etapa na súa traxectoria, un tempo no que impulsa o achegamento público ás coleccións histórico-artísticas empregando novos soportes.

Galería

  • O ministro de Cultura visita o Museo das Peregrinacións e de Santiago

  • O ministro de Cultura visita o Museo das Peregrinacións e de Santiago

  • O ministro de Cultura visita o Museo das Peregrinacións e de Santiago

  • O ministro de Cultura visita o Museo das Peregrinacións e de Santiago

  • O ministro de Cultura visita o Museo das Peregrinacións e de Santiago

5 de novembro do 2015 Apertura da nova sede do Museo das Peregrinacións e de Santiago

Museo das Peregrinacións e de Santiago

 

A nova exposición permanente do Museo das Peregrinacións e de Santiago, no edificio do antigo Banco de España na Praza das Praterías, abre as súas portas ao público cun renovado proxecto museográfico, que inclúe novos contidos, incorpora máis de cincocentas pezas e complétase con dúas exposicións temporais. O Ministerio de Educación, Cultura e Deporte, titular do museo, e a Xunta de Galicia como órgano xestor, impulsaron este proxecto ao longo dos últimos anos, nesta nova sede rehabilitada polo Consorcio da Cidade de Santiago, segundo o proxecto de Manuel Gallego Jorreto.

O proxecto museográfico foi redactado por Gestión de Diseño S.L. sobre o programa expositivo elaborado polo equipo técnico do Museo, e executado por INTEGA Interiores Galicia S.L.

O sábado 7 de novembro é o día de apertura, en xornada de portas abertas que continuarán ata o día 15 inclusive. O público terá acceso gratuíto á exposición permanente, distribuída en 4 plantas e 3 grandes áreas temáticas: a peregrinación como fenómeno universal, a peregrinación e o Camiño de Santiago e a cidade de Santiago de Compostela.

O novo discurso expositivo establécese con vocación de resultar ameno, interesante e atractivo para un público diverso, cun deseño que consegue un equilibrio entre a arquitectura do inmoble e a exposición das coleccións. A información ofrécese en diversos soportes: textual, gráfico, audiovisual e interactivo, aptos para distintos niveis e dificultade. Ademais, a nova exposición pretende ser accesible a todos os públicos, mediante a supresión de barreiras arquitectónicas ou a fabricación de cinco estacións táctiles deseñadas para público con discapacidade visual.

No novo discurso tamén se inclúen varias zonas de musealización especial denominadas “museo en acción”, que pretenden transmitir ao público diversos aspectos que forman parte do traballo interno do museo: pezas de recente adquisición, restauracións, traballos de investigación, etc, que proxectan a imaxe dun museo en constante evolución.

Ademais das salas que conforman a exposición permanente, o museo dispón no soto dun salón de actos e dunha sala polivalente (para a realización de actividades e exposicións temporais), así como unha pequena tenda, na planta baixa, onde os visitantes poderán adquirir os catálogos e publicacións do museo, así como diversos artigos de merchandising. Ademais, na terceira planta, o museo porá en marcha un servizo de cafetería nun espazo acristalado con perspectivas privilexiadas das torres da catedral.

Galería

  • Apertura da nova sede do Museo das Peregrinacións e de Santiago

  • Apertura da nova sede do Museo das Peregrinacións e de Santiago

  • Apertura da nova sede do Museo das Peregrinacións e de Santiago

23 de xuño do 2015 O Museo das Peregrinacións e de Santiago obtén este ano o certificado de Excelencia de Tripadvisor

Museo das Peregrinacións e de Santiago

TripAdvisor é a maior web de viaxes do mundo. Proporciona consellos de viaxeiros e unha ampla variedade de opcións de viaxes e a súa planificación. Os sitios coa marca TripAdvisor conforman a comunidade de viaxes máis grande do mundo, que alcanza a cifra de 340 millóns de visitantes únicos ao mes, ademais de contar con máis de 225 millóns de opinións e comentarios.

TripAdvisor concede o Certificado de Excelencia a aqueles aloxamentos, restaurantes e puntos visitables das cidades que reciben constantemente opinións excelentes de viaxeiros.

Este prestixioso certificado, xa no seu quinto aniversario, recoñece o papel dos establecementos que obtiveron con regularidade boas opinións dos viaxeiros, polo que, como no caso do Museo das Peregrinacións e de Santiago, outorga un valor engadido que avala a calidade da súa oferta cultural.

23 de outubro do 2014 Visita do embaixador de Xapón en España ao Museo das Peregrinacións e de Santiago

Museo das Peregrinacións e de Santiago

Con motivo da viaxe oficial a Galicia do embaixador de Xapón en España, Kazuhiko Koshikawa, realizou unha visita ao Museo das Peregrinacións e de Santiago acompañado da súa esposa e do seu primeiro secretario.

Nesta visita de máis de unha hora, amosou un grande interese polo museo, especialmente pola sala dedicada á construción da catedral e á lenda da Traslatio e do achado dos restos do Apóstolo Santiago no monte Libredón, pola simboloxía e utilización da cuncha, polo acibeche e a súa constitución e uso e pola iconografía de Santiago. Así mesmo, percorreron de vagar a exposición temporal das iconas rusas, asombrados polos detalles da súa execución e temática.

A relación do Museo das Peregrinacións con Xapón vén xa dende 1999, ano no que o museo acolleu unha exposición temporal sobre o Camiño de Kumano, quizais o máis importante dese país e cun gran paralelismo histórico co Camiño de Santiago, froito do cal as dúas cidades están irmanadas. Dende esa data xa visitaran o museo o por entón embaixador do Xapón, e ao longo destes anos diferentes cargos políticos, turísicos e económicos da Prefeitura Gubernamental de Wakayama, moitas veces con gallo de establecer relaciones e intercambios culturales. O museo tivo ocasión de volver presentar nas súas instalacións en 2008 unha segunda exposición sobre unha parte deste importante camiño:"Totsukawamura, Corazón do camiño", con fotografías realizadas polo fotógrafo Luis Ocaña.

Esta constante e estreita colaboración entre a rexión xaponesa de Wakayama e o Museo das Peregrinacións e de Santiago é a que atrapou o interese polo coñecemento deste centro do actual embaixador do país nipón.

14 de xuño do 2014 55 fotografías pertencentes ás coleccións do Museo das Peregrinacións e de Santiago son as pezas principais dunha exposición no castelo Läckö de Suecia

Museo das Peregrinacións e de Santiago

Imaxe da exposición no castelo Läckö
Imaxe da exposición no castelo Läckö

O 14 de xuño inaugurose en Suecia a exposición: STEG FÖR STEG – en utställning om vandring, frihet och pilgrimsfärd: Paso a paso - unha exposición sobre o camiño, a liberdade e a peregrinación. Trátase dunha colaboración entre a Consellería de Cultura, Educación e Ordenación Universitaria a través do Museo das Peregrinacións e de Santiago coa Fundación do Castelo Läckö (Stiftelsen Lacko Slott) no que será un dos acontecementos culturais máis destacados do ano por ser a exposición principal desta institución. O Castelo Läckö de Suecia é un dos centros turísticos e culturais máis importante do país e que máis visitantes recibe.

As pezas que compoñen na súa totalidade a exposición son 55 fotografías de diferentes camiños de peregrinación do mundo pertencentes ás coleccións do Museo das Peregrinacións e de Santiago: Camiño de Santiago; Peregrinación á Xerusalén negra en Lalibela, Etiopía; Peregrinación á cidade santa de Ajmer, India;  Peregrinación ao santuario de Qoyllur Ritì en Perú; Camiño de Kumano en Xapón e Peregrinación xitana en Francia a Saintes Maries de la Mer.  Os fotógrafos que están presentes na mostra son: Fernando Moleres, Nacho Castellano, Christoph Lingg, Luísa Rubines, Olga Seoane Paulus, Eduardo Almajano e Jacobo Remuñá así como fotografías de diferentes autores que ilustran o Camiño de Kumano doadas polo Departamento Gubernamental de Wakayama (Xapón),

Trátase do segundo ano consecutivo en que o Museo das Peregrinacións e de Santiago colabora co departamento de turismo da municipalidade de Skara-Suecia xa que, a mediados do mes de xuño do 2012,  viaxou unha das exposicións fotográficas deste museo, Camiñar, camiñamos..., fotografías de Adolfo Enriquez que ilustran o Camiño de Santiago e que estivo exposta durante todo o verán na sala de exposicións do concello de Skara.

Esta colaboración do Museo das Peregrinacións e de Santiago obedece ao recoñecemento do labor que ven facendo desde hai anos atrás esta institución museística na conservación e difusión do fenómeno da Peregrinación no mundo e en particular, da Peregrinación xacobea.

Galería

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

9 de abril do 2014 Inaugúrase no Museo das Peregrinacións e de Santiago unha exposición fotográfica sobre o Camiño de San Francisco

Museo das Peregrinacións e de Santiago

Este venres 11 de abril ás 19 h na Casa Gótica inaugurarase a exposición "Il Cammino di Francesco. Fotografía se Steve McCurry". A mostra, que reúne medio cento de fotografías de Steve McCurry, poderase visitar ata finais de maio.

Con motivo da celebración do VIII Centenario da Peregrinación de San Francisco de Asís a Compostela, a Axencia de Turismo de Galicia, a través da S.A. de Xestión do Plan Xacobeo, organizou, xunto coa Comune di Rieti (Lazio, Italia), unha exposición sobre o itinerario vital e espiritual do santo de Asís titulada “Il cammino di Francesco. Fotografías de Steve McCurry”, composta por 50 fotografías de 70x100 cm. Steve McCurry é un dos fotoxornalistas actuais máis recoñecidos polas súas reportaxes de guerra e os seus traballos para National Geographic.

O camiño de San Francisco é un camino de peregrinación que recrea as experiencias deste no Val de Rieti, preto de Asís e La Verna, unha das súas tres patrias. Desenvólvese a través dun fermoso val, rodeado de outeiros e montañas, que era por entón coñecido como o Val Sagrado. San Francisco escolleu este val como escenario de tres episodios fundamentais da súa vida: en 1223 montou o primeiro Belén no Nadal dese ano, realizado en arxila, para explicar como foi o nacemento de Cristo; o mesmo ano escribiu a Regra definitiva da Orde e, probablemente, compuxo o himno Cántico das Criaturas. O Camiño denominado de San Francisco é o camiño que o Espírito realiza neste Val Sagrado a través deses camiños e carreiros que San Francisco amaba.

A exposición será inaugurada por Nava Castro Domínguez, directora de Turismo de Galicia; Rafael Sánchez Bargiela, xerente do Xacobeo; Mª Carmen Martínez Ínsua, directora xeral do Patrimonio Cultural; e Bieito Pérez Outeiriño, director do Museo das Peregrinacións e de Santiago. Como representantes das institucións italianas asistirán á inauguración Eugenio Patané, presidente da  Commissione Cultura, da rexión de Lazio; Giorgio Piccirillo, presidente de I Cammini di Francesco; o alcalde de Rieri, Simone Petrangeli; a responsable do Progetto ABC (Arte Bellezza Cultura), Giovanna Pugliese; e o concelleiro de cultura de Rieti, Diego di Paolo.

20 de decembro do 2013 Presentado o libro "O acibeche e a súa cultura na Península Ibérica"

Museo das Peregrinacións e de Santiago

O 19 de decembro, Ángel Luis Cardín Toraño presentou no Museo das Peregrinacións e de Santiago un magnífico traballo sobre o acibeche en distintos territorios peninsulares, centrándose sobre todo en Asturias e en Galicia. O libro, editado por Xerais, leva por título O acibeche e a súa cultura na Península Ibérica, e aborda numerosos aspectos relacionados con este preciado material: a extracción, o comercio da materia en bruto e o traballo dos artesáns nos distintos obradoiros. Salienta os talleres composteláns ao longo de varios séculos e a evolución seguida polo traballo do acibeche ata a recuperación experimentada a partir do século XIX. Todo isto estúdao cunha visión ampla que lle dá o feito de coñecer o que sucede noutras áreas xeográficas extrapeninsulares.

O lugar elixido para esta presentación non podía ser outro que o Museo das Peregrinacións e de Santiago, xa que algúns dos fondos que forman a súa colección de acibeches están incluídos nesta publicación. A colección de acibeches do museo é significativa e amosa a importancia dun dos gremios composteláns mais importantes da cidade que cubría as necesidades  dos peregrinos e tamén das institucións vencelladas, tanto co culto como coa atención daqueles: o gremio de acibecheiros.

Galería

  • Presentado o libro

  • Presentado o libro

  • Presentado o libro