Museos de Galicia

Novas

18 de marzo do 2015 A rede de museos de xestión autonómica chega aos 277.113 visitantes en 2014

A rede de museos xestionados pola Consellería de Cultura, Educación e Ordenación Universitaria, que incorporou no último ano o Parque Arqueolóxico da Cultura Castrexa, en San Cibrao de Las (Ourense), incrementou en 2014 o número global de visitantes. As visitas recibidas durante o pasado ano polo Museo de Belas Artes da Coruña, o Centro Galego de Arte Contemporánea (CGAC), o Museo Massó de Bueu, o Museo das Peregrinacións e de Santiago, o Museo Arqueolóxico Provincial de Ourense, o Museo Etnolóxico de Ribadavia, o Museo do Mar de Galicia, en Vigo, o Parque Arqueolóxico da Arte Rupestre de Campo Lameiro (Pontevedra), o museo e o castro de Viladonga, no concello de Castro de Rei (Lugo), o Parque Etnográfico do Cebreiro, o Museo Pedagóxico de Galicia (Mupega), en Santiago de Compostela, e mais o Parque Arqueolóxico da Cultura Castrexa –que abriu as súas portas hai un ano– ascenderon a un total de 277.113, fronte aos 257.232 do ano 2013.

Na súa comparecencia sobre o balance da actividade realizada polos museos de xestión autonómica, o secretario xeral de Cultura, Anxo Lorenzo, destacou esta tarde no Parlamento de Galicia o importante aumento dalgúns dos centros. É o caso, segundo explicou, cunha taxa de crecemento do 158,9%, do Museo Arqueolóxico Provincial de Ourense (MAPOu), que en 2014 levou a cabo dúas exposicións de referencia sobre a figura do Padre Feijoo e a obra de Parada Justel; así como do Museo Etnolóxico de Ribadavia e do Museo Massó de Bueu, que incrementaron os seus visitantes nun 60,2% e nun 18,6%, respectivamente, con 9.946 e 18.932 visitantes o pasado ano.

Os museos, na rede
Para favorecer o achegamento da cidadanía aos museos e as súas coleccións, o secretario xeral tamén recordou a recente posta en marcha da páxina web museos.xunta.es, un novo espazo na rede dedicado aos museos galegos co que a Consellería de Cultura e Educación pon os seus esforzos ao servizo da difusión dos centros museísticos e das súas coleccións. A través deste novo portal, desenvolvido coa colaboración da Axencia para a Modernización Tecnolóxica de Galicia, pódese acceder a unha información detallada da rede de museos de Galicia e, particularmente, dos museos xestionados pola consellería, cos seus contidos, pezas relevantes e a axenda de actividades e exposicións programadas nestes centros.

Un “labor esencial” a prol do patrimonio cultural
Na opinión de Anxo Lorenzo, “a rede de museos e centros expositivos propios realiza un labor esencial de difusión do noso patrimonio cultural, que se materializa na práctica por medio de distintas áreas de acción que abranguen, ademais da xestión do servizo de visitas, a actividade in¬vestigadora, o desenvolvemento de actividades de dinamización específica e a propia pro¬gramación expositiva ou artística destes centros”.

Próximas exposicións
Mostra deste labor é a actividade dinamizadora e expositiva que vén desenvolvendo cada un dos centros da rede de museos e que detallou Anxo Lorenzo na súa intervención, ademais de anunciar algúns dos próximos proxectos. Na capital de Galicia, o Museo das Peregrinacións e de Santiago inaugurará o vindeiro 27 de marzo unha exposición baseada na obra de José Guitián, con fotografías realizadas durante máis de sete décadas que son hoxe verdadeiras iconas e documentos de referencia para poder interpretar a evolución histórica de Santiago.

Esta mesma semana, o xoves 19 de marzo, o CGAC tamén inaugurará a exposición ‘Tectónica’, de Manuel Vilariño, que constitúe unha prospección no universo creativo e poético do artista coruñés, cunha perspectiva que lle permitirá ao público aproximarse á súa obra desde unha visión inédita.

Tamén na cidade compostelá, Anxo Lorenzo referiuse ao labor desenvolvido polo Museo Centro Gaiás, onde, ademais, da recentemente inaugurada exposición ‘Camiño. A orixe’, nos últimos meses se puideron visitar dúas importantes exposicións como foron Auga Doce e CineGalicia 25; “dúas mostras que, xunto co resto da actividade cultural desenvolvida no Gaiás, contribuíron a facer del un polo de dinamización cultural para Galicia”.

“En definitiva –dixo–, a través desta rede de equipamentos tratamos de executar unha actuación de difusión do patrimonio cultural que resulte inclusiva, vertebradora e atractiva para a sociedade galega, co fin de facer dos nosos museos auténticos centros de relación cidadá coa cultura”.

6 de marzo do 2015 O Museo de Belas Artes ofrece unha ampla bibliografía sobre a vida e a obra de Picasso

Museo de Belas Artes da Coruña

Con motivo da actual exposición temporal "O primeiro Picasso. A Coruña 2015", o Museo de Belas Artes da Coruña lembra que a súa biblioteca conta cunha amplia bibliografía sobre a vida e a obra de Picasso, que se achega aos 140 títulos.

Na seguinte ligazón pódese acceder ao catálogo para realizar a busca. Todas as publicacións se poden consultar na propia biblioteca segundo as condicións establecidas na web do museo.

De entre todas elas, o Museo de Belas Artes realizou unha pequena selección daquelas publicacións onde aparece obra da súa etapa coruñesa, ou onde se fala da súa vida neses anos, que se pode consultar nun taboleiro en Pinterest.

20 de febreiro do 2015 Felipe Arias é nomeado Chairego de Honra 2015

Museo do Castro de Viladonga

O sábado 21 de febreiro celebrarase no Museo do Castro de Viladonga un acto de homenaxe a Felipe Arias, o ex director do museo. A irmandade Manuel María e a asociación Xermolos recoñéceno como Chairego de Honra 2015. O acto, que se inicia ás 12 do mediodía, inclúe unha mesa redonda na que participarán Xosé Manuel Carballo, presidente da Asociación de Amigos do Museo do Castro de Viladonga; Tonina Gay, presidenta do Club Valle Inclán de Lugo; Felipe Senén, Coordinador de Amigos do Museo Arqueolóxico da Coruña e Elena Varela Arias, directora do Museo do Castro de Viladonga. Moderará a mesa Xulio Xiz. No acto actuarán os músicos chairegos Mini e Mero, e pecharase cun xantar de irmandade.

2 de febreiro do 2015 O Museo Arqueolóxico de Ourense participa no Gothic Ivories Project

Museo Arqueolóxico Provincial de Ourense

O Museo Arqueolóxico Provincial de Ourense asinou en xaneiro de 2014 un interesante convenio de colaboración co The Courtauld Institute of Art para participar no Gothic Ivories Project.

Este proxecto, dirixido polo profesor John Lowden e pola doutora Catherine Yvard, ten por obxecto reunir e difundir os marfís góticos dispersos por todos os museos e coleccións do mundo nun catálogo electrónico que permite buscas por iconografía, procedencia, orixe, restauracións e substitucións, falsificacións modernas, e outros aspectos relevantes para o coñecemento da evoraría gótica.

Un ano despois danse a coñecer os resultados deste fantástico proxecto.A peza coa que o Museo Arqueolóxico participa é unha delicada folla de díptico de orixe francés, do século XIV, na que aparece representada a Virxe Gloriosa entre dous anxos turiferarios baixo unha arcada gótica.

Pódese consultar na web do proxecto a ficha completa así como as fotografías de detalle deste fermoso marfil.

16 de xaneiro do 2015 Convocadas as bolsas de formación en materia de patrimonio moble galego

Hoxe ábrese o prazo para presentarse ás bolsas de formación en materia de patrimonio moble galego, convocadas pola Orde do 23 de decembro de 2014 publicada onte no Diario Oficial de Galicia. Ata o 16 de febreiro é posible enviar a solicitude para optar a unha das oito bolsas de formación convocadas. Cada bolsa ten unha duración de seis meses de duración e un importe de 5.750 €.

A finalidade das bolsas é proporcionar unha formación teórico-práctica que, engadida á formación académica, contribúa a completar o currículo académico. O persoal bolseiro realizará a súa actividade en diversos museos propios e xestionados pola Consellería de Cultura, Educación e Ordenación Universitaria. Serán tutelados, dirixidos e coordenados polos servizos técnicos da Dirección Xeral do Patrimonio Cultural.  A formación comprende unha parte teórica e unha parte práctica que será impartida por persoal técnico da Dirección Xeral do Patrimonio Cultural.

As persoas solicitantes de bolsas de documentación de fondos de patrimonio moble deben ter unha licenciatura universitaria ou equivalente, segundo o espazo europeo de educación superior, con formación académica nalgunha das materias que se relacionan a continuación: Historia ou Antropoloxía, Historia da Arte, Arqueoloxía.

No caso das solicitantes de bolsas de restauración de fondos de museos e coleccións visitables de Galicia, deben ter unha diplomatura universitaria en conservación e restauración de bens culturais ou equivalente, nas especialidades de Arqueoloxía, Pintura ou Escultura.

Toda a información relacionada pode consultarse na sección "Bolsas e  subvencións" desta web.  

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23