Museos de Galicia

Novas

15 de novembro do 2013 Inauguración da mostra ‘A restauración no museo: criterios e intervencións no Museo Arqueolóxico Provincial de Ourense’

Museo Arqueolóxico Provincial de Ourense

O conselleiro de Cultura, Educación e Ordenación Universitaria, Xesús Vazquez Abad, inaugurou hoxe a exposición ‘A restauración no museo: criterios e intervencións no Museo Arqueolóxico Provincial de Ourense’. Vázquez Abad asegurou que esta mostra é “unha porta aberta á actividade museística dun ente vivo, o resultado dun traballo tecnicamente elevadísimo que permite que a mensaxe emitida nun pasado xa remoto se manteña na plenitude do seu pulo”.

Esta exposición ten como obxectivo impulsar e potenciar o coñecemento dos bens patrimoniais nas súas diferentes facianas e procesos ao que son sometidos desde a súa entrada no centro museístico. Segundo o titular de Cultura e Educación, “grazas ao traballo dos restauradores, os museos manteñense como templos da memoria, de formas de sentir e de ver, na que como unha viaxe retrospectiva lévanos ao momento no que as mans do artista deron por rematada cada unha destas achegas”.

Asemade, Vázquez Abad incidiu en que “tras as técnicas e os criterios de restauración hai profesionais extraordinariamente cualificados que se encargan de desenvolver formas cada vez máis sutís e eficaces, para conseguir deste xeito manter vivo ese alento que nos transmite a obra de arte”. Finalmente, o conselleiro felicitou ao Museo Arqueolóxico polo seu gran labor e animou a todos os galegos a coñecer o traballo deste centro.

Ao acto, asistiron ademais o xerente da Fundación Novacaixagalicia, Pedro Otero, e o director Museo Arqueolóxico Provincial de Ourense, Xulio Rodríguez. A mostra presentada hoxe poderá visitarse ata o 9 de febreiro do 2014 no Centro Social Novacaixagalicia.

O museo dende dentro
Esta mostra pretende ser algo máis do que unha exposición dos seus fondos. Os labores de conservación e restauración dalgunhas das súas pezas encontraranse por primeira vez co público galego (radiografías, analíticas, tratamentos, etc) e achegarán aos cidadáns o arduo e curioso traballo que se agocha tras as portas do Museo Arqueolóxico Provincial de Ourense.

A mostra está composta por máis de vinte esculturas de madeira policromada, un retablo e unha táboa pintada cunha crucifixión –atribuída a Ambrosius Benson-. A exposición abrangue un amplo ábano cronolóxico, no que se encontran representados os diferentes movementos artísticos, e na que figuran mestres escultores da talla de Juan de Juni ou Mateo de Prado.

Os paneis informativos permiten coñecer a metodoloxía utilizada durante os procesos de escudo e intervención, así como os resultados acadados en cada unha das pezas, explicando os criterios de conservación, as diferentes técnicas e procesos de restauración que se empregaron e, finalmente, os resultados visibles nas obras unha vez rematados o proceso. 

18 de outubro do 2013 Xesús Vázquez Abad inaugura as obras de reforma do Museo Valle-Inclán da Pobra do Caramiñal que pon en valor a obra e figura do escritor

O conselleiro de Cultura, Educación e Ordenación Universitaria, Xesús Vázquez Abad, inaugurou hoxe a sede do Museo Valle- Inclán na Pobra do Caramiñal, un centro no que se acaba de facer unha importante reforma á que a Consellería ten achegado máis de 26.000 euros para ofrecer á cidadanía un renovado itinerario pola obra como a figura do escritor arousán.

Previamente o conselleiro asinou un protocolo de colaboración cos alcaldes dos concellos da Pobra e de Vilanova de Arousa, Issac Maceiras Rivas e Gonzalo Durán Hermida, respectivamente, para a promoción e dinamización da obra de Ramón María del Valle- Inclán nos dous espazos dedicados ao escritor en ambas localidades. A delegada da Xunta na provincia da Coruña, Belén do Campo estivo presente tanto na firma do convenio como no percorrido realizado polo edifico recen reformado.

Reapertura do museo
O conselleiro felicitou ao Concello da Pobra do Caramiñal polo traballo desenvolvido para reformar o museo, grazas ao que se solucionou o deterioro propio dun edificio de máis de 30 anos, instalouse un circuíto de sensores e cámaras de seguridade, e renovouse o discurso museístico realizado a través da redistribución dos contidos.

A sede do Museo Valle-Inclán- ubicado na Torre de Bermúdez, edificio vinculado coa familia e as vivencias do literato- ofrecerá unha renovada exhibición de fondos, entre os que destaca a incorporación dunha serie de mobles orixinais da época procedentes de enderezos familiares da residencia do escritor e da súa familia, xunto con algúns obxectos persoais. Fondos como a librería, o despacho ou o dormitorio acompañaranse de fotografías nas que o escritor está facendo uso deles.

Cómpre recordar que entre as reformas realizadas neste edificio de máis de trinta anos, pola Consellería, a través da secretaría xeral de Cultura e a dirección xeral de Patrimonio, inclúense diversas obras e a instalación de sistema de control e vixilancia. Asemade nas melloras realizadas inclúense unha redistribución dos contidos do museo e a doazón por parte da familia de novos obxectos persoais tanto do escritor como da súa dona, a actriz Josefina Blanco, e o dormitorio da residencia familiar en Madrid.

Protocolo de colaboración
No relativo ao protocolo de colaboración asinado hoxe entre a Consellería e os concellos de Arousa e a Pobra ademais de ter como obxectivo traballar na difusión da obra de Ramón del Valle-Inclán e poñer en valor a súa figura así como a consolidación deste museo. No documento tamén queda reflectido o compromiso para a realización da Semana da Cultura de Vilanova de Arousa e das Xornadas de Homenaxe a Valle-Inclán da Pobra do Caramiñal, precisamente este último celebra desde o pasado día 11 e ata finais de novembro, a XV edición destas xornadas, que incorporan no programa diversos espectáculos teatrais, exposicións, relatorios e concertos. 

18 de outubro do 2013 Cultura e Educación convida aos escolares a participar nunha exposición temporal no Museo de Viladonga coas súas fotografías sobre o castro

Museo do Castro de Viladonga

O Museo do Castro de Viladonga, dependente da Consellería de Cultura, Educación e Ordenación Universitaria, invita aos alumnos que o visitan a dar forma a unha exposición temporal de fotografía coas imaxes que tomen do castro e do propio centro.

Esta iniciativa está dirixida aos alumnos e alumnas de terceiro ciclo de Ensino Primario e de Ensino Secundario que visitan o centro, e dará como resultado unha exposición temporal e itinerante, a disposición dos centros educativos que a soliciten.

Ao longo do curso escolar o Museo recibe numerosas visitas de grupos escolares. Con esta actividade, trátase de ampliar a participación dos rapaces e rapazas, que non serán meros espectadores senón que plasmarán a súa visión sobre o xacemento arqueolóxico e o museo en fotografías que poderán optar a formar parte da mostra.

A participación estará aberta ata o mes de maio e os grupos escolares deben solicitar a inscrición no mesmo momento en que se fai a visita, que ten unha duración aproximada de unha hora e pode completarse coa proxección de vídeos de entre 12 e 15 minutos cada un.

Unha vez rematada a visita, poderanse facer as fotografías, ben individualmente, por grupos de alumnos ou por aula. O colexio ou instituto debe realizar a selección das imaxes que considera que deben integrarse na exposición e remitilas ao museo.

O museo resérvase a competencia para facer unha segunda selección no caso de que a afluencia de fotografías exceda da cantidade que se poida utilizar, podendo quedar o resto en reserva para futuras exposicións ou para outras actividades de difusión que se realicen en colaboración cos centros escolares.

11 de outubro do 2013 A Xunta comezará a construción do Museo da Romanización no cuartel de San Fernando de Lugo cando a realidade económica o permita

A directora xeral do Patrimonio Cultural, María Carmen Martínez Insua, asegurou hoxe no Parlamento que “a Xunta de Galicia comezará a construción do Museo da Romanización no Cuartel de San Fernando de Lugo cando a realidade económica permita asegurar a viabilidade do proxecto”. A directora xeral subliñou que “en ningún caso se renuncia ao desenvolvemento do plan, o que facemos é aprazalo ata que o contexto financeiro e orzamentario mellore”.

Martínez Insua recordou que desde o primeiro momento a intención da Consellería de Cultura e Educación foi “apostar por este proxecto”, e por ese motivo “realizáronse e financiáronse no Cuartel diversas actuacións de estudo, conservación e escavación arqueolóxica, así como a redacción do correspondente Proxecto de rehabilitación para a instalación do Centro de Interpretación e Museo da Romanización”.

A construción do Museo da Romanización implica unha inversión estimada de 13 millóns de euros, aos que habería que sumar 250.000 euros anuais aproximadamente de gastos de xestión. Segundo a directora xeral, “no actual contexto orzamentario a Xunta ten a obriga de administrar os limitados recursos cos que conta con responsabilidade”. “Esta é unha decisión prudente e realista, que se adapta ademais á normativa vixente que estima que o plan de viabilidade deberá supeditarse ao cumprimento das esixencias do principio de sustentabilidade financeira”, engadiu.

Na súa intervención na comisión parlamentaria, a directora xeral explicou que “a situación económica fai inviable que Patrimonio poida adicar na actualidade a cantidade de recursos necesarios para a execución deste centro da Rede Galega de Patrimonio Arqueolóxico, e polo tanto consideremos que neste momento os orzamentos deben atender as necesidades dos diversos bens culturais da nosa Comunidade”.

13 de setembro do 2013 Espazos Sonoros propón novos diálogos entre a música e o patrimonio cultural

Museo Etnolóxico de Ribadavia

O festival trasládase á comarca do Ribeiro, en Ourense, e á Terra Chá, en Lugo, para ofrecer dous concertos en diálogo co patrimonio cultural no que se enmarcan os seus escenarios: un do guitarrista Marcos Teira no Museo Etnolóxico de Ribadavia e outro do grupo de percusión Odaiko no Castro de Viladonga.

Esta fin de semana o festival Espazos Sonoros 2013 da Consellería de Cultura, Educación e Ordenación Universitaria trasládase á comarca do Ribeiro, en Ourense, e á Terra Chá, en Lugo, para ofrecer dous concertos en diálogo co patrimonio cultural no que se enmarcan os seus escenarios: un do guitarrista Marcos Teira no Museo Etnolóxico de Ribadavia e outro do grupo de percusión Odaiko no Castro de Viladonga.

O sábado 14, a xornada estará dedicada ao coñecemento da cultura vitivinícola do Ribeiro e do barrio xudeu de Ribadavia. Está prevista a visita a unha adega pertencente á D.O. do Ribeiro, onde o público poderá participar activamente no proceso da vendima: a colleita da uva na viña e as primeiras operacións para a elaboración do viño, dende que esta chega á adega. Posteriormente, terá lugar un xantar organizado por xentileza da D.O. Ribeiro, nunha fermosa paraxe da comarca e, posteriormente, unha visita guiada ao barrio xudeu de Ribadavia.

A xornada rematará cun concerto do guitarrista Marcos Teira, que presentará, ás 20.00 horas, no patio do Museo Etnolóxico de Ribadavia, o seu novo disco, Flamenco Translations, no que adapta músicas de todo o mundo á linguaxe do flamenco. Cunha longa traxectoria como guitarrista, Marcos Teira colaborou con sólidas formacións e artistas coma Marful, Narf, Uxía, Rodrigo Romaní ou Budiño.

Ao día seguinte, o domingo 15, no Castro de Viladonga terá lugar, ás 20.00 horas, un concerto do grupo de percusión Odaiko, unha formación integrada por catro percusionistas cunha fonda formación e traxectoria concertística, que se converteu, desde a súa presentación en Holanda en 2002, nun dos grupos galegos de percusión máis innovadores e con máis proxección internacional.

No seu programa de concerto, Odaiko presenta un repertorio variado no que as percusións contemporáneas, como marimbas ou vibráfono e percusións electrónicas coma o xylosynth, se fusionan con elementos da música tradicional galega, entre os que atopamos tamén apeiros de labranza, que foron empregados como instrumentos para marcar o ritmo das tarefas e alegrar os longos días de traballo no campo.

O concerto porá remate a unha tarde de visita guiada por un dos máis destacados vestixios arqueolóxicos da cultura castrexa, o Castro de Viladonga, e polas instalacións do seu museo.

Aberto o prazo de inscrición para vindeiras actividades

O festival Espazos Sonoros mantén aberto o prazo de inscrición para o obradoiro infantil ‘Contrúe o teu propio tubo de órgano’, que terá lugar o sábado 21 de setembro no mosteiro de San Rosendo de Celanova e tamén para a rolda paisaxística de Ourense do domingo 22.

Estas dúas actividades contan con un número de prazas limitadas, polo que para poder participar é precisa a inscrición previa a través do enderezo electrónico actividades@espazossonoros.org.

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23