Museos de Galicia

Novas

13 de setembro do 2013 Espazos Sonoros propón novos diálogos entre a música e o patrimonio cultural

Museo Etnolóxico de Ribadavia

O festival trasládase á comarca do Ribeiro, en Ourense, e á Terra Chá, en Lugo, para ofrecer dous concertos en diálogo co patrimonio cultural no que se enmarcan os seus escenarios: un do guitarrista Marcos Teira no Museo Etnolóxico de Ribadavia e outro do grupo de percusión Odaiko no Castro de Viladonga.

Esta fin de semana o festival Espazos Sonoros 2013 da Consellería de Cultura, Educación e Ordenación Universitaria trasládase á comarca do Ribeiro, en Ourense, e á Terra Chá, en Lugo, para ofrecer dous concertos en diálogo co patrimonio cultural no que se enmarcan os seus escenarios: un do guitarrista Marcos Teira no Museo Etnolóxico de Ribadavia e outro do grupo de percusión Odaiko no Castro de Viladonga.

O sábado 14, a xornada estará dedicada ao coñecemento da cultura vitivinícola do Ribeiro e do barrio xudeu de Ribadavia. Está prevista a visita a unha adega pertencente á D.O. do Ribeiro, onde o público poderá participar activamente no proceso da vendima: a colleita da uva na viña e as primeiras operacións para a elaboración do viño, dende que esta chega á adega. Posteriormente, terá lugar un xantar organizado por xentileza da D.O. Ribeiro, nunha fermosa paraxe da comarca e, posteriormente, unha visita guiada ao barrio xudeu de Ribadavia.

A xornada rematará cun concerto do guitarrista Marcos Teira, que presentará, ás 20.00 horas, no patio do Museo Etnolóxico de Ribadavia, o seu novo disco, Flamenco Translations, no que adapta músicas de todo o mundo á linguaxe do flamenco. Cunha longa traxectoria como guitarrista, Marcos Teira colaborou con sólidas formacións e artistas coma Marful, Narf, Uxía, Rodrigo Romaní ou Budiño.

Ao día seguinte, o domingo 15, no Castro de Viladonga terá lugar, ás 20.00 horas, un concerto do grupo de percusión Odaiko, unha formación integrada por catro percusionistas cunha fonda formación e traxectoria concertística, que se converteu, desde a súa presentación en Holanda en 2002, nun dos grupos galegos de percusión máis innovadores e con máis proxección internacional.

No seu programa de concerto, Odaiko presenta un repertorio variado no que as percusións contemporáneas, como marimbas ou vibráfono e percusións electrónicas coma o xylosynth, se fusionan con elementos da música tradicional galega, entre os que atopamos tamén apeiros de labranza, que foron empregados como instrumentos para marcar o ritmo das tarefas e alegrar os longos días de traballo no campo.

O concerto porá remate a unha tarde de visita guiada por un dos máis destacados vestixios arqueolóxicos da cultura castrexa, o Castro de Viladonga, e polas instalacións do seu museo.

Aberto o prazo de inscrición para vindeiras actividades

O festival Espazos Sonoros mantén aberto o prazo de inscrición para o obradoiro infantil ‘Contrúe o teu propio tubo de órgano’, que terá lugar o sábado 21 de setembro no mosteiro de San Rosendo de Celanova e tamén para a rolda paisaxística de Ourense do domingo 22.

Estas dúas actividades contan con un número de prazas limitadas, polo que para poder participar é precisa a inscrición previa a través do enderezo electrónico actividades@espazossonoros.org.

25 de agosto do 2013 Editado un novo número da revista científica e de divulgación cultural 'CROA'

Museo do Castro de Viladonga

No vixésimo terceiro volume do boletín da Asociación de Amigos do Museo do Castro de Viladonga destacan as actuacións máis recentes para a conservación do xacemento e información de interese sobre outros elementos do patrimonio cultural lucense.

A Consellería de Cultura, Educación e Ordenación Universitaria edita o vixésimo terceiro número de 'CROA', unha publicación para a expresión científica e divulgación cultural do Museo do Castro de Viladonga, dependente da Dirección Xeral do Patrimonio Cultural.

Neste novo volume, a revista afonda nas actividades do museo e da Asociación de Amigos do Museo do Castro de Viladonga durante o período de setembro de 2012 a abril de 2013, así como nos traballos para o acondicionamento e a consolidación arqueolóxica do castro realizados en 2012. Así mesmo, fai un repaso ás actuacións levadas a cabo desde que comezaron na década dos setenta e información sobre as últimas novidades da biblioteca do Museo do Castro de Viladonga.

Ademais, este novo número inclúe artigos referentes ao recente achado dunha nova ara procedente dun ámbito rural do convento lucense de Outeiro de Rei e reflexións arredor da posta en valor da investigación no castro de Fazouro de Foz. Así mesmo, a revista recolle unha aproximación ao estudo do poboamento nas terras do Baixo Navia (Asturias) e á historia do santuario da Nosa Señora dos Remedios, así como ao xurdimento das feiras de As San Lucas de Mondoñedo.

O presente e o futuro da consolidación do Museo das Peregrinacións e de Santiago, dependente da Consellería de Cultura e Educación, tamén están presentes neste vixésimo terceiro número de 'CROA', dispoñible en formato electrónico no web do museo (www.aaviladonga.es).

Difusión dos traballos de conservación e investigación
O boletín 'CROA', promovido no ano 1991 pola Asociación de Amigos do propio museo, conta na actualidade coa colaboración dun amplo número de especialistas de diversos ámbitos como a historia, a arqueoloxía, a etnografía, a antropoloxía, o patrimonio cultural ou a museoloxía, entre outros. Así, a revista, que comezou a súa andaina como boletín de comunicación fundamentalmente interna da asociación, pasou a intercambiarse con máis de duascentas publicacións doutras tantas entidades e asociacións científicas e culturais.

Ademais, o Museo vén editando, desde 1987, unha serie de publicacións eventuais que comprenden guías do Museo, trípticos e folletos de man de exposicións, catálogos de seccións temáticas, e materiais moi diversos de difusión e divulgación para chegar a toda a sociedade.

2 de agosto do 2013 O Museo Massó ofrece unha nova mostra sobre Antonio Massó

Museo Massó

'Antonio Massó en cor marfil' amosará ata o 31 de outubro os pirogravados dun dos irmáns fundadores da fábrica de conservas que acolle hoxe as dependencias deste centro museístico dependente da Consellería.

A Consellería de Cultura, Educación e Ordenación Universitaria, representada no seu secretario xeral de Cultura, Anxo Lorenzo, inaugurou esta tarde a exposición temporal Antonio Massó en cor marfil, que permanecerá no Museo Massó de Bueu ata o 31 de outubro. No acto tamén participaron o fillo do propio Antonio Massó, Antonio Massó de Ariza e a directora do Museo, Covadonga López de Prado Nistal, que exerce ademais de comisaria da exposición.

Esta mostra forma parte da ampla programación cultural que ofrece o Museo Massó, que neste verán reforza o seu horario abrindo ata as 12 da noite os días 3, 7 e 16 de agosto. Antonio Massó en cor marfil, que se integra dentro do percorrido da colección permanente, reúne diversas obras do empresario Antonio Massó nas que se evidencia a súa faceta creativa co emprego da técnica do pirogravado. Ademais, recoñece o seu importante labor na difusión da colección do Museo, chegando a deseñar o ex-libris da biblioteca familiar.

Na súa intervención, Anxo Lorenzo sinalou que "esta exposición presenta unha perspectiva múltiple da implicación cultural dos emprendedores da industria vinculada ao mar: por unha banda, o labor de mecenado de artistas de alta calidade; por outra, a propia vertente artística familiar; e, finalmente, ese importantísimo labor de compilación da familia Massó".

Artista do marfil

Antonio Massó García (Vigo, 1906-1988) formou parte da terceira xeración da saga catalá dos Massó, que se estableceu en Bueu (Pontevedra) a principios do século XIX para dedicarse á salgadura e conserva de peixe. A súa inclinación artística levouno a facerse cargo da imaxe e a publicidade da fábrica de conservas Massó Hermanos e a desenvolver unha gran destreza no scrimshaw ("talla en marfil"), unha arte moi antiga desempeñada tradicionalmente polos cazadores de baleas. Así, na súa madurez o empresario cultivou a meticulosa técnica do pirogravado, que consiste en gravar por medio dun buril eléctrico que queima a superficie sobre a que se traballa, servíndose do marfil dos cairos de cachalote procedentes das factorías baleeiras da familia para reproducir escenas navais e de caza da balea. Deste xeito, tal e como destacou o secretario xeral de Cultura, "Antonio Massó recolleu dunha maneira natural os propios materiais da súa industria baleeira e, nun labor que ten algo tamén de artesán, transformou os cairos dos cachalotes en pequenas obras de arte".

'Memoria cultural dunha época'

A sede do Museo Massó sitúase no edificio máis antigo da fábrica de conservas Massó Hermanos. Ten a súa orixe na colección que os irmáns Massó mostraron ao público dende 1932 no antigo Museo Marítimo, e que pasou a converterse no ano 2002 –xa co nome de Museo Massó– nunha institución de titularidade pública pertencente á Xunta de Galicia.
A exposición permanente reúne unha importante cantidade de libros imprimidos entre os séculos XV e XIX, instrumentos náuticos, cartografía, documentos e maquetas de embarcacións históricas; na que "conviven unha memoria industrial pero tamén a memoria cultural dunha época", segundo apuntou Anxo Lorenzo. Neste senso, o secretario xeral de Cultura tamén sinalou na súa intervención que "estas achegas contribúen a achegarlle á cidadanía a mostra dun pasado recente que mudou a sociedade da zona, e que marcou unha nova época de desenvolvemento industrial que cómpre documentar, estudar e coñecer".

25 de xullo do 2013 O Museo Massó ofrece unha ampla programación de obradoiros para este verán

Museo Massó

A consellería de Cultura, Educación e Ordenación Universitaria aposta unha vez máis pola difusión da excepcional colección relacionada coa náutica albergada no Museo Massó de Bueu. Faino a través dunha ampla programación estival de obradoiros, que se desenvolverán ó longo de diversas mañás de xullo e agosto no propio edificio do Museo (Avda. Montero Ríos, s/n. Bueu). As actividades, que duran entorno a unha hora, están dirixidas a rapazas e rapaces de ata 14 anos e será precisa unha inscrición previa chamando ao teléfono 986 321 838 (de luns a venres, de 10.00h a 20.00h).

Programación

As actividades arrancan o día 26 de xullo cun taller sobre a tradición da caza das baleas, que se repetirá en xornadas posteriores. Ó longo da programación os participantes poderán asistir a O que o mar non quere, no que aprenderán a liberar o mar de residuos contaminantes; Ex-libris mariñeiros, unha visita á exposición temporal sobre Antonio Massó; e Sentir o Museo, unha viaxe sensorial para coñecer o edificio dunha forma diferente. A duración dos obradoiros esténdese ata o 22 de agosto, no que se volverá a ofrecer O que o mar non quere como peche deste verán cultural.

Pódese consultar a programación completa no seguinte enlace:

http://museomasso.blogspot.com.es/2013_07_01_archive.html

18 de xullo do 2013 O CGAC presenta a primeira restrospectiva do artista Víctor Grippo en España

A Consellería de Cultura, Educación e Ordenación Universitaria presentou esta mañá no Centro Galego de Arte Contemporánea (CGAC) a exposición ‘transformación’, a primeira colección individual do artista bonaerense Víctor Grippo en España, que poderá visitarse en Santiago de Compostela ata o próximo 20 de outubro de 2013.

A mostra, que será inaugurada hoxe ás 20:00 horas polo responsable de Cultura e Educación, Xesús Vázquez Abad, conduce o visitante polos "aspectos centrais da obra de Grippo", segundo afirmou o secretario xeral de Cultura, Anxo Lorenzo, na rolda de prensa de presentación, na que estivo acompañado polo director do CGAC, Miguel von Hafe; pola comisaria da exposición, Alicia Chillida; e pola viúva e filla do artista, Nidia Olmos e Paulina Vera, respectivamente.

O secretario xeral de Cultura explicou na rolda de prensa que "Víctor Grippo desenvolveu unha obra moi suxestiva, hoxe amplamente recoñecida mesmo fóra do contexto artístico latinoamericano que, desde os anos setenta ata a súa morte xa iniciado este novo século, foi construíndose desde unha serie de principios que impregnan a súa práctica artística". "Esta idea de transformación que se nos propón na mostra que presentamos –dixo–, esta relación entre vida cotiá, ciencia e arte, é un dos eixes vertebradores da súa obra". De maneira que a exposición que acolle o CGAC "condúcenos por aspectos centrais da obra de Grippo e mergúllanos nesa reflexión sobre o que o cotián agocha nun segundo plano", afirmou.

Obradoiros de lecer arredor da mostra

Como actividades complementarias á exposición, o CGAC programará obradoiros de lecer de improvisación teatral, de creación vocal etc. co obxectivo de que os nenos e nenas se poidan achegar á enerxía que conteñen os alimentos, á relación entre arte e vida cotiá ou á idea de transformación presente nas pezas da exposición de Grippo.

Primeira individual en España de Grippo

En palabras da propia comisaria da exposición, Alicia Chillida, esta mostra constitúe "a primeira individual en España dun artista contemporáneo fundamental". Víctor Grippo (Junín, 1936 – Buenos Aires, 2002) é unha das figuras máis destacadas da arte arxentina da segunda metade do século XX, que conta cun recoñecemento internacional debido ás súas incorporacións á arte conceptual.

Químico de formación, este creador centra a súa obra en achegar a arte, a ciencia e a vida cotiá, rompendo as barreiras que existen a miúdo entre estes ámbitos. Así, a "transformación" que dá nome a esta colección retrospectiva do seu traballo é un dos eixos da súa produción, que se inspira no enigmático mundo da alquimia.

Vinculado ao porteño Centro de Arte y Comunicación (CAyC) e ao Grupo de los Trece –versión local bonaerense da arte conceptual–, Grippo achega unha arte ética xurdida no cargado clima político do Buenos Aires dos anos 70, reivindicando o valor do seu país e da súa propia cultura. O seu traballo, influenciado polas vangardas históricas, asóciase á arte povera ("arte pobre"), tomando materias primas cotiáns, como a pataca, para tentar sacralizar obxectos en aparencia intranscendentes.

A súa obra, que se poderá visitar no CGAC ata o 20 de outubro, atópase representada en innumerables coleccións públicas e privadas, como o Museo Nacional de Bellas Artes de Buenos Aires, o Inhotim Centro de Arte Comtemporânea de Belo Horizonte (Brazil), ou o Museum of Modern Art (MoMA) de Nova York.

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21