Museos de Galicia

Novas

30 de marzo do 2017 O Ministerio de Educación, Cultura e Deporte convoca un proceso selectivo para o corpo facultativo de conservadores de Museos

O Ministerio de Educación, Cultura e Deporte vén de convocar un proceso selectivo para cubrir 31 prazas do Corpo Facultativo de Conservadores de Museos, Código 0305, polo sistema de ingreso libre e 4 prazas polo sistema de promoción interna das comprendidas nos anexos I e VII do Real Decreto 105/2016, do 18 de marzo, nos Ministerios de Educación, Cultura e Deporte e Defensa.

As prazas correspondentes ao sistema de ingreso libre son para a súa cobertura no Ministerio de Educación, Cultura e Deporte e no Ministerio de Defensa.

As persoas aspirantes deberán estar en posesión do título de Doutor, Licenciado, Enxeñeiro, Arquitecto ou Grao ou ter cumpridas as condicións para obtelo na data de finalización do prazo de presentación de solicitudes.

Pode obterse toda a información consultando a resolución publicada no BOE o xoves 30 de marzo de 2017.

28 de marzo do 2017 Unha guía reúne por vez primeira o legado das casas-museo Valle-Inclán de Vilanova de Arousa e da Pobra do Caramiñal

Presentación da Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal
Presentación da Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal

As casas-museo Valle-Inclán de Vilanova de Arousa e mais da Pobra do Caramiñal contan por vez primeira cunha guía conxunta, que tamén incorpora as rutas valleinclanianas nestes dous municipios. A publicación, promovida pola Consellería de Cultura e Educación, foi presentada o día 28 en rolda de prensa polo secretario xeral de Cultura, Anxo Lorenzo; polo alcalde e o tenente de alcalde de Vilanova de Arousa, Gonzalo Durán e Javier Tourís, respectivamente, pola directora do museo local, Patricia César Conde, e mais polo director do museo pobrense, Antonio González Millán.

"A suma de esforzos e o traballo coordinado entre as dúas casas-museo, os seus respectivos concellos e a Xunta de Galicia son a base na que se sustenta esta guía", explicou Anxo Lorenzo, quen recordou que a publicación nace ao abeiro das iniciativas promovidas co gallo do 150 aniversario do nacemento de Valle-Inclán, unha celebración colectiva que tivo lugar en 2016 e á que se lle dá continuidade tamén neste ano.

Segundo declarou o secretario xeral, "as dúas casas-museo teñen nesta guía un material valioso co que dar a coñecer a riqueza que albergan as súas coleccións, a historia dos propios mobles e das pezas nos que se exhiben e os edificios que lles dan acubillo".

Esta información, que se ilustra con numerosas imaxes das pezas e dos espazos comentados, acompáñase dunha parte de contidos dedicados ás rutas valleinclanianas nos concellos de Vilanova de Arousa e da Pobra do Caramiñal, o que fai das guías "un manual completo e de grande utilidade para todas aquelas persoas que queiran descubrir a Valle-Inclán tanto a través da súa obra como tamén dos seus espazos vitais".

"Coido –dixo– que era necesario ofrecerlle á cidadanía unha guía coma esta, na que se poñen en diálogo as dúas casas-museo galegas dedicadas a Valle-Inclán e os seus respectivos municipios, tan presentes na obra do escritor e, polo tanto, fundamentais para afondar nas claves da súa vida e mais do seu valioso legado literario".

A guía, na Libraría Institucional da Xunta de Galicia

Ademais dos visitantes das casas-museos, as persoas interesadas tamén poden conseguir a Guía valleinclaniana solicitándoa a través do portal da Libraría Institucional da Xunta de Galicia.

Galería

  • Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal

    Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal

  • Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal

    Guía valleinclaniana: Casa Museo Valle-Inclán, Vilanova de Arousa; Museo Valle-Inclán, A Pobra do Caramiñal

27 de marzo do 2017 Maxia no Castro de Viladonga

Museo do Castro de Viladonga

O sábado 25 de marzo o Museo do Castro de Viladonga iniciou a súa programación de actividades do ano 2017 coa actuación do mago ilusionista Óscar Bello, que presentou unha maxia “moderna e tecnolóxica”. Na súa actuación mesturou os clásicos xogos de barallas coa maxia máis moderna, a “Tecnomaxia”, onde os protagonistas son os móbiles e a tecnoloxía.

Óscar Bello é natural da parroquia de San Xián de Mos do Concello de Castro de Rei, e aínda que a súa actividade profesional non é a maxia, adícase a ela con entusiasmo, de feito o público foi moi participativo en cada un dos xogos, e a diversión e as risas estiveron presentes en todo o espectáculo.

 

Galería

  • Imaxe da actividade

  • Imaxe da actividade

  • Imaxe da actividade

24 de marzo do 2017 Presentación dun novo programa educativo no Museo de Belas Artes da Coruña

Museo de Belas Artes da Coruña

"Un Museo en movemento" propón unha actividade pensada para dar a coñecer a colección de arte do Museo a colectivos con diversidade funcional.

O mércores 22 de marzo presentouse no Salón do Museo de Belas Artes da Coruña un novo programa educativo que o Museo e a súa Asociación de Amigos ofrecen a colectivos con necesidades especiais. Os participantes foron Rocío Fraga Sáenz (Concelleira de Igualdade e Diversidade, Concello da Coruña), Ángeles Penas Truque (Directora do Museo de Belas Artes da Coruña), Pedro Vasco Conde (Presidente da Asociación de Amigos do Museo) e un representante de APEM (entidade colaboradora).

A Fundación EMALCSA da Coruña realizou a I Convocatoria de Axudas para favorecer a inclusión e a accesibilidade na vida cultural, Cultura Inclusiva, dirixida a apoiar entidades culturais que, en colaboración con entidades de persoas con minusvalía, presenten proxectos específicos que teñan algunha das finalidades indicadas nas bases.

No marco desta convocatoria, a Asociación de Amigos do Museo de Belas Artes da Coruña asinou un convenio coa Fundación para por en marcha un proxecto para favorecer unha cultura accesible e inclusiva, dirixido ás persoas e colectivos da cidade con dificultades para a súa plena integración social.

Con dito fin e coa supervisión e o aval do Museo de Belas Artes, propúxose a actividade Un Museo en movemento, pensada para dar a coñecer a colección de arte do Museo as devanditas entidades e colectivos, sen ter que desprazarse ata o mesmo. Deste xeito, quérese facilitar a accesibilidade aos espazos e actividades culturais, fomentar a participación na creación artística, partindo de que todos deben ter a posibilidade e o dereito de desenvolverse mediante a arte.

Ao mesmo tempo, o Museo, lonxe de converterse nun elemento marxinal que se contempla respectuosamente desde lonxe, abriría unha vía de traballo que enriquece e facilita a relación co público, ao achegar a súa colección a aquelas persoas que, por causas diversas, non tiveran posibilidade de desprazarse ás súas instalacións.

Visitas – obradoiro:
Deseñáronse unhas visitas - obradoiros para desenvolver nos distintos centros ou locais sociais, onde os membros ou usuarios farán un achegamento a unha selección de obras de arte, a través de dúas fases de traballo:

  • Proxección dun itinerario virtual a través da colección, apoiado polas explicacións dun especialista en historia da arte.
  • Obradoiro sinxelo relacionado cos contidos expostos, que reforzará a explicación á vez que fomentará o exercicio das súas aptitudes creativas.

Duración: hora e media como máximo

Equipo de traballo: un historiador da arte, unha educadora social e unha monitora do taller.

Infraestrutura e materiais necesarios: todos os equipos e instrumental necesario será aportado desde a organización, necesitando unicamente unha sala con mesas de traballo e un acceso próximo de auga, así como unha parede na que proxectar a presentación.

Datas: ata o 30 de xuño de 2017, de martes a venres, en horario de mañá ou tarde, segundo as necesidades da entidade solicitante.

Actividade de carácter gratuíto.

Para recibir información ao respecto, no teléfono 881 881 700 ou no email: amigosmbac@gmail.com, e solicitar día e hora. Uns días antes da visita, o coordinador porase en contacto para concretar os termos da mesma e adecualos ao perfil do usuario.

15 de marzo do 2017 Inaugúrase no Museo das Peregrinacións e de Santiago a exposición "Na procura do pasado"

Museo das Peregrinacións e de Santiago

A exposición “Na procura do pasado” recupera o labor das principais figuras que impulsaron a  arqueoloxía na provincia de Ourense dende o século XIX ata a pasada década dos anos 70. Foi inaugurada o 14 de marzo no Museo das Peregrinacións e de Santiago o polo secretario xeral de Cultura, Anxo Lorenzo; pola directora xeral do Patrimonio Cultural, María Carmen Martínez Insua; polo alcalde de Ourense, Jesús Vázquez; polo director do museo, Bieito Outeiriño, e polo director do Museo Arqueolóxico Provincial de Ourense (MAPOu), Xulio Rodríguez.

A mostra, pretende dar unha visión das principais figuras que levaron a cabo a práctica da arqueoloxía desde finais do século XIX ata os anos 70 do século XX. Neste labor destacan os nomes de Marcelo Macías, Arturo Vázquez Núñez, Manuel Díez Sanjurjo, Florentino López Cuevillas, Xaquín Lorenzo Fernández, Xesús Ferro Couselo, Xesús Taboada Chivite, Conde Valvís, Rubén García Álvarez, Manuel Chamoso Lamas e Laureano Prieto, entre outros.

A exposición recolle fotografías destes pioneiros así como pezas arqueolóxicas directamente relacionadas coa súa actividade e que forman parte dos fondos do Museo Arqueolóxico Provincial de Ourense, como o guerreiro de Armeá, o sedente de Xinzo, a tábula de Castromao e o mosaico da Cigarrosa, entre outras.

A exposición é unha produción propia do Museo Arqueolóxico de Ourense, que, logo da súa exhibición na Sala de exposicións de Afundación en Ourense, agora itinera para transmitir ao maior público posible a importancia deste tema para toda a arqueoloxía galega.

“Na procura do pasado” poderá visitarse no Museo das Peregrinacións e de Santiago ata o próximo 28 de maio na sede da praza das Praterías.

 

Galería

  • Peza da exposición

  • Peza da exposición

  • Peza da exposición

  • Peza da exposición

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23