Museos de Galicia

Novas

14 de xaneiro do 2014 A Consellería de Cultura e Educación convoca oito bolsas de formación en materia de patrimonio moble galego

A Consellería de Cultura, Educación e Ordenación Universitaria destina 48.000 euros para a convocatoria de oito bolsas de formación en patrimonio moble en diferentes institucións do Sistema galego de museos e centros propios e xestionados pola Consellería. Deste xeito, o departamento dirixido por Xesús Vázquez Abad aposta tanto pola conservación, inventariodo, restauración e difusión dos bens culturais custodiados nestes centros, como polo fornecemento dunha formación teórico-práctica de calidade para os beneficiarios das bolsas, a través dunha convocatoria que se publica hoxe no 'Diario Oficial de Galicia' (http://www.xunta.es/dog/Publicados/2014/20140114/AnuncioG0164-030114-0001_gl.pdf).

A convocatoria destas bolsas potencia a formación inicial dos bolseiros, para que poidan afondar nas técnicas e consoliden as aptitudes necesarias que faciliten a súa inserción no mundo laboral. A súa finalidade é proporcionar unha formación teórico-práctica que, conxuntamente coa aprendizaxe académica, contribúa a completar o currículo profesional do futuro persoal técnico en materia de museos. Neste sentido, os bolseiros serán tutelados, dirixidos e coordinados por persoal dos servizos técnicos da Dirección Xeral do Patrimonio Cultural. As tarefas que van desenvolver son fundamentalmente as de inventario, catalogación e restauración.

A convocatoria está dirixida a persoas con formación académica en Historia, Historia da Arte e Arqueoloxía, así como a diplomados en Conservación e Restauración de Bens Culturais ou equivalente, nas especialidades de arqueoloxía, pintura ou escultura. As persoas interesadas poderán presentar as súas solicitudes desde mañá ata o vindeiro 14 de febreiro de 2014.

Estas axudas teñen unha duración de seis meses contados a partir da data de incorporación que estableza a Dirección Xeral do Patrimonio Cultural de acordo co centro de destino. As oito bolsas de formación adxudicaranse en réxime de concorrencia competitiva e de acordo cos principios de obxectividade e publicidade.

7 de xaneiro do 2014 Xesús Vázquez Abad visita as obras de acondicionamento da Casa Museo Rosalía de Castro

O conselleiro de Cultura, Educación e Ordenación Universitaria, Xesús Vázquez Abad, visitou hoxe a Casa Museo Rosalía de Castro, en Padrón, para comprobar o resultado das obras de acondicionamento. A Consellería, co cofinanciamento do Fondo Europeo de Desenvolvemento Rexional no marco do Programa operativo Feder Galicia 2007-2013, investiu un total de 200.000 euros para a rehabilitación da casa onde viviu Rosalía de Castro os derradeiros anos da súa vida.

Vázquez Abad afirmou que “o obxectivo desta intervención é impulsar o magnifico labor da Fundación Rosalía de Castro, posto que agora, tras a súa rehabilitación e acondicionamento, este centro museítico conta coas mellores condicións para continuar desenvolvendo actividades encamiñadas á ampliación do coñecemento e a difusión do legado de Rosalía de Castro”

As obras de rehabilitación da Casa da Matanza incluíron a eliminación de humidades, a instalación dun novo sistema de electricidade e iluminación, o acondicionamento da carpintaría exterior, a montaxe dun falso teito e a instalación dun sistema de seguridade e contraincendios.

O conselleiro animou a todas as galegas e galegos a achegarse este museo “para coñecer de primeira man a vida e obra da nosa poetisa máis famosa, recordada e honrada”. Vázquez Abad estivo acompañado polo secretario xeral de Cultura, Anxo Lorenzo; polo secretario xeral de Política Lingüística, Valentín García; e polo presidente da Fundación Rosalía de Castro, Anxo Angueira.

Casa da Matanza
En 1947 créase o padroado da Fundación Rosalía de Castro para recuperar a Casa da Matanza e convertela, en 1971, nun museo dedicado á memoria da escritora galega. A casa, onde residiu Rosalía ata a súa morte, conserva practicamente inalterada a súa estrutura orixinal que consta de dous andares.

Na planta baixa, denominada “O perfil dunha sombra”, o visitante pode apreciar a verdadeira dimensión desta emblemática figura da cultura galega e universal: a súa vida, o contorno que a rodeou e a relación do pobo galego coa figura da escritora. Na primeira planta, denominada “O seu”, proponse unha recreación da casa rural da época, entre labrega e fidalga. A casa está rodeada, ademais, por un espazo verde que recrea un xardín da época.

20 de decembro do 2013 Cultura e Educación pon en valor a obra de Urbano Lugrís a través do Museo de Belas Artes da Coruña

Museo de Belas Artes da Coruña

A Consellería de Cultura, Educación e Ordenación Universitaria, a través do Museo de Belas Artes da Coruña, colabora na posta en valor de Urbano Lugrís coa apertura dun novo espazo especificamente deseñado para situar de xeito permanente o mural ‘Vista da Coruña 1830’ que o artista galego realizou no ano 1959 na casa madrileña dos seus familiares, os Lugrís-Muñoyerro.

A imaxe permaneceu no domicilio ata finais dos oitenta, no que foi doada polos irmáns Lugrís Alonso-Muñoyerro ao Ministerio de Cultura, que acordou o seu traslado ao Museo de Belas Artes. Esta institución museística foi a responsable da súa restauración, de xeito que o seu estado de conservación actual da peza pode cualificarse de moi bo. A obra reviste unha especial importancia ao tratarse dun dos poucos murais que se conservan en coleccións públicas e que vai a estar exposto dun xeito permanente.

‘Vista da Coruña 1830’
A obra, cunhas dimensións de cento vinte e un por douscentos vinte centímetros e realizada en temple sobre xeso, representa unha vista fabulada e en formato panorámico da cidade da Coruña, co aspecto que esta idealmente tería no ano 1830. A perspectiva urbana que se nos presenta corresponde á fachada portuaria, resaltando de forma onírica os elementos máis representativos: a Torre de Hércules ao fondo de cor rosa, a cidade vella con casas xeométricas de distintas cores, e a baía co Castelo de Santo Antón e, na súa contorna, distintas embarcacións.

20 de decembro do 2013 Cultura e Educación inaugura no Mupega a mostra temporal '1970- 1990. Aquel tempo da E.X.B.'

Museo Pedagóxico de Galicia (Mupega)

A Consellería de Cultura, Educación e Ordenación Universitaria, inaugurou hoxe o Museo Pedagóxico de Galicia (Mupega) a exposición temporal “1970- 1990. Aquel tempo da EXB”. Á inauguración da devandita mostra acudiu o secretario xeral técnico, Jesús Oitavén, que estivo acompañado polo director do centro museístico, Emilio Castro.

20 de decembro do 2013 Presentado o libro "O acibeche e a súa cultura na Península Ibérica"

Museo das Peregrinacións e de Santiago

O 19 de decembro, Ángel Luis Cardín Toraño presentou no Museo das Peregrinacións e de Santiago un magnífico traballo sobre o acibeche en distintos territorios peninsulares, centrándose sobre todo en Asturias e en Galicia. O libro, editado por Xerais, leva por título O acibeche e a súa cultura na Península Ibérica, e aborda numerosos aspectos relacionados con este preciado material: a extracción, o comercio da materia en bruto e o traballo dos artesáns nos distintos obradoiros. Salienta os talleres composteláns ao longo de varios séculos e a evolución seguida polo traballo do acibeche ata a recuperación experimentada a partir do século XIX. Todo isto estúdao cunha visión ampla que lle dá o feito de coñecer o que sucede noutras áreas xeográficas extrapeninsulares.

O lugar elixido para esta presentación non podía ser outro que o Museo das Peregrinacións e de Santiago, xa que algúns dos fondos que forman a súa colección de acibeches están incluídos nesta publicación. A colección de acibeches do museo é significativa e amosa a importancia dun dos gremios composteláns mais importantes da cidade que cubría as necesidades  dos peregrinos e tamén das institucións vencelladas, tanto co culto como coa atención daqueles: o gremio de acibecheiros.

Galería

  • Presentado o libro

  • Presentado o libro

  • Presentado o libro

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23