Museos de Galicia

Novas

26 de abril do 2014 Cultura e Educación convida a celebrar no Gaiás o ‘Día dos museos’ con actividades de balde para toda a familia

A Consellería de Cultura, Educación e Ordenación Universitaria convida a celebrar o vindeiro 18 de maio no Gaiás o ‘Día Internacional dos Museos’ cunha xornada de portas abertas con actividades únicas, divertidas e de balde para toda a familia.

Baixo o lema ‘Vínculos creados polas coleccións dos museos’, a Cidade da Cultura de Galicia únese á celebración do ‘Día Internacional dos Museos’, que desde 1977 se organiza en todo o mundo para poñer en valor o papel destas institucións na sociedade.

Será no Museo Centro Gaiás, que celebrará desde as 11 ata as 20 horas unha xornada de portas abertas arredor da auga doce, protagonista da mostra actualmente en exposición, e co patrocinio da Fundación Aquae. Deste xeito, ademais das visitas guiadas á mostra e unha edición especial das familiares ‘Os Rescatadores de Auga Doce’, o Museo acollerá de forma ininterrompida obradoiros artísticos e creativos, contacontos, xogos e experimentos científicos para aprender dunha forma divertida.

Música e ciencia
Durante todo o día e de forma continuada, o Museo Centro Gaiás converterase nun gran laboratorio e todos os visitantes en destacados científicos. A través do ‘Circuíto da Auga’, grandes e pequenos poderán fabricar xeo e neve, converterán dous líquidos nun sólido, aprenderán a descontaminar a auga e moitas actividades máis nas que descubrir o valor dun elemento indispensable para a vida como é a auga doce.

A ciencia non está está disputada coa arte e así o demostra o ‘Aquofono’, un innovador instrumento musical de percusión co que gozarán grandes e pequenos a través das súas fantasías musicais únicas, efémeras e irrepetibles. Ao longo do día e desde ás 11:30 horas haberá unha actuación de 15 minutos cada media hora, cun aforo de 30 persoas en cada quenda.

Os máis pequenos terán tamén o seu propio espazo multisensorial: ‘As formas da auga’, no que poderán interactuar con diferentes texturas e tamaños. A actividade conta con nove pases de 20 minutos (11:30, 12:15, 13:00, 13:45, 16:30, 17:15, 18:00, 18:45 e 19:30 horas) e é preciso reservar previamente en www.cidadedacultura.org.

Obradoiros plásticos
Para os máis creativos, o Museo Centro Gaiás presenta ‘A viaxe dunha pompa’, un divertido obradoiro no que nenos a partir de 8 anos aprenderán a crear pompas de xabón ao tempo que coñecen dunha forma lúdica a presenza da auga nos seres vivos, e ‘Barro+Auga doce: arxila!’, no que crear figuras de arxila e aprender a decoralas con diferentes técnicas primitivas.

E para os nenos de entre 3 e 8 anos, a opción é ‘Augarte!’, coa que os participantes se trasladarán á prehistoria creando un mural de arte rupestre.

As tres actividades contarán con nove quendas (11.30h, 12.15h, 13.00h, 13.45h, 16.30h, 17.15h, 18.00h, 18.45h e 19.30h) e, aínda que son de balde como todas as actividades, o límite de aforo (25 prazas) fai que sexa necesario inscribirse previamente en www.cidadedacultura.org.

Contacontos
Para ter un día redondo e despois de tanta actividade, toda a familia poderá gozar coa selección de contos ‘Auga Miúda’, un espectáculo de narración oral con contos clásicos, contemporáneos e de creación propia protagonizados por fontes, pozos, ríos, pingas… e interpretados por bonecos, franelógrafos, láminas e efectos sonoros. Auga Miúda conta con seis pases de 30 minutos: 11:30, 12:30, 13:30, 17:00, 18:00 e 19:00 horas.

Visitas regulares e familiares
A actividade do Museo Centro Gaiás complétase neste Día dos Museos con catro pases especiais para dúas das actividades relacionadas coa exposición ‘Auga Doce’. Deste xeito, as persoas que queiran coñecer a exposición dunha forma máis específica poden inscribirse de balde en www.cidadedacultura.org. a calquera das catro visitas guiadas que se organizarán o domingo 18 de maio: 11:00, 12:30, 17:00 e 18:30 horas.

Catro pases terán tamén as visitas familiares ‘Os Rescadores de Auga Doce’, unha actividade pensada para vivir en familia no que grandes e pequenos terán que axudar a salvar a auga do planeta ao longo da exposición e conseguir os emblemas que farán deles uns auténticos superheroes. A actividade tamén é de balde pero será preciso inscribirse a través de www.cidadedacultura.org para cada unha das quendas: 11:30, 13:30, 17:30 e 19:00 horas.

23 de abril do 2014 O Museo do Mar acolle o primeiro concerto de despedida da xira 'Acróbata'

A Consellería de Cultura, Educación e Ordenación Universitaria acollerá este venres 25 de abril o primeiro concerto da despedida da xira do disco ‘Acróbata’, un traballo de Fred Martins e Ugia Pedreira que desde 2011 ten percorrido os escenarios de Galicia, Brasil, Portugal e Inglaterra. As entradas, cun prezo de 12 euros, poden adquirirse no propio museo. O concerto será ás 20 horas.

‘Acróbata’ une os sons de dous lados do Atlántico, do Brasil de Fred Martins e da Galicia de Ugia Pedreira, este proxecto nacía da forza no encontro das dúas beiras do Atlántico. Un disco cheo de frescura que tivo nesta xira unha gran acollida de público e crítica, e que está conformado por composicións de ambos os autores e dalgúns colaboradores coma Germán Díaz, Marcos Suzano, Pablo ou Pedro Pascual.

22 de abril do 2014 Visitas teatralizadas ao Museo e ao Castro de Viladonga

Museo do Castro de Viladonga

Todos os martes do mes de maio ás 10:30 e ás 12:30 realizaranse visitas guiadas teatralizadas para alumnos de Educación Infantil e Primaria, cun máximo de 50 prazas para cada visita. As visitas guiadas serán realizadas por tres actores, que con distintas personaxes e cunha duración de aproximadamente unha hora, percorrerán o Museo e o Castro de Viladonga.

Comézase a actividade recibindo aos nenos no museo. A guía Xila, membro dun clan castrexo de Viladonga, dará a benvida dun xeito especial aos visitantes e dirixiraos á sala de audiovisuais. Alí terá lugar a proxección dun vídeo e ao rematar, aparecerán dous personaxes que contarán diversas lendas. Farase unha ruta teatralizada polas distintas salas acompañados de Xila e de Maximus, un romano peculiar que de forma lúdica contarán anécdotas dos elementos que alí se atopan.

Unha vez rematada a visita no museo, o grupo emprenderá viaxe ao Castro onde aparecerá Caelio, o xefe dun clan moi poderoso neste poboado, que explicará a súa forma de vida dende que o galo canta ata que ouvean os lobos.

16 de abril do 2014 O CGAC presenta unha exposición do arquitecto Alejandro de la Sota con motivo do centenario do seu nacemento

Centro Galego de Arte Contemporánea (CGAC)

Xesús Vázquez Abad na presentación das novas exposicións do CGAC
Xesús Vázquez Abad na presentación das novas exposicións do CGAC

O conselleiro de Cultura, Educación e Ordenación Universitaria, Xesús Vázquez Abad, presentou esta mañá as novas exposicións do Centro Galego de Arte Contemporánea (CGAC), un total de catro mostras que poderán visitarse no centro desde esta tarde, dedicadas á arquitectura de De la Sota, á Colección CGAC, á obra de Misha Bies Golas e á fotografía de Paco Rocha. Durante a rolda de prensa o conselleiro estivo acompañado polo secretario xeral de Cultura, Anxo Lorenzo; polo director do centro, Miguel von Hafe; e polo comisario da mostra de De la Sota, Moisés Puente. O acto de apertura das exposicións realizarase esta tarde ás 20 horas, coa presenza do secretario xeral e do director do CGAC.

Percorrido por De la Sota
A primeira planta do centro albergará ata o vindeiro 15 de xuño ‘100 anos con Alejandro de la Sota’, unha exposición conmemorativa organizada en colaboración coa Fundación Alejandro de la Sota e a Fundación ICO. A mostra realiza un extenso percorrido pola vida, a obra e o maxisterio do arquitecto pontevedrés, unha das figuras coa traxectoria máis relevante e intensa da historia recente da arquitectura española, que se adscribiu na posguerra española aos postulados da modernidade europea e americana en conexión coa obra de arquitectos como Mies van der Rohe.

A exposición, que conta con material biográfico, debuxos, bocetos, fotografías, maquetas e mobles deseñados por el e custodiados pola súa fundación, fai un percorrido pola súa traxectoria, parándose nas diferentes etapas da súa produción.

Alejandro de la Sota (Pontevedra, 1913- Madrid, 1996) está considerado como un dos mestres da arquitectura española do século XX, labor polo que recibiu numerosos premios nacionais de arquitectura e a Medalla de Ouro ao Mérito das Belas Artes. A súa obra, coñecida internacionalmente, foi obxecto de exposicións en lugares como a Universidade de Harvard ou a Architectural Association de Londres.

Profesor na Escuela Técnica Superior de Arquitectura de Madrid (ETSAM), a súa estela serviu de referencia a varias xeracións de arquitectos españois. Tras obter o título de arquitecto en 1941, traballou no Instituto Nacional de Colonización, unha etapa que culminou coa construción do pobo de Esquivel (Sevilla, 1952-1963) e a casa Arvesú (Madrid, 1953-1955). A partir de entón marca unha liña de traballo que precede ao Goberno Civil de Tarragona (1957-1964), considerada a súa obra mestra. Nesa prolífica época realiza ademais a súa obra máis recoñecida, o Ximnasio do Colexio Maravillas (Madrid, 1960-1962) considerado polo crítico británico William Curtis a obra máis salientable da arquitectura española contemporánea. Na década dos sesenta explora as posibilidades de novos materiais en obras como a Casa Varela en Vilalba (Madrid, 1964-1968); culminando a súa traxectoria nos oitenta co edificio de Correos e Telecomunicacións en León (1981-1984).

Actividade expositiva
Ademais, Vázquez Abad presentou hoxe outras tres mostras que poderán visitarse do 16 de abril ao 15 de xuño de 2014 neste espazo. Baixo o título ‘Col.’ e comisariada por Miguel von Hafe as salas da planta baixa do centro abriranse ao público cunha mostra sobre as últimas adquisicións da Colección CGAC centrada na obra de artistas galegos, nacionais, portugueses e latinoamericanos como François Bucher, Fermín Jiménez Landa, André Sousa, André Cepeda, Suso Fandiño, Vicente Arrieta, Usue Arrieta & Vicente Vázquez, Chelo Matesanz, Fabio Morais, Waltercio Caldas, Pamen Pereira, Patricia Esquivias, Loreto Martínez Troncoso, Gabriel Pericás e José Luis Seara.

Así mesmo, o CGAC acollerá ‘27 Negros’, do artista galego Misha Bies Golas, unha obra coral integrada por 27 monocromos negros composta por 27 artistas (Teo Soriano, Nacho Martín Silva, Carlos Maciá, Mikeldi Pérez Urkijo, Nuria Fuster, Alain Urrutia, Antonio González, Din Matamoro, Miren Doiz, Manuel Eirís, Julia Spínola, Guillermo Pfaff, José Manuel Vidal Vidal, Ion Macareno, Amaya González Reyes, Kiko Pérez, Xoan Torres, Juan López, Ian Waelder, Diego Vites, Jorge Varela, Dai KS, Kepa Garraza, Vítor Mejuto, Ángela Cuadra, Suso Fandiño e Mar Vicente).

Ademais, o centro albergará a exposición fotográfica ‘Naturalmente humano’, de Paco Rocha, comisariada por Christina Ferreiro.

11 de abril do 2014 Reapertura da sala de Sargadelos do Museo de Belas Artes da Coruña

Museo de Belas Artes da Coruña

O 11 de abril inaugurouse a reapertura da Sala Sargadelos do Museo de Belas Artes, coa presenza de Anxo Lorenzo, secretario xeral de Cultura da Consellaría de Cultura, Educación e Ordenación Universitaria e Ángeles Penas Truque, directora do museo.

O Museo de Belas Artes conta na área de exposición permanente cunha sala onde se exhibe a colección de louza de Sargadelos, a cal estivo pechada nos últimos tempos por motivos derivados de problemas estruturais no edificio.

Esta paréntese temporal foi aproveitada para revisar o discurso museográfico da sala, facendo segundo os casos unha reordenación ou unha nova selección de obxectos co fin de mostrar o amplo espectro de variedades tanto obxectuais como decorativas con que conta a colección do museo. Pero principalmente, dotouse á exposición dun soporte informativo necesario que facilita o seu seguimento no discorrer evolutivo da produción de Sargadelos. A información preséntase en distintos niveis e compleméntase con imaxes, gráficos ou mapas, ademais de novos soportes tecnolóxicos que se incorporarán nun breve espazo de tempo.

O percorrido na sala iníciase cunha información xeral distribuída en varios paneis, que contextualizan á Galicia socio-económica dunha época de cambio entre dous séculos (XVIII-XIX), na que Ibáñez encontra os factores idóneos para acometer o establecemento dun complexo industrial. Os paneis tamén ofrecen información da figura do fundador e do seu espírito emprendedor, capaz de marcar unha traxectoria ascendente dende unha actividade comercial e navieira ata a fabril, que desenvolverá no lugar de Sargadelos (Cervo, Lugo). Os últimos paneis esbozan a historia do complexo industrial dende a súa creación e evolución, ao longo das distintas etapas tanto administrativas coma técnicas, ata o seu peche definitivo en 1875. Por último un panel mostra como as marcas tamén sintetizan información sobre as distintas etapas da fábrica.

No interior das vitrinas continúa o discurso museográfico mostrando información en dous niveis distintos, que se corresponde respectivamente coas técnicas de decoración e dentro destas, coa diversidade de series decorativas que se foron desenvolvendo ao longo das distintas etapas de produción.

En breve engadirase ao discurso museográfico información particular sobre unha serie de pezas, á que se poderá acceder mediante unha pantalla táctil que incorporará efectos visuais en formato 3D.

Galería

  • Vista parcial da nova Sala de Sargadelos

    Vista parcial da nova Sala de Sargadelos

  • Vista parcial da nova Sala de Sargadelos

    Vista parcial da nova Sala de Sargadelos

  • Vista parcial da nova Sala de Sargadelos

    Vista parcial da nova Sala de Sargadelos

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23