Museos de Galicia

Novas

19 de xuño do 2014 Xesús Vázquez Abad inaugurou a exposición ‘Iván Tovar. Antológica’ no museo da Fundación Granell

O conselleiro de Cultura, Educación e Ordenación Universitaria, Xesús Vázquez Abad, inaugurou esta tarde a nova exposición de Iván Tovar ‘Antológica’ no museo da Fundación Granell. Esta mostra, a máis completa que se ten feito ata agora do pintor dominicano, está comisariada por Frank Pimentel e recolle o legado deste artista surrealista nun percorrido de setenta obras pola súa producción. Os cadros, que se exporán ata o próximo 5 de outubro na Granell, forman parte das mellores coleccións privadas do país latinoamericano e recollen diferentes etapas creativas da producción artística de Tovar.

A este acto asistiron, ademais do conselleiro, a directora do Museo Fundación Eugenio Granell, Natalia Fernández; a ministra conselleira do embaixador da República Dominicana, Yuredy Martínez; o agregado cultural da embaixada, Víctor Ramírez e os patrocinadores da mostra procedentes da República Dominicana.

O autor
Iván Tovar naceu na República Dominicana no ano 1942, país onde comezaría a forzar a súa personalidade artística ao inscribirse na escola Nacional de Santo Domingo para estudar Belas Artes. Porén, sería ao longo da súa estancia en París onde lograría alcanzar os seus maiores éxitos como artista, figurando coma un dos pintores contemporáneos máis importantes de toda Europa.

Durante a súa estadía na República Dominicana Tovar relacionouse con moitos artistas europeos emigrados entre os que destacaba Eugenio Granell, co que compartiu unha grande admiración mutua.

A obra de Tovar conforma un universo propio e onírico, onde establece unha nova realidade. A crítica actual ten cualificado o conxunto da súa obra baixo o concepto de neosurrealismo, debido a que as súas composicións representan un mundo extraordinariamente simbólico e persoal. Os seus traballos con diferentes técnicas, formatos e soportes, propoñen unha exploración detallada do desexo dos sentimentos humanos de tal modo que Tovar se converteu nun dos máximos representantes do surrealismo de toda a contemporaneidade.

14 de xuño do 2014 55 fotografías pertencentes ás coleccións do Museo das Peregrinacións e de Santiago son as pezas principais dunha exposición no castelo Läckö de Suecia

Museo das Peregrinacións e de Santiago

Imaxe da exposición no castelo Läckö
Imaxe da exposición no castelo Läckö

O 14 de xuño inaugurose en Suecia a exposición: STEG FÖR STEG – en utställning om vandring, frihet och pilgrimsfärd: Paso a paso - unha exposición sobre o camiño, a liberdade e a peregrinación. Trátase dunha colaboración entre a Consellería de Cultura, Educación e Ordenación Universitaria a través do Museo das Peregrinacións e de Santiago coa Fundación do Castelo Läckö (Stiftelsen Lacko Slott) no que será un dos acontecementos culturais máis destacados do ano por ser a exposición principal desta institución. O Castelo Läckö de Suecia é un dos centros turísticos e culturais máis importante do país e que máis visitantes recibe.

As pezas que compoñen na súa totalidade a exposición son 55 fotografías de diferentes camiños de peregrinación do mundo pertencentes ás coleccións do Museo das Peregrinacións e de Santiago: Camiño de Santiago; Peregrinación á Xerusalén negra en Lalibela, Etiopía; Peregrinación á cidade santa de Ajmer, India;  Peregrinación ao santuario de Qoyllur Ritì en Perú; Camiño de Kumano en Xapón e Peregrinación xitana en Francia a Saintes Maries de la Mer.  Os fotógrafos que están presentes na mostra son: Fernando Moleres, Nacho Castellano, Christoph Lingg, Luísa Rubines, Olga Seoane Paulus, Eduardo Almajano e Jacobo Remuñá así como fotografías de diferentes autores que ilustran o Camiño de Kumano doadas polo Departamento Gubernamental de Wakayama (Xapón),

Trátase do segundo ano consecutivo en que o Museo das Peregrinacións e de Santiago colabora co departamento de turismo da municipalidade de Skara-Suecia xa que, a mediados do mes de xuño do 2012,  viaxou unha das exposicións fotográficas deste museo, Camiñar, camiñamos..., fotografías de Adolfo Enriquez que ilustran o Camiño de Santiago e que estivo exposta durante todo o verán na sala de exposicións do concello de Skara.

Esta colaboración do Museo das Peregrinacións e de Santiago obedece ao recoñecemento do labor que ven facendo desde hai anos atrás esta institución museística na conservación e difusión do fenómeno da Peregrinación no mundo e en particular, da Peregrinación xacobea.

Galería

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

  • Imaxe da exposición no castelo Läckö

    Imaxe da exposición no castelo Läckö

13 de xuño do 2014 O Museo do Mar presenta a exposición ‘¿Acuicultura? descúbrela’

Museo do Mar de Galicia

O conselleiro de Cultura, Educación e Ordenación Universitaria, Xesús Vázquez Abad, e a conselleira de Medio Rural e do Mar, Rosa Quintana Carballo, participaron na tarde de hoxe na inauguración da mostra ‘¿Acuicultura? Descúbrela’ no Museo do Mar de Galicia en Vigo. A este acto tamén asistiron o secretario general de Pesca do Ministerio de Agricultura, Alimentación e Medio Ambiente e presidente da Fundación Observatorio Español de Acuicultura, Carlos Domínguez.

Xesús Vázquez afirmou que esta mostra “é o mellor modo de coñecer amenamente un sector de gran importancia para o desenvolvemento da nosa terra” e que o Museo do Mar de Galicia é a mellor institución “para comprender a vizosa vinculación que os galegos mantivemos onte, hoxe e sempre co mar”. Tamén aproveitou a súa intervención para convidar “aos vigueses e viguesas e a todos os galegos e galegas a que se acheguen ao Museo do Mar de Galicia a que participen das actividades e gocen visitando esta mostra” e para agradecer aos responsables e técnicos da Fundación Observatorio Español de Acuicultura (OESA) e do propio museo pola mostra que ofrecen.

A exposición ‘¿Acuicultura? Descúbrela’, impulsada pola Fundación Observatorio Español de Acuicultura do Ministerio de Agricultura, Alimentación e Medio Ambiente (MAGRAMA), en colaboración co Museo do Mar de Galicia, trata de acercar a sociedade a realidade e perspectiva dun sector estratéxico que xoga un papel fundamental no aporte a sociedade de proteínas de peixe.

A mostra repasa a historia da acuicultura, a producción deste sector en España, os cultivos mariños e continentais, o importante papel que xogan na alimentación e na gastronomía, a importancia da I+D+i, así como a relevancia desta actividade no desenvolvemento sostible e a cooperación internacional.

A través do recorrido didáctico polas salas do Museo do Mar de Galicia, o visitante pode coñecer a actividade pesqueira en todos os seus ámbitos, así como o seu desenvolvemento no devir da historia: a pesca, o marisqueo e a acuicultura, os métodos de conservación e os avances técnicos nas embarcacións ou na bioloxía mariña.

A acuicultura en Galicia
Nesta ocasión, e para reforzar a relación do contido da exposición co contexto local tamén se dedican tres módulos da exposición a aspectos relacionados coa acuicultura de Galicia, a súa historia, principais especies cultivadas, investigación, repoboación e Rede Natura na nosa comunidade autónoma.

Dentro da acuicultura galega o conselleiro afirmou que “un dos mellores exemplos posibles da importancia da acuicultura na nosa terra son, precisamente, as bateas nas que s cultivan tesouros culinarios como son o Mexillón”. O cultivo de Galicia é o máis importante de España e cobre preto do 90% da producción total do país. Ademais en Galicia tamén se cultivan peces mariños como o rodaballo ou ollamol, ou continentais como a troita pero polo que máis destaca a comunidade galega é polo seu extenso litoral areoso e por unhas mareas pronunciadas que permiten producir un elevado número de especies de moluscos nos parques de cultivo.

En Galicia tamén contamos cun amplo abanico de posibilidades de cara a incorporación de investigadores e grupos de investigación nos distintos centros que compoñen a súa rede de I+D+i, o que posibilita o desenvolvemento de novos productos, procesos e tecnoloxías. En proporción o seu tamaño territorial a nosa comunidade é a que conta cunha maior concentración de infraestructuras científicas e tecnolóxicas relacionadas coas ciencias do mar, a bioloxía, a enxeñaría e as industrias alimentarias. Ademais desta labor investigadora compre destacar a labor formativa que se está a realizar no Instituto Galego de Formación en Acuicultura (IGAFA).

O recorrido compleméntase con diversos acuarios que amosan algunhas das especies cultivadas en España como troita, esturión, robaliza, anguía, rodaballo, ollamol e linguado.

A mostra estará dispoñible no Museo do Mar de Galicia, en Vigo, ata mediados de setembro. Durante este período tamén se impartirán talleres infantís e actividades divulgativa se gastronómicas.

Pola súa parte, a conselleira do Medio Rural e do Mar, Rosa Quintana, fixo fincapé na vocación mariñeira dos galegos e na calidade dos nosos produtos. Así mesmo, destacou a capacidade de evolución e de adaptación aos tempos do sector pesqueiro.

Durante a súa intervención, a titular do Medio Rural e Mar recordou que, segundo un informe da FAO, para 2030 serán necesarios 37 millóns de toneladas de peixe adicionais para cubrir a demanda. Unha cifra que aquí, segundo a conselleira, non foi vista como unha ameaza, senón coma un reto. Unha oportunidade de negocio e de xeración de emprego que a nosa Comunidade aproveitou creando un novo sector, dedicado á acuicultura, forte e evolutivo.

Os datos avalan o liderado de Galicia como maior produtor nacional no que acuicultura se refire. Na Comunidade galega cultívase o 98% do mexillón e o 88% da produción española de rodaballo. Unhas cifras das que sentirse orgullosos e que poñen de manifesto o auxe do sector, sinalou Rosa Quintana.

19 de maio do 2014 Os centros museísticos xestionados por Cultura e Educación reciben máis de 7.500 visitas con motivo das actividades organizadas polo Día Internacional dos Museos

O Museo do Mar de Galicia
O Museo do Mar de Galicia

A Consellería de Cultura, Educación e Ordenación Universitaria celebra o gran éxito de público nos centros museísticos dependentes Consellería con motivo do Día Internacional dos Museos (18 de maio, DIM 2014). Máis de 7.500 persoas participaron nas actividades programadas con motivo desta festividade que comezaron a principios da semana pasada e que nalgúns centros continuarán ata finais deste mes.

Dende a Xunta de Galicia agradécese o esforzo realizado por directores e persoal dos museos na programación desta oferta cultural e didáctica que non fose posible sen a súa colaboración. Deste xeito, a través de numerosas actividades de gran calidade conseguiuse dinamizar as zonas de influencia de cada un destes espazos expositivos e achegar á cidadanía ás diferentes disciplinas nas que están especializados: a arqueoloxía, a etnoloxía, a cultura castrexa, o mar, as belas artes ou a pedagoxía, entre outras. Todas as actividades organizadas co gallo do DIM 2014 foron gratuítas.

Compostela
Na capital de Galicia as actividades comezaron xa da man do Centro Galego de Arte Contemporánea (CGAC) que tamén organizou, co gallo do Día das Letras Galegas, un ciclo de documentais de literatura dirixidos por Gonzalo Veloso os días 13, 14 e 15 de maio. Onte acolleu o concerto de Vertixe Sonora Ensemble dentro do ciclo ‘Música e Arte’, ademais das proxeccións do Ciclo do Thatcherismo. En total asistiron a estas actividades 793 visitantes.

O Museo das Peregrinacións e de Santiago programou durante a semana pasada numerosas actividades para escolares. Durante o día de onte foi visitado por 49 persoas, e esta semana espérase unha gran afluencia de público con motivo das xornadas de portas abertas que se celebrarán ata o vindeiro día 25, onde os visitantes poderán coñecer espazos do centro que normalmente non están abertos ao público.

No caso do Mupega, a actividade central celebrouse o pasado martes 13 cunha visita interxeracional do alumnado de 4º e 5º de Primaria do CEIP Igrexa-Calo e membros da Asociación Galega de Enfermos Leves de Alzhéimer (Agadea). Durante toda a semana pasada visitaron este museo máis de 250 persoas.

Ademais, estes tres centros participaron conxuntamente con outros museos da cidade nun proxecto no que se intercambiaron entre si unha obra das súas coleccións. Así, por exemplo, o CGAC acolleu unha peza do Museo das Peregrinacións, e prestou outra dos seus fondos ao MUPEGA, e en todos eles celebraron unha actividade con centros educativos na que o alumnado debía de recoñecer a ‘obra camuflada’.

O Museo Centro Gaiás, da Cidade da Cultura de Galicia, baixo o slogan ‘O día dos museos pode ser divertido’ sumouse ao DIM 2014 ofrecendo unha xornada de portas abertas para visitar a exposición ‘Auga Doce’ e todo un programa de actividades dirixidas a público familiar. En total mais de 1.100 persoas participaron nestas actividades culturais e lúdicas do Gaiás relacionadas co mundo da auga e co obxectivo de estimular a creatividade, especialmente dos mais cativos, e de concienciar da necesidade dun uso sostible deste recurso. O Museo ofreceu un total de 11 actividades con diferentes pases ao longo dunha xornada onde houbo visitas guiadas, obradoiros, xogos, contacontos, etc.

Literatura e arte
A Fundación Pública Galega Camilo José Cela organizou varias actividade dende principios da semana pasada. Entre elas destacan a proxección na súa sede en Padrón do documental ‘Nimbos de poesía’ sobre a vida e obra de Xosé María Díaz Castro; unha visita guiada o 17 de maio na que se analizou o manuscrito de ‘La colmena’, conservado na fundación; así como unha visita-obradoiro baseada no poema máis coñecido de Díaz Castro, ‘Penélope’. Ao longo da semana o público escolar poderá gozar tamén da visita-obradoiro ‘Xogos de letras’, con itinerarios específicos para cada nivel educativo. En total as actividades organizadas pola Fundación contaron coa participación de 370 persoas.

Pola súa parte, o Museo de Belas Artes da Coruña abriu o día 16 cun horario especial ata media noite, ofrecendo visitas teatralizadas á colección, e un concerto de ‘May Thai&Los Torino Rockets’. O propio día 18, ademais da xornada de portas abertas, celebrouse o concerto de ‘Atlantis Piano Dúo’, conformado por Sophia Hase e Eduardo Ponce. Deste xeito, na última semana visitaron o museo coruñés máis de 700 persoas, destacando o gran número de participantes nas diferentes visitas guiadas.

Arqueoloxía e etnoloxía
A conmemoración do DIM 2014 no Museo do Castro de Viladonga (Lugo) comezou o venres 16 co espectáculo ‘O Afiador Rodesindo da Barrosa’, a cargo de Pepe Penabade, e cunha conferencia-concerto en homenaxe a Xosé Mª Díaz Castro, con Mini e Mero. O sábado pola tarde celebrouse no xardín do museo unha actividade de recreación histórica, demostracións e xogos populares con participación do público, a cargo de diferentes asociacións. Tamén houbo unha actuación do grupo de música tradicional Os Valuros e outra do Mago Rafa. O museo lucense pechou a xornada uníndose á iniciativa da Noite Internacional dos Museos cunha visita nocturna ao castro. Deste xeito, arredor de 470 persoas participaron en todas estas actividades.
Pola súa banda o Museo Arqueolóxico de Ourense preparou visitas guiadas para grupos ao edificio do Pazo do Bispo do 13 ao 16 de maio. Ademais, o día 14 presentouse a peza do mes, o taboleiro de xogo de 'Aqvis Qverqvennis'; o 15 realizouse o obradoiro 'Ludus, a xogar como os romanos' e o propio día 18 tivo lugar unha xornada de portas abertas con visitas guiadas, que se pechou cun concerto de Mónica de Nut. Máis de 1.200 persoas participaron ao longo da semana nestes actos.

No caso do Museo Etnolóxico de Ribadavia as actividades trasládanse aos días 21, 22, 27 e 28 de maio, cos obradoiros para escolares ‘Escribimos coa luz’, que teñen como obxectivo dar a coñecer os fondos fotográficos do centro.

Parques arqueolóxicos
Os parques arqueolóxicos de Galicia tamén se uniron este ano á celebración do DIM. Así, o da Cultura Castrexa de San Cibrao de Las preparou para o día 14 a visita ‘Andar con arte’, na que se visitaron bens patrimoniais da zona como o Mosteiro de San Clodio de Leiro ou a igrexa de San Miguel de Osmo (Cenlle). Asemade, Fran Pérez ‘Narf’ presentou o seu novo traballo discográfico ‘Nas tardes escuras’, e houbo unha visita nocturna ao castro na que se mesturaron arqueoloxía e gastronomía. Un total de 317 persoas visitaron onte San Cibrao de Las para participar nas actividades organizadas con motivo do DIM 2014.

No Parque Arqueolóxico da Arte Rupestre (PAAR) de Campo Lameiro a conmemoración do Día Internacional dos Museos desenvolveuse o domingo 18, cunha xornada de portas abertas e o sábado 17 pola noite, cun paleoconcerto da man de Neonymus, unha innovadora proposta musical de Silberius de Ura na que frautas de óso de voitre, frautas doces, melódica, ósos e pedras e tubos de plástico, entre outros instrumentos, evocaron os sons da Prehistoria. Preto de 350 persoas participaron nestas actividades.

Museo do Mar e Massó
O Museo do Mar de Galicia, en Vigo, celebrou o Día Internacional dos Museos cunha xornada de portas abertas en horario de 10 a 14 e de 17 a 19 horas. Durante esta xornada máis de 2.000 persoas visitaron completamente de balde este centro, tendo ademais a un grupo de profesionais á súa disposición para resolver as dúbidas e preguntas sobre o museo. O número de visitantes no Museo do Mar foi moi superior ao acadado o ano pasado na celebración do DIM.

Pola súa banda, o Museo Massó, en Bueu, abriu a semana pasada unha pequena mostra dedicada a unha peza singular deste centro, a partitura manuscrita da ‘Muiñeira opus 32 de Pablo Sarasate’, que permanecerá aberta durante as vindeiras semanas. Onte tivo lugar un obradoiro musical infantil sobre esta mostra que contou con 70 nenos e nenas de 4 a 9 anos.

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23