Museos de Galicia

Novas

10 de novembro do 2014 IV encontro de conservación e restauración no Museo de Pontevedra

Imaxe do encontro
Imaxe do encontro

Baixo o lema “Moldes, réplicas e patrimonio” celebrarase o IV Encontro de Conservación e Restauración os días 19, 20 e 21 de novembro no salón de actos do Sexto Edificio do Museo de Pontevedra.

O interese dos moldes e reproducións como colección museística, como vestixio dunha metodoloxía de traballo, como técnica de conservación e como obxectos que tamén debemos conservar, serán os fíos condutores das sesións deste encontro.

A organización corre a cargo do Museo e da Escola Superior de Conservación e Restauración de Bens Culturais de Galicia e está dirixido tanto a profesionais do eido da restauración e a conservación, como doutros vinculados coas actividades museísticas e artísticas, así como a estudantes ou ó público interesado en xeral.

As inscricións realizaranse na secretaría do Museo de Pontevedra: secretaria.museo@depo.es (información no teléfono 986 804 100 ext.: 42436) ata o 12 de novembro. Efectuaranse por rigorosa orde de rexistro de entrada ata completar o número de prazas, limitado a 240 persoas.

Os asistentes recibirán un diploma acreditativo. Está solicitado un crédito de libre configuración á Universidade de Vigo.

Descargas:

Folla de inscrición

Progrma completo

31 de outubro do 2014 O CGAC acolle o novo proxecto expositivo dun dos mestres da abstracción, Carlos León

Centro Galego de Arte Contemporánea (CGAC)

A consellería de Cultura, Educación e Ordenación Universitaria presentou nun acto informativo celebrado hoxe ás 12 h. un CGAC a mostra do artista ceutí Carlos León, ‘A orde das primeiras cousas’. Na rolda de prensa participaron o director do Centro Galego de Arte Contemporánea, Miguel von Hafe; os dous comisarios da exposición, Ángel Cerviño e Alberto González- Alegre; e o propio artista que sinalou que "co proxecto desta exposición nacín realmente como escultor" e engadiu que quixo incluír na mostra "un cadro recién creado que marca una nueva etapa en mi pintura" o que, dalgún xeito, fai que esta mostra sexa un fito significativo na traxectoria creativa deste extraordinario artista plástico.

Con máis de 30 pezas entre pinturas e esculturas, ‘A orde das primeiras cousas’ é a mostra máis completa que se ten realizado deste importante artista en España. Na actualidade, a súa obra imponse como unha das propostas fundamentais da pintura abstracta española. ‘A orde…’ ocupará toda a planta baixa do centro e poderá visitarse até o 1 de marzo de 2015.

A orde das primeiras cousas
A exposición sita no CGAC explora e vertebra algunhas das series máis recentes do pintor. Nela, Carlos León obxectualiza o acto de pintar. A súa paleta de maxentas, carmíns, azuis prusia, índigos e ocres ten continuidade nos óxidos e os restos de pintura dos elementos recuperados das chatarrerías. Os refugallos industriais presentes nas súas obras compoñen a súa particular linguaxe. Deste xeito, o artista indaga nos xogos que se establecen entre o radical cuestionamento do ilusionismo da súa pintura e a práctica construtiva da súa produción escultórica.

As salas do Centro pobóanse de ferros, táboas, cables e palanganas que se atopan formando esculturas e que dialogan con cadros tamén superpostos e que se elevan sobre o chan con pezas que remiten ao espazo do seu taller. Os obxectos revelan as súas historias e a pegada das persoas que os construíron, os empregaron e os desbarataron. O artista toma estes restos industriais como fragmentos de poemas ou notas musicais para crear os seus propios versos e partituras no espazo expositivo do CGAC.

23 de outubro do 2014 Visita do embaixador de Xapón en España ao Museo das Peregrinacións e de Santiago

Museo das Peregrinacións e de Santiago

Con motivo da viaxe oficial a Galicia do embaixador de Xapón en España, Kazuhiko Koshikawa, realizou unha visita ao Museo das Peregrinacións e de Santiago acompañado da súa esposa e do seu primeiro secretario.

Nesta visita de máis de unha hora, amosou un grande interese polo museo, especialmente pola sala dedicada á construción da catedral e á lenda da Traslatio e do achado dos restos do Apóstolo Santiago no monte Libredón, pola simboloxía e utilización da cuncha, polo acibeche e a súa constitución e uso e pola iconografía de Santiago. Así mesmo, percorreron de vagar a exposición temporal das iconas rusas, asombrados polos detalles da súa execución e temática.

A relación do Museo das Peregrinacións con Xapón vén xa dende 1999, ano no que o museo acolleu unha exposición temporal sobre o Camiño de Kumano, quizais o máis importante dese país e cun gran paralelismo histórico co Camiño de Santiago, froito do cal as dúas cidades están irmanadas. Dende esa data xa visitaran o museo o por entón embaixador do Xapón, e ao longo destes anos diferentes cargos políticos, turísicos e económicos da Prefeitura Gubernamental de Wakayama, moitas veces con gallo de establecer relaciones e intercambios culturales. O museo tivo ocasión de volver presentar nas súas instalacións en 2008 unha segunda exposición sobre unha parte deste importante camiño:"Totsukawamura, Corazón do camiño", con fotografías realizadas polo fotógrafo Luis Ocaña.

Esta constante e estreita colaboración entre a rexión xaponesa de Wakayama e o Museo das Peregrinacións e de Santiago é a que atrapou o interese polo coñecemento deste centro do actual embaixador do país nipón.

22 de outubro do 2014 A arte e as emocións centran o encontro que se celebra no Museo de Belas Artes da Coruña

Museo de Belas Artes da Coruña

O Museo de Belas Artes da Coruña da Consellería de Cultura, Educación e Ordenación Universitaria acolle desde hoxe e ata o venres 24 de outubro a actividade ‘Arte e emocións’, un encontro promovido pola Universidade Internacional Menéndez Pelayo (UIMP) para abordar o estudo das prácticas, os obxectos e as representacións das emocións ao longo da historia da arte.

Este espazo para a reflexión, o debate e a posta en común de coñecementos foi inaugurado hoxe polo director director da UIMP de Galicia, Domingo Bello; pola directora do museo, Ángeles Penas; e polo secretario xeral de Cultura, Anxo Lorenzo, quen destacou as diversas perspectivas que abordará o encontro, como a presenza das emocións nas diversas manifestacións artísticas, a súa capacidade para favorecer a creación e as sensacións producidas no espectador.

Para isto, o curso presenta unha vía de aproximación histórica, que tratará de situar as obras no marco da cultura, a situación social e a estética predominante en determinadas épocas, como a antigüidade clásica, o medievo ou o Barroco; e unha vía de carácter temático, en función da iconografía e os seus significados.

Visión especializada e inédita
Atendendo ao carácter transversal do proxecto, o encontro conta cun grupo de especialistas de disciplinas diversas como a historia cultural, a antropoloxía, a historia da ciencia, a filosofía, a historia da arte e a literatura. “Eles e elas, recoñecidos investigadores e investigadoras de diversas universidades que traballaron na materia ou que o están a facer na actualidade, a través de publicacións, artigos, exposicións etc., serán os encargados de guiar ese achegamento á arte e ás emocións, para ofrecer unha visión especializada e rigorosa, e, nalgúns casos, tamén practicamente inédita”, afirmou Anxo Lorenzo.

A risa e o pranto na obra de Baltasar Gracián, as emocións no rostro en imaxes relixiosas da pintura barroca española, as paixóns e o pensamento no mundo antigo, as emocións no cine, os sentimentos no romanticismo alemán, a expresión na pintura do século XIX, os afectos en tratados de retórica e técnica vocal, as paixóns da modernidade e as emocións a través do corpo na arte contemporánea son algúns dos temas que se abordarán desde hoxe ata o venres 24 de outubro neste encontro.

21 de outubro do 2014 Xesús Vázquez Abad inaugura a mostra conmemorativa ‘10 anos de Mupega’ destacando as “máis de 100 exposicións itinerantes e 50 traballos de investigación editados”

Museo Pedagóxico de Galicia (Mupega)

O conselleiro de Cultura, Educación e Ordenación Universitaria, Xesús Vázquez Abad, inaugurou onte a exposición ‘10 anos de Mupega’, coa que se conmemora unha década de actividade pública do Museo Pedagóxico de Galicia na súa sede compostelá de San Lázaro, un espazo polo cal pasaron xa preto de 70.000 visitantes. Concretamente, ‘10 anos de MUPEGA’ ocupará a parte dedicada a exposicións temporais da primeira planta e nela exporanse un total de 89 pezas entre imaxes, documentación de arquivo e materiais educativos que testemuñan a súa evolución, que pon de manifesto a variedade e riqueza do patrimonio pedagóxico de Galicia, desde a súa apertura o día 21 de outubro de 2004 até a actualidade. A mostra permanecerá aberta até o 28 de febreiro de 2015 e poderá visitarse de balde.

O conselleiro destacou que se trata do primeiro museo desta temática que xorde en España con respaldo institucional desde o século XIX e fixo fincapé no seu traballo expositivo e investigador: “con máis de 100 exposicións itinerantes e máis de 50 traballos de investigación editados”. Así mesmo, nos dez anos de vida pública do museo organizáronse 4 eventos congresuais de carácter nacional e internacional, 5 cursos de formación para especialistas e 10 exposicións temporais de produción propia.

Por outra banda, Vázquez Abad chamou a atención sobre o feito de que o MUPEGA se fose incorporando “ás organizacións museísticas máis sobranceiras, desde o ICOM ata o Consello Galego de Museos, sen esquecer ás relacionadas co mundo do xogo e xoguete tradicional, como Brinquedia ou a Asociación Galega do Xogo Tradicional, nestes casos para responder ao mandato fundacional que este centro tivo e ten co mundo do xogo e do xoguete galego.” “Desde a Consellería de Cultura e Educación −concluíu o responsable da Xunta−, parécenos moi importante que manteñamos o contacto co esencial do pasado e coa actitude das persoas que sentaron as bases para ofrecer unha educación de calidade.”

Un museo centrado no patrimonio pedagóxico e lúdico de Galicia
O MupegaA, que protexe, estuda e difunde o legado histórico-educativo da nosa terra, ofrece na súa planta baixa e primeira distintos espazos museográficos como os que representan as distintas aulas históricas de primaria e secundaria, a inspección educativa, o maxisterio, o mundo infantil, as escolas chegadas de alén mar e a galería de educadores galegos. Así mesmo, na segunda planta a protagonista é a Rede Mupega, na que se ofrece unha coidada selección de fondos procedentes dos institutos históricos da nosa comunidade, aqueles creados nos anos centrais do século XIX, e que son o IES Salvador de Madariaga (A Coruña), o Arcebispo Xelmírez (Santiago de Compostela), o Lucus Augusti (Lugo), o Otero Pedrayo (Ourense) e o Sánchez Cantón (Pontevedra). Algunhas pezas singulares expostas son o Mapa Orográfico de Vicente Fraiz Andón, a máquina de imprenta Minerva, o motor Barreiros, que se empregaba na instrución do alumnado de FP na rama de mecánica, ou a máquina Perkins para a escritura en Braille.

Por último, o museo mantén desde o principio un compromiso co mundo infantil, en xeral, e co do xogo e xoguete tradicional galego, en particular. Hai varias áreas especificamente deseñadas para explicar elementos capitais do mundo infantil como son o nacemento, a crianza e o xogo. Neste sentido cómpre destacar unha ludoteca para os máis pequenos e un patio de xogos exteriores para que os maiores poidan coñecer e gozar co noso patrimonio lúdico máis enxebre.

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23