Museos de Galicia

Novas

21 de decembro do 2014 O Museo do Mar de Galicia achega os segredos do mundo mariño aos máis pequenos

Museo do Mar de Galicia

A Consellería de Cultura, Educación e Ordenación Universitaria programa para estas datas de Nadal unha serie de actividades no Museo do Mar de Galicia, en Vigo, que teñen por obxecto achegar aos máis pequenos os segredos do mundo mariñeiro e mariño. Esta programación forma parte do conxunto das máis de 70 iniciativas que o departamento que dirixe Xesús Vázquez Abad desprega nos museos e bibliotecas dependentes del por toda Galicia con motivo destas datas festivas.

O próximo mércores, día 24, así como os días 27 e 30 de decembro e o 3 e o 7 de xaneiro, as instalacións do museo acollerán un total de cinco actividades distintas, deseñadas e pensadas en forma de aventura para os nenos e nenas que desexen achegarse.

A partir de 8 anos
Así, ‘Coñecendo a cultura tradicional mariñeira’, para nenos a partir de 8 anos, os participantes poderán acceder aos saberes, técnicas e medios de vida que foron acumulando as xeracións de homes e mulleres que viviron por e para o mar. A actividade inclúe unha visita guiada onde os participantes se transformarán en auténticos mariñeiros tradicionais. Con ‘A conquista do mundo submarino’, os rapaces e rapazas de máis de 8 aos poderán introducirse nos segredos e descubrimentos da historia do submarinismo. Tamén para nenos desa mesma idade está pensado a actividade ‘Segredos arqueolóxicos do Museo do Mar’, que toma como punto de partida o xacemento castrexo do propio museo e na que os rapaces se converterán en arqueólogos, con escavación incluída, e despois traballar nun laboratorio científico.

Para nenos de 3 a 7 anos
Para estas idades está deseñada a actividade ‘Comían peixe os romanos? Unha viaxe no tempo’, unha aventura chea de sorprendentes descubrimentos arqueolóxicos na que os cativos poderán achegarse dun xeito divertido á cultura galaico-romana.

A outra das actividades para este público é ‘A casa dos vellos mariñeiros’, no que os nenos participarán directamente da cultura mariñeira, coñecendo os traballos que facían, ao tempo que farán unha visita ao acuario.

Todos os públicos
Entre as actividades para todos os públicos, o venres día 26 de decembro e o 2 de xaneiro ás 11,30 horas haberá unha xornada de alimentación dos peixes do acuario.

Así mesmo mantense aberto ao público a exposición ‘Sopros de Nadal’, que é un paseo pola historia da arte da decoración de Nadal en vidro e cristal, con pezas específicas relacionadas con mundo do mar. Con respecto a esta mostra, os interesados teñen a opción de realizar unha visita guiada os días 27 e 30 deste mes e o 3 de xaneiro.

27 de novembro do 2014 O lenzo Os Satélites exhíbese en Ourense nunha mostra sobre Parada Justel

Museo Arqueolóxico Provincial de Ourense

Os Satélites
Os Satélites

A exposición Os satélites. Parada Justel inaugurouse hoxe coa presenza do conselleiro de Cultura, Educación e Ordenación Universitaria, Xesús Vázquez Abad. Organizada polo Museo Arqueolóxico Provincial de Ourense, permanecerá aberta ao público até vindeiro 2 de febreiro no Centro Municipal José Ángel Valente, sito na antiga sede do Banco de España. Segundo Vázquez Abad, a mostra pon de relevo “o inmenso valor artístico da obra de Parada Justel, pero tamén a forma na que, pacientemente, imos construíndo novos espazos, para sentir o orgullo de pertencer a esta terra”.

O titular de Cultura e Educación asegurou que esta mostra resulta “unha xustísima homenaxe a un membro da extraordinaria Xeración Doente, dese grupo de catro xenios: Ovidio Murguía, Xaquín Vaamonde, Jenaro Carrero e, por suposto, o propio Ramón Parada Justel que, nas súas vidas, tan fugaces, racharon os moldes da plástica do seu tempo e asinaron lenzos que os sitúan nun cumio pictórico perenne, recoñecible como galego e de alcance universal”. Finalmente, Xesús Vázquez Abad felicitou ao director e o equipo do Museo Arqueolóxico de Ourense, aos profesionais que acometeron a restauración do lenzo e montaxe da mostra, e ás diversas administracións e institucións colaboradoras.

Ao acto, asistiron ademais o alcalde de Ourense, Agustín Fernández; o delegado da Xunta na provincia, Rogelio Martínez; e a xefa territorial da Consellería, Mercedes Gallego; e o comisario da exposición e director do Museo Arqueolóxico Provincial de Ourense, Xulio Rodríguez.

Os satélites, medalla Nacional de 1899
Esta exposición ten como obxectivo divulgar o lenzo Os satétites, unha das obras máis senlleiras do pintor ourensán nado en Esgos, Ramón Parada Justel (1871-1902). Trátase dun cadro de gran formato, premiado cunha medalla na Exposición Nacional de 1899, que permaneceu nunha colección particular e recentemente foi adquirido pola Xunta de Galicia, pasando a incorporarse nas coleccións do Museo Arqueolóxico ourensán.

A exposición, que se vertebra arredor do excepcional lenzo Os Satélites, complétase con outras dezasete pezas do pintor, unha escolma que pretende achegar ao público un percorrido pola súa traxectoria artística. A mostra inclúe unha serie de paneis que explican o minucioso proceso de restauración ao que foi sometida a obra, que recupera así a súa forza e beleza orixinal.

O Museo ofrecerá diariamente e en dúas quendas, ás 12 e ás 20 horas, visitas guiadas gratuítas á exposición. Nestas darase a coñecer o cadro Os satélites, explicando o seu recente proceso de restauración, e farase un percorrido pola obra pictórica de Ramón Parada Justel para divulgar a súa traxectoria artística.

18 de novembro do 2014 O CGAC exhibe máis de 40 pezas da súa colección

Centro Galego de Arte Contemporánea (CGAC)

Peza da exposición
Peza da exposición

O Centro Galego de Arte Contemporánea abre mañá ao público a exposición Hospitalidade, cunha selección de máis decorenta obras da Colección CGAC, a mostra poderá visitarse até o 8 de marzo do vindeiro ano na planta soto do centro.

É a derradeira exposición comisariada polo director do centro, Miguel von Hafe, que baixo o título Hospitalidade, convida ao público a visitar o museo como unha praza máis da cidade na que os artistas- como os cidadáns- reflexiona sobre conceptos como a morte, a indiferenza, o real, a ficción, a vontade de superación colectiva, o amor, o inesperado ou o posicionamento político, nunha tesitura tan complexa como a propia vida.

A mostra recolle a obra de vinte e dous artistas de diversas disciplinas e procedencias na busca dunha vinculación entre a súa produción artística e o museo pensado como espazo público, de liberdade e de confrontación crítica coa realidade.

Os artistas que participan na exposición son: Antoni Abad, Lara Almarcegui, Helena Almeida, Juan Araujo, David Bestué & Marc Vives, Robert Breer, Pedro Cabrita Reis, Rui Calçada Bastos, Jota Castro, Ângela Ferreira, Alicia Framis, Anna Bella Geiger, Liam Gillick, Jonathan Hernández, Jirí Kovanda, Guillaume Leblon, Carlos Maciá, Rubens Mano, Peter Piller, Rubén Ramos Balsa, Frank Thiel e Mauro Trastoy.

14 de novembro do 2014 Publícase o Anuario de Estatísticas Culturais 2014

O Ministerio de Educación, Cultura e Deporte publicou o Anuario de Estatísticas Culturais 2014, a décima edición deste traballo, que acaba de difundirse no apartado dedicado a estatísticas culturais do portal web do ministerio.

Ao longo desta década, ao empaquetar os resultados estatísticos máis relevantes do sector cultural na publicación, pretendeuse facilitar o acceso e a visibilidade dos indicadores culturais dispoñibles, evitando a procura en información dispersa e ofrecendo unha ferramenta que contribúa a profundar no coñecemento da situación do sector cultural en España e da súa evolución.

Os seus resultados foron incorporados como noutras ocasións a CULTURAbase, que permite acceder a series estatísticas no ámbito cultural, incluíndo na maior parte dos casos a información dispoñible desde o ano 2000.

Todos os museos e coleccións visitables da Comunidade Autónoma de Galicia achegan datos para o apartado de estatísticas sobre museos que se inclúen neste anuario. 

14 de novembro do 2014 Públicase un libro que repasa os 10 anos da vida cultural do Museo Pedagóxico de Galicia

Museo Pedagóxico de Galicia (Mupega)

O conselleiro de Cultura, Educación e Ordenación Universitaria, Xesús Vázquez Abad, presentou hoxe no MUPEGA o libro 10 anos do Museo Pedagóxico de Galicia, unha nova actividade –tras a recente inauguración dunha mostra conmemorativa o pasado 20 de outubro– programada para celebrar o décimo aniversario desta institución cultural.

En concreto, a obra 10 Anos... estrutúrase nun capítulo inicial que enmarca o volume, asinado polo actual director Emilio Castro; vinte artigos de balance e síntese do que significa o MUPEGA e a súa evolución durante estes primeiros dez anos, asinados todos eles por prestixiosas autoridades do eido educativo e profesionais vinculados á institución; e unha sucinta escolma gráfica que dan conta da evolución desta institución museal sita no compostelano barrio de San Lázaro.

Neste sentido, o conselleiro explicou que o libro recolle a participación coral dunha vintena de amigos e colaboradores do MUPEGA, “un conxunto de textos –afirmou Vázquez Abad− que nos ofrecen, por este motivo, unha serie de pensamentos e lembranzas, de impresións e suxestións arredor da existencia deste centro museístico de referencia dentro do noso actual sistema educativo. Un volume no que os lectores poden atopar ademais, a modo de sucinta crónica, os acontecementos vividos nesta curta andaina e a descrición deste xermolar.”

“O Mupega –concluíu o titular de Cultura− está pois de parabéns porque chega ao uso de razón, que se dicía antano, e porque faino respondendo ás características que xa apuntaba o Premio Nobel turco, Orhan Pamuk, nun artigo publicado co título Modesto manifiesto por los museos: «Reivindico un museo pequeno que conte historias a escala humana, que recree o pasado de seres humanos singulares, que nos fale de historias cotiás e ordinarias…», e todo isto faino, coma ninguén, o noso Mupega.”

Educar, conservar, protexer
Ademais da presentación do libro conmemorativo, o Mupega acolleu dentro do programa de actos conmemorativos do día, a conferencia “Patrimonio histórico: educar, conservar, proteger”, que impartiu a profesora da Universidade Complutense e xefa do servizo do servizo de exportación e importación de Bens Culturais da Subdirección Xeral de Protección de Patrimonio Histórico do Ministerio de Cultura, Inmaculada González Galey. A xornada rematou cunha visita guiada polo director do centro, Emilio Castro, á referida mostra temporal “10 anos de Mupega.”

O patrimonio pedagóxico e lúdico de Galicia
O MUPEGA, que protexe, estuda e difunde o legado histórico-educativo da nosa terra, ofrece nas súas plantas baixa e primeira diversos espazos museográficos como os que representan as distintas aulas históricas de primaria e secundaria, a inspección educativa, o maxisterio, o mundo infantil, as escolas chegadas de alén mar e a galería de educadores galegos.

Así mesmo, na segunda planta a protagonista é a Rede Mupega, na que se ofrece unha coidada selección de fondos procedentes dos institutos históricos da nosa comunidade, aqueles creados nos anos centrais do século XIX, e que son o IES Salvador de Madariaga (A Coruña), o Arcebispo Xelmírez (Santiago de Compostela), o Lucus Augusti (Lugo), o Otero Pedrayo (Ourense) e o Sánchez Cantón (Pontevedra). Algunhas pezas singulares expostas neste andar son o Mapa Orográfico de Vicente Fraiz Andón, a máquina de imprenta Minerva, o motor Barreiros, que se empregaba na instrución do alumnado de FP na rama de mecánica, ou a máquina Perkins para a escritura en Braille.

Cómpre lembrar ademais que o museo mantén desde o principio un compromiso co mundo infantil, en xeral, e co do xogo e xoguete tradicional galego, en particular. Hai varias áreas especificamente deseñadas para explicar elementos capitais do mundo infantil como son o nacemento, a crianza e o xogo. Neste sentido cómpre destacar unha ludoteca para os máis pequenos e un patio de xogos exteriores para que os maiores podan coñecer e gozar co noso patrimonio lúdico máis enxebre.

Paginador

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23