18 de setembro do 2019 Obras de mellora nas pallozas do Conxunto Etnográfico do Cebreiro

Conxunto Etnográfico do Cebreiro

No mes de xullo comezaron as obras de reparación nas catro pallozas que compoñen o Conxunto Etnográfico do Cebreiro. A partida orzamentaria destinada a este fin pola Consellería de Cultura e Turismo foi de arredor de 180.000 € e adxudicouse á empresa Construcións Resconsa.

O responsable do teitado é o teitador de Burbia, Juan González, un dos poucos que coñecen este oficio na actualidade e que se vén encargando desde hai anos destes traballos no Cebreiro.

As principais intervencións consisten na renovación completa do teito da palloza Casa de Juan López ou palloza-museo, na reparación e colocación dos veos segundo a técnica tradicional na palloza de Galán, así como na reparación dos teitos das pallozas de Campelo e do Quico.

Dentro destas obras melloraranse tamén as instalacións de electricidade e iluminación, repararanse as canles perimetrais e aplicaranse tratamentos insecticidas para a conservación das estruturas de madeira. Mentres se estean executando as obras na palloza-museo, as visitas faranse á palloza do Quico.

Galería

  • Obras de mellora nas pallozas do Conxunto Etnográfico do Cebreiro

  • Palloza do Quico co teito reparado