Cartel publicitario sobre as conservas da fábrica Massó. Represéntase unha parella vestida con elegancia e reflexo da moda dos anos vinte do século pasado.
O autor foi un dos maiores debuxantes, ilustradores e cartelistas da primeira metade do século XX. Entre 1920 e 1925 realizou traballos como deseñador e publicista para a conserveira Massó, mentres seguía colaborando con publicacións de tirada nacional. O seu traballo encaixa perfectamente no panorama do deseño e a ilustración da época, coincidindo cun momento en que se revolucionou o deseño gráfico do país dentro dun contexto máis amplo a nivel europeo e influído sobre todo por Francia. Os debuxos e ilustracións sobre o mundo da moda proliferaron e contribuíron a difundir a alta costura e ao nacemento do cartelismo moderno.