Museos de Galicia

Museo do Mar de Galicia

21 de decembro do 2014 O Museo do Mar de Galicia achega os segredos do mundo mariño aos máis pequenos

Museo do Mar de Galicia

A Consellería de Cultura, Educación e Ordenación Universitaria programa para estas datas de Nadal unha serie de actividades no Museo do Mar de Galicia, en Vigo, que teñen por obxecto achegar aos máis pequenos os segredos do mundo mariñeiro e mariño. Esta programación forma parte do conxunto das máis de 70 iniciativas que o departamento que dirixe Xesús Vázquez Abad desprega nos museos e bibliotecas dependentes del por toda Galicia con motivo destas datas festivas.

O próximo mércores, día 24, así como os días 27 e 30 de decembro e o 3 e o 7 de xaneiro, as instalacións do museo acollerán un total de cinco actividades distintas, deseñadas e pensadas en forma de aventura para os nenos e nenas que desexen achegarse.

A partir de 8 anos
Así, ‘Coñecendo a cultura tradicional mariñeira’, para nenos a partir de 8 anos, os participantes poderán acceder aos saberes, técnicas e medios de vida que foron acumulando as xeracións de homes e mulleres que viviron por e para o mar. A actividade inclúe unha visita guiada onde os participantes se transformarán en auténticos mariñeiros tradicionais. Con ‘A conquista do mundo submarino’, os rapaces e rapazas de máis de 8 aos poderán introducirse nos segredos e descubrimentos da historia do submarinismo. Tamén para nenos desa mesma idade está pensado a actividade ‘Segredos arqueolóxicos do Museo do Mar’, que toma como punto de partida o xacemento castrexo do propio museo e na que os rapaces se converterán en arqueólogos, con escavación incluída, e despois traballar nun laboratorio científico.

Para nenos de 3 a 7 anos
Para estas idades está deseñada a actividade ‘Comían peixe os romanos? Unha viaxe no tempo’, unha aventura chea de sorprendentes descubrimentos arqueolóxicos na que os cativos poderán achegarse dun xeito divertido á cultura galaico-romana.

A outra das actividades para este público é ‘A casa dos vellos mariñeiros’, no que os nenos participarán directamente da cultura mariñeira, coñecendo os traballos que facían, ao tempo que farán unha visita ao acuario.

Todos os públicos
Entre as actividades para todos os públicos, o venres día 26 de decembro e o 2 de xaneiro ás 11,30 horas haberá unha xornada de alimentación dos peixes do acuario.

Así mesmo mantense aberto ao público a exposición ‘Sopros de Nadal’, que é un paseo pola historia da arte da decoración de Nadal en vidro e cristal, con pezas específicas relacionadas con mundo do mar. Con respecto a esta mostra, os interesados teñen a opción de realizar unha visita guiada os días 27 e 30 deste mes e o 3 de xaneiro.

16 de setembro do 2014 A primeira mostra monográfia de Antón Patiño afonda nos sentimentos oceánicos

Museo do Mar de Galicia

A exposición Océano, do artista monfortino Antón Patiño, inaugurouse hoxe no Museo do Mar de Galicia, nun acto ao que asitiu o conselleiro de Cultura, Educación e Ordenación Universitaria, Xesús Vázquez Abad, e o secretario xeral de Cultura, Anxo Lorenzo.  A mostra reúne un total de doce pezas de gran formato, na que o pintor trata de plasmar no lenzo o amplo abano de sensacións que provoca o mar, como a soidade, o sopor, o medo ou a liberdade, entre outras.

O titular de Cultura e Educación subliñou que nesta mostra “o visitante poderá ver e sentir o propio Océano de xeitos distintos, pois as obras que configuran esta mostra non se coñecen só pola vista, senón que se perciben con todos os sentidos, dun xeito case sinestésico”.

Vázquez Abad rematou a súa intervención agradecendo a Antón Patiño a implicación “emocional e artística nun proxecto tan especial como complexo”, ao mesmo tempo que convidou ao público a “gozar coa Arte do protagonista”.

Composición da mostra
Nesta exposición o creador achégase ao ideal do sentimento oceánico mediante amplos trazos en cor azul ultramar, branco mineralizado, verdes líquidos ou negros de loito e tormenta. Mediante o emprego do verniz e diversos pigmentos o autor trata de atraer a memoria emocional do espectador en distintos bloques monográficos.

O drama do mar está amplamente representado nesta mostra, con obras que lembran as catástrofes ecolóxicas nas costas galegas como as do “Polycommander”, “El Casón”, ou “El Mar Egeo”, e máis recentemente o “Prestige”. Este relato culmínao a obra “Arquivo da Desfeita”, formada por pequenas pezas de madeira con restos de chapapote con releve, e vai acompañada pola proxección de imaxes dun caderno, que Patiño foi facendo con recortes de xornais e que agora desenvolve nun diario visual.

Os chamados fogos de San Telmo, aos que pregaban os mariñeiros nos días de tormenta, conforman a súa composición “Noites de Treboada”, na que se representan os brelos das descargas eléctricas no ceo como unha constelación na noite. O cadro amosase como un escuro abismo con partículas metalizadas.

A obra “Memoria branca”, está composta por unha ringleira de cadros que conforman unha superficie de máis de dez metros de longo que abrangue ollos, dornas, esferas ou siluetas espectrais sobre o fondo dun branco mineralizado, sucado polo brelo e lóstregos representados co verniz ocre alaranxado ata o vermello.

Rexistros cromáticos
Fronte a esta obra sitúase “Redes”, unha evocación á posta do sol. Trátase da pintura policromática expandida por unha maraña. Por outra banda “Ollos de boi”, é unha creación que conforma un todo coa parede, composta por ocos cativos que pretenden comprimir a inmensidade do mar ao alcanzar a liña do horizonte.

Desde a perspectiva das profundidades mariñas desenvólvese “Memoria Subacuática”, que con case seis metros de longo e cun rexistro cromático de verdes e azuis, pretende mostrar ao espectador a transparencia do mar.

Para rematar o autor recrea a lendaria “Furna de Fingal”, sita na illa de Staffa, nas Hébridas Interiores, en Escocia. Mediante un tríptico e cun xogo de horizontais e verticais, dende o interior da mesma, achega as columnas de basalto cunha masa de azul.

 

25 de xuño do 2014 A Consellería de Cultura e Educación leva a nova sesión do ciclo de música contemporánea ao Museo do Mar de Galicia

Museo do Mar de Galicia

O ciclo Do Audible 2014 da Consellería de Cultura, Educación e Ordenación Universitaria chega a Vigo esta semana cunha sesión que terá o mar como protagonista. ‘O canto das baleas’ é o título da segunda sesión desta programación coa que o departamento que dirixe Xesús Vázquez Abad ofrece un novo espazo de achegamento á música e ás expresións contemporáneas.

Logo do seu paso por Ourense, Do Audible atracará o xoves 26 de xuño, ás 20 horas, no Museo do Mar de Galicia en Vigo, para dar a coñecer algunhas das obras mestras inspiradas no mar aparecidas no século XX. Para iso, o ciclo propón unha sesión conducida polo crítico e divulgador Francisco Ramos, autor de ‘La música del siglo XX. Una guía completa’, editada na editorial Turner, e que contará coa actuación do grupo Vertixe Sonora Ensemble.

Un percorrido polas paisaxes sonoras martítimas
Os músicos Pablo Coello (saxofón), Alessandra Rombolà (frauta), Criptana Angulo (violonchelo), David Durán (piano), Diego Ventoso (percusión) e Ramón Souto (difusión de son) serán os encargados de interpretar a obra ‘Toposition(s)#3’, na que o compositor Charles-Antoine Fréchette investiga paisaxes sonoras marítimas. Escrita para saxofón, percusións, piano e violonchelo amplificados, representa diversos comportamentos das ondas, pero tamén os sons das baleas e o interior resoante dun barco atrapado nunha tempestade. O canto das baleas será evocado polo músico e profesor Abraham Cupeiro a través do ‘karnix’, un instrumento celta.

Do Audible tamén inclúe na nova sesión a obra ‘Ballad’, na que o compositor arxentino Fernando Garnero lle dá inicio ao seu ciclo Avoidances, onde constrúe gramáticas imaxinarias a partir da confrontación de obxectos estéticos referenciados preexistentes. Escrita para frauta, saxofón, piano, percusión e electrónica, en ‘Ballad’ somete un estándar do jazz a continuos cambios a diferentes niveis.

Próximas sesións
A Secretaría Xeral de Cultura programará a terceira sesión do ciclo Do Audible, ‘A música das esferas’, o 11 de outubro ás 20 horas na Casa das Ciencias da Coruña. A programación de 2014 rematará o 14 de novembro, tamén ás 20 horas, no Museo de Pontevedra coa sesión ‘A música e o diabólico’. Todos os concertos son de balde ata completar a capacidade.

13 de xuño do 2014 O Museo do Mar presenta a exposición ‘¿Acuicultura? descúbrela’

Museo do Mar de Galicia

O conselleiro de Cultura, Educación e Ordenación Universitaria, Xesús Vázquez Abad, e a conselleira de Medio Rural e do Mar, Rosa Quintana Carballo, participaron na tarde de hoxe na inauguración da mostra ‘¿Acuicultura? Descúbrela’ no Museo do Mar de Galicia en Vigo. A este acto tamén asistiron o secretario general de Pesca do Ministerio de Agricultura, Alimentación e Medio Ambiente e presidente da Fundación Observatorio Español de Acuicultura, Carlos Domínguez.

Xesús Vázquez afirmou que esta mostra “é o mellor modo de coñecer amenamente un sector de gran importancia para o desenvolvemento da nosa terra” e que o Museo do Mar de Galicia é a mellor institución “para comprender a vizosa vinculación que os galegos mantivemos onte, hoxe e sempre co mar”. Tamén aproveitou a súa intervención para convidar “aos vigueses e viguesas e a todos os galegos e galegas a que se acheguen ao Museo do Mar de Galicia a que participen das actividades e gocen visitando esta mostra” e para agradecer aos responsables e técnicos da Fundación Observatorio Español de Acuicultura (OESA) e do propio museo pola mostra que ofrecen.

A exposición ‘¿Acuicultura? Descúbrela’, impulsada pola Fundación Observatorio Español de Acuicultura do Ministerio de Agricultura, Alimentación e Medio Ambiente (MAGRAMA), en colaboración co Museo do Mar de Galicia, trata de acercar a sociedade a realidade e perspectiva dun sector estratéxico que xoga un papel fundamental no aporte a sociedade de proteínas de peixe.

A mostra repasa a historia da acuicultura, a producción deste sector en España, os cultivos mariños e continentais, o importante papel que xogan na alimentación e na gastronomía, a importancia da I+D+i, así como a relevancia desta actividade no desenvolvemento sostible e a cooperación internacional.

A través do recorrido didáctico polas salas do Museo do Mar de Galicia, o visitante pode coñecer a actividade pesqueira en todos os seus ámbitos, así como o seu desenvolvemento no devir da historia: a pesca, o marisqueo e a acuicultura, os métodos de conservación e os avances técnicos nas embarcacións ou na bioloxía mariña.

A acuicultura en Galicia
Nesta ocasión, e para reforzar a relación do contido da exposición co contexto local tamén se dedican tres módulos da exposición a aspectos relacionados coa acuicultura de Galicia, a súa historia, principais especies cultivadas, investigación, repoboación e Rede Natura na nosa comunidade autónoma.

Dentro da acuicultura galega o conselleiro afirmou que “un dos mellores exemplos posibles da importancia da acuicultura na nosa terra son, precisamente, as bateas nas que s cultivan tesouros culinarios como son o Mexillón”. O cultivo de Galicia é o máis importante de España e cobre preto do 90% da producción total do país. Ademais en Galicia tamén se cultivan peces mariños como o rodaballo ou ollamol, ou continentais como a troita pero polo que máis destaca a comunidade galega é polo seu extenso litoral areoso e por unhas mareas pronunciadas que permiten producir un elevado número de especies de moluscos nos parques de cultivo.

En Galicia tamén contamos cun amplo abanico de posibilidades de cara a incorporación de investigadores e grupos de investigación nos distintos centros que compoñen a súa rede de I+D+i, o que posibilita o desenvolvemento de novos productos, procesos e tecnoloxías. En proporción o seu tamaño territorial a nosa comunidade é a que conta cunha maior concentración de infraestructuras científicas e tecnolóxicas relacionadas coas ciencias do mar, a bioloxía, a enxeñaría e as industrias alimentarias. Ademais desta labor investigadora compre destacar a labor formativa que se está a realizar no Instituto Galego de Formación en Acuicultura (IGAFA).

O recorrido compleméntase con diversos acuarios que amosan algunhas das especies cultivadas en España como troita, esturión, robaliza, anguía, rodaballo, ollamol e linguado.

A mostra estará dispoñible no Museo do Mar de Galicia, en Vigo, ata mediados de setembro. Durante este período tamén se impartirán talleres infantís e actividades divulgativa se gastronómicas.

Pola súa parte, a conselleira do Medio Rural e do Mar, Rosa Quintana, fixo fincapé na vocación mariñeira dos galegos e na calidade dos nosos produtos. Así mesmo, destacou a capacidade de evolución e de adaptación aos tempos do sector pesqueiro.

Durante a súa intervención, a titular do Medio Rural e Mar recordou que, segundo un informe da FAO, para 2030 serán necesarios 37 millóns de toneladas de peixe adicionais para cubrir a demanda. Unha cifra que aquí, segundo a conselleira, non foi vista como unha ameaza, senón coma un reto. Unha oportunidade de negocio e de xeración de emprego que a nosa Comunidade aproveitou creando un novo sector, dedicado á acuicultura, forte e evolutivo.

Os datos avalan o liderado de Galicia como maior produtor nacional no que acuicultura se refire. Na Comunidade galega cultívase o 98% do mexillón e o 88% da produción española de rodaballo. Unhas cifras das que sentirse orgullosos e que poñen de manifesto o auxe do sector, sinalou Rosa Quintana.

6 de marzo do 2014 A Consellería de Cultura e Educación prorroga polo seu gran éxito no Museo do Mar de Galicia a exposición ‘Unha marea de ondas lúdicas’, pola que xa pasaron case 4.000 visitantes

Museo do Mar de Galicia

A Consellería de Cultura, Educación e Ordenación Universitaria acaba de prorrogar o período para visitar a exposición 'Unha marea de ondas lúdicas' no Museo do Mar de Galicia debido ao gran éxito acadado, con case 4.000 visitantes desde a súa inauguración o 4 de decembro de 2013. A mostra permanecerá aberta ata o vindeiro 30 de marzo, para que todas aquelas persoas que aínda non puideron achegarse a gozar desta magnífica exposición poden facelo durante o presente mes.

Ademais coa ampliación da exposición amplíanse tamén as actividades didácticas a ela asociadas, actividades dirixidas a todos os públicos (escolares, familias con cativos a partir de 3 anos, grupos de asociacións, de amigos, con necesidades especiais, etc.), nas que se pode facer dende unha simple visita guiada ata pasar ao noso taller e xogar con algúns dos xogos e xoguetes expostos.

Así, haberá actividades para escolares de martes a venres en horario de mañá ou tarde; e visitas guiadas con xogos para grupos con necesidades especiais de martes a venres en horario de mañá. Para os grupos de adultos as visitas guiadas desenvolveranse de martes a venres en horario de mañá ou tarde, e os sábados e domingos ás 17:30 h. Ademais continúase coa programación dedicada ás familias, con visitas e xogos no obradoiro da exposición, os sábados e domingos ás 11:30 h.

Presentación de libro
A Consellería acollerá ademais este venres 7 ás 19 horas no Auditorio do Museo do Mar de Galicia a presentación do libro “Los desconocidos precursores españoles de la navegación submarina”, unha obra de Diego Quevedo, Lino Pazos, Cristino Castroviejo e Alejandro Anca, dedicada á historia do desenvolvemento submarino en España en homenaxe e recoñecemento a destacadas - e moitas veces esquecidas- figuras que contribuíron de forma significativa en España á carreira cara á obtención da nave submarina e as armas que lle son propias, como Junquera, Isidoro Cabanyes e Miguel Bonet, Antonio Sanjurjo, Eduardo Mier ou Raimundo Lorenzo de Equevilley.

De feito, o libro recolle a obra de Sanjurjo Badía creador da “boia lanzatorpedos”, submarino cuxo orixinal poden contemplar todas as persoas que se acheguen a visitar o Museo do Mar de Galicia.