O Padre Feijoo. Cidadán libre da República literaria
Con motivo dos 250 anos do pasamento de Benito Jerónimo Feijoo Montenegro, máis coñecido como “Padre Feijoo” († 26 de setembro de 1764), o Museo Arqueolóxico Provincial de Ourense programa esta exposición durante o último trimestre do ano 2014, coincidindo con ese aniversario.
A mostra contempla a idea de renovar o interese sobre un dos personaxes claves do século XVIII e particularmente da Ilustración española. A través do discurso expositivo preténdese afondar na súa biografía, produción bibliográfica, homenaxes e diferentes aspectos vinculados á súa rexión de nacemento e formación.
É de resaltar que a súa figura supera os límites provinciais, tal é así que é considerado o fundador do ensaio filosófico en lingua castelá e autor principal dentro do movemento ilustrado. As súas obras, xa en vida, acadaron unha extraordinaria difusión para a súa época con múltiples impresións, mentres era traducido a outros idiomas. Actualmente os seus escritos seguen a ser estudados dende moi diferentes aspectos, evidenciando a importante contribución de Feijoo á cultura e avance do seu tempo.
Coa finalidade de difundir, achegar e facilitar o acceso do público á exposición do Padre Feijoo, ofrecénse visitas guiadas para as persoas que previamente realicen a reserva no museo.