Museos de Galicia

Centro Galego de Arte Contemporánea (CGAC)

18 de novembro do 2014 O CGAC exhibe máis de 40 pezas da súa colección

Centro Galego de Arte Contemporánea (CGAC)

Peza da exposición
Peza da exposición

O Centro Galego de Arte Contemporánea abre mañá ao público a exposición Hospitalidade, cunha selección de máis decorenta obras da Colección CGAC, a mostra poderá visitarse até o 8 de marzo do vindeiro ano na planta soto do centro.

É a derradeira exposición comisariada polo director do centro, Miguel von Hafe, que baixo o título Hospitalidade, convida ao público a visitar o museo como unha praza máis da cidade na que os artistas- como os cidadáns- reflexiona sobre conceptos como a morte, a indiferenza, o real, a ficción, a vontade de superación colectiva, o amor, o inesperado ou o posicionamento político, nunha tesitura tan complexa como a propia vida.

A mostra recolle a obra de vinte e dous artistas de diversas disciplinas e procedencias na busca dunha vinculación entre a súa produción artística e o museo pensado como espazo público, de liberdade e de confrontación crítica coa realidade.

Os artistas que participan na exposición son: Antoni Abad, Lara Almarcegui, Helena Almeida, Juan Araujo, David Bestué & Marc Vives, Robert Breer, Pedro Cabrita Reis, Rui Calçada Bastos, Jota Castro, Ângela Ferreira, Alicia Framis, Anna Bella Geiger, Liam Gillick, Jonathan Hernández, Jirí Kovanda, Guillaume Leblon, Carlos Maciá, Rubens Mano, Peter Piller, Rubén Ramos Balsa, Frank Thiel e Mauro Trastoy.

31 de outubro do 2014 O CGAC acolle o novo proxecto expositivo dun dos mestres da abstracción, Carlos León

Centro Galego de Arte Contemporánea (CGAC)

A consellería de Cultura, Educación e Ordenación Universitaria presentou nun acto informativo celebrado hoxe ás 12 h. un CGAC a mostra do artista ceutí Carlos León, ‘A orde das primeiras cousas’. Na rolda de prensa participaron o director do Centro Galego de Arte Contemporánea, Miguel von Hafe; os dous comisarios da exposición, Ángel Cerviño e Alberto González- Alegre; e o propio artista que sinalou que "co proxecto desta exposición nacín realmente como escultor" e engadiu que quixo incluír na mostra "un cadro recién creado que marca una nueva etapa en mi pintura" o que, dalgún xeito, fai que esta mostra sexa un fito significativo na traxectoria creativa deste extraordinario artista plástico.

Con máis de 30 pezas entre pinturas e esculturas, ‘A orde das primeiras cousas’ é a mostra máis completa que se ten realizado deste importante artista en España. Na actualidade, a súa obra imponse como unha das propostas fundamentais da pintura abstracta española. ‘A orde…’ ocupará toda a planta baixa do centro e poderá visitarse até o 1 de marzo de 2015.

A orde das primeiras cousas
A exposición sita no CGAC explora e vertebra algunhas das series máis recentes do pintor. Nela, Carlos León obxectualiza o acto de pintar. A súa paleta de maxentas, carmíns, azuis prusia, índigos e ocres ten continuidade nos óxidos e os restos de pintura dos elementos recuperados das chatarrerías. Os refugallos industriais presentes nas súas obras compoñen a súa particular linguaxe. Deste xeito, o artista indaga nos xogos que se establecen entre o radical cuestionamento do ilusionismo da súa pintura e a práctica construtiva da súa produción escultórica.

As salas do Centro pobóanse de ferros, táboas, cables e palanganas que se atopan formando esculturas e que dialogan con cadros tamén superpostos e que se elevan sobre o chan con pezas que remiten ao espazo do seu taller. Os obxectos revelan as súas historias e a pegada das persoas que os construíron, os empregaron e os desbarataron. O artista toma estes restos industriais como fragmentos de poemas ou notas musicais para crear os seus propios versos e partituras no espazo expositivo do CGAC.

22 de setembro do 2014 Danza, cinema, vídeo e música encherán o CGAC este outono

Centro Galego de Arte Contemporánea (CGAC)

O Centro Galego de Arte Contemporánea (CGAC) ofrece durante este outono unha oferta diversa de actividades na capital de Galicia. Unha das propostas é a exhibición até o 19 de outubro de ‘Project Moscow’. O proxecto comisariado por Alberto Cartó, consta de videocreacións, realizadas por catro artistas, durante a súa estadía na cidade de Moscú durante o mes de agosto do ano 2012. As obras “The Death of an Owl”, de Marta Alvim; “Los tres estanques”, de Christian García Bello, ademais de “Carta a las generaciones futuras”, creada por Jacobo Bugarín, e “Vladimir x3 el Grande”, de Federico Strate-Pezdirc, nútrense dun proceso de reflexión que xurde da viaxe á capital rusa e do estímulo creativo que supuxo para cada un deles. A cita con “Project Moscow” será no Auditorio do museo nun único pase diario, ás 12,00 horas.

Curso de cine e Documental do mes
O 22 de Outubro dará comezo o curso de cinema “Derivas da Modernidade. Do cinema clásico ao cinema moderno. Intuicións, eclosións e ecos dos novos cinemas da modernidade (1950_1980)”, dirixido por José Manuel López, experto en comunicación audiovisual. O obradoiro terá lugar ata o 6 de maio do vindeiro ano e conta coa colaboración da Vicerreitoría de Estudantes, Cultura e Formación Continua e o Cineclube de Compostela. Está destinado a profesores, estudantes e todas aquelas persoas interesadas no cinema e terá lugar no auditorio do devandito centro de arte. Os alumnos matriculados en calquera dos títulos de grao da Universidade de Santiago de Compostela (USC), poderán solicitar o recoñecemento de 1 crédito pola súa realización. Ademais, a actividade está recoñecida como formación permanente do profesorado pola consellería de Cultura e Educación.

Ademais, a partir do día 30 deste mes, o CGAC acollerá a iniciativa da produtora Parallel 40: “Documental do mes”. O proxecto ten como obxectivo achegar este xénero ao maior número de espectadores posibles e incrementar a presenza do documental europeo nas pantallas cinematográficas. A estrea será coa proxección do filme dirixido polo finlandés Petri Luukkain: “My Stuff” e continuará coa estrea mensual dun documental de temática e procedencia diversa.

Os traballos poderanse ver en versión orixinal subtitulada e a entrada será de balde até completar as localidades.

Danza e música
O festival de Danza: “De corpo e lugar. Artes vivas no museo”, terá lugar os día 25 e 27 de setembro e o 1,2 e 3 de outubro. Está organizado por trasPediante Cultura, coa colaboración da consellería a través da secretaría xeral de Cultura, Agadic e o CGAC. O evento achegará propostas performativas do Ministerio de Asuntos do Movemento de Austria a cargo da autríaca, Amanda Piña e da turca Ayse Orhon, co obxectivo de fortalecer a continuidade entre a danza contemporánea e a acción performativa. O programa divídese en dous ciclos que inclúen actuacións artísticas, obradoiros e presentación de investigadores co fin de afondar nas relacións entre movemento, corpo e produción do espazo público. Todas as actividades propostas son abertas e de balde, agás o obradoiro “O corpo político/ A coreografía no ámbito da desobediencia corporal”, impartido por Amanda Piña e “Apetito pola performance”, conducido por Ayse Orhon.

Ademais desde o vindeiro 3 de outubro arranca unha nova edición das “Xornadas de Música Contemporánea”. Ao longo de todo o mes e ata o 1 de novembro, haberá máis de 18 concertos que recollerán as últimas tendencias e novidades neste terreo. As xornadas promovidas polo CGAC, o Concello compostelán, a Universidade de Santiago e o Centro Nacional de Difusión Musical, darán acubillo, entre outros, á “Cactus Workestra”, dirixida polo artista plástico e sonoro Joao Ricardo de Barros Oliveira, ao “Trío Arbós” ou á Orquestra de Cámara da USC. A intensa actividade despregada durante estes días, completarase cunha sesión na rúa que terá lugar o 4 de outubro, xunto aos concertos de Ensembler e a pianista Elisa Vázquez Dovalás ás 18,30 e ás 20,00 horas respectivamente no CGAC.

Para obter máis información ou realizar inscricións nas actividades que o requiran, o público pode consultar a páxina web http://www.cgac.org/
 

17 de setembro do 2014 O CGAC acolle o curso de cinema ‘Derivas da modernidade'

Centro Galego de Arte Contemporánea (CGAC)

O Centro Galego de Arte Contemporánea, en colaboración co Cineclube de Compostela, acolle o curso de cinema ‘Derivas da modernidade. Do cinema clásico ao cinema moderno. Intuicións, eclosións e ecos dos novos cinemas da modernidade (1950- 1980)’ dirixido por José Manuel López, experto en comunicación audiovisual, e organizado pola Consellería de Cultura, Educación e Ordenación Universitaria. A día de hoxe xa está aberto o prazo de matrícula e os interesados poderán inscribirse nel ata o vindeiro 22 de outubro, día de inicio do mesmo.

O curso traza un panorama xeral sobre a revolución que supuxeron os novas producións cinematográficas nos anos 60, as súas intuicións na década dos 50 e os seus ecos nas décadas posteriores.rUnha revolución que se opuxo ao chamado cinema clásico e que marcou o comezo da modernidade.

A actividade combina sesións temáticas e transversais como o neorrealismo italiano, a Nouvelle Vague ou o novo Hollywood, con outras monográficas dedicadas aos principais cineastas dos anos 50, 60, 70 e 80 como Robert Bresson, Orson Wells, Jean- Luc Godard, Eric Rhomer ou Martin Scorsese entre outros moitos autores. Nas sesións proxectaránse escenas claves para a análise dos filmes máis representativos deste período decisivo da historia do cinema.


O curso, que vai dirixido a profesores, estudantes e todas aquelas persoas interesadas no cinema, terá lugar no auditorio do CGAC os mércores en horario de 19,00 a 20,30 horas, entre o 22 de outubro deste ano e o 6 de maio de 2014.

Os alumnos matriculados en calquera dos títulos de grao da Universidade de Santiago de Compostela (USC) poderán solicitar o recoñecemento dun crédito pola súa realización. Ademais, o curso está recoñecido como formación permanente do profesorado pola Consellería de Cultura, Educación e Ordenación Universitaria.

As persoas interesadas poderán inscribirse a través da páxina web do CGAC ou enviando un correo electrónico a cgac.educacion@xunta.es indicando o seu nome completo, estudos, área de traballo ou interese, un enderezo de correo electrónico e un teléfono de contacto.
 

4 de xullo do 2014 Preséntanse no CGAC as exposicións de Mark Manders e Juan Uslé

Centro Galego de Arte Contemporánea (CGAC)

O conselleiro de Cultura, Educación e Ordenación Universitaria, Xesús Vázquez Abad, presentou hoxe no Centro Galego de Arte Contemporánea (CGAC) as exposicións ‘Curculio bassos’, de Mark Manders, e ‘Luz escura’, de Juan Uslé. En palabras do conselleiro, “son dúas mostras de gran calidade que encherán de contido durante os vindeiros meses os diferentes espazos deste emblemático museo”.

A intervención de Mark Manders, que ocupará toda a planta baixa do CGAC, é a primeira exposición individual en España do artista holandés, unha intervención que conta co apoio da Mondriaan Fonds e que poderá visitarse ata o 12 de outubro de 2014. A primeira planta do CGAC albergará ata o 28 de setembro a exposición ‘Luz escura’, de Juan Uslé, unha creación que conta coa colaboración de Acción Cultural Española e do Kunstmuseum de Bonn, onde estivo exposta anteriormente.

No acto de presentación tamén participaron o secretario xeral de Cultura, Anxo Lorenzo; o director do CGAC, Miguel von Hafe; os artistas Mark Manders e Juan Uslé; o comisario da exposición ‘Curculio bassos’, Javier Hontoria; e o comisario da mostra ‘Luz escura’, Stephan Berg. Esta tarde ás 20,00 horas o conselleiro inaugurará amabas as dúas mostras.

Mark Manders
O conselleiro cualificou a Manders (Volkel, Países Baixos, 1968) como “un dos artistas internacionais máis relevantes das dúas últimas décadas”, e explicou que este escultor foi capaz de crear “un insólito universo que parte do seu xa lendario ‘Self-Portrait as a Building’, unha obra que realizou en 1986 cando tiña tan só 18 anos”.

A intervención ‘Curculio bassos’ reúne traballos realizados en todas as etapas da traxectoria do artista e inclúe obras procedentes de museos como o Stedelijk Museum de Amsterdam, o S.M.A.K de Gante, La Kunsthaus de Zúrich ou a colección Rabobank, ademais doutras procedentes de coleccións privadas. Para esta cita, o artista revisou algúns dos seus traballos anteriores e adaptounos ao propio espazo do CGAC.

A exposición que presenta o CGAC ten tanto de mirada retrospectiva coma de instalación específica. Comprende unha recreación do estudo do artista na cidade belga de Ronse, o lugar onde ese autorretrato se encontra en permanente estado de xestación. A instalación do vestíbulo evoca ese espazo íntimo e decisivo que dá paso a espazos nos que a relación entre os sucesivos traballos se aloxan nun tempo propio, un que a súa vez é unha fusión de diferentes nocións temporais.

Manders representou ao seu país na 55ª Bienal de Venecia, participou na Documenta 11 en 2002 e realizou exposicións en moitos dos museos e centros de arte máis importantes do mundo. Unha variación do traballo que presentou na cita de Kassel, que recibiu o aplauso unánime da comunidade artística internacional, estará presente no Dobre Espazo do CGAC.

Juan Uslé
Respecto ao artista cántabro, o conselleiro asegurou que “posúe unha capacidade extraordinaria para mesturar a linguaxe metapictórica co xestual e o corporal, logrando compoñer unhas obras que lle levaron a gañar no ano 2002 o Premio Nacional de Artes Plásticas e acadar un gran recoñecemento internacional”.

Juan Uslé (Santander, 1954) leva traballando dende os anos noventa nunha serie de cadros que se coñecen como as súas pinturas negras e que ocupan un lugar central no conxunto da súa obra. Nelas, dialoga coa historia da pintura dende Goya ata Reinhardt, entendendo o negro como unha cor de transgresión do visible ao invisible, cuxa impenetrabilidade leva a unha mirada interior.

En total, as salas da primeira planta do CGAC mostrará 20 pinturas da serie ‘Soñé que revelabas’, a maior parte delas realizadas de noite, nas que Uslé reflexiona sobre as condicións estruturais da pintura e sobre o propio proceso de pintar. Estas pezas están determinadas tanto pola emocionalidade como polos impulsos conceptuais característicos de toda a obra de Uslé.

Xesús Vázquez Abad despediuse agradecendo a presenza dos artistas e comisarios hoxe no CGAC. O conselleiro mostrouse convencido de que estas dúas mostras “non deixarán indiferentes a ninguén” e animou a todos os cidadáns a achegarse a este museo para gozar delas.

16 de abril do 2014 O CGAC presenta unha exposición do arquitecto Alejandro de la Sota con motivo do centenario do seu nacemento

Centro Galego de Arte Contemporánea (CGAC)

Xesús Vázquez Abad na presentación das novas exposicións do CGAC
Xesús Vázquez Abad na presentación das novas exposicións do CGAC

O conselleiro de Cultura, Educación e Ordenación Universitaria, Xesús Vázquez Abad, presentou esta mañá as novas exposicións do Centro Galego de Arte Contemporánea (CGAC), un total de catro mostras que poderán visitarse no centro desde esta tarde, dedicadas á arquitectura de De la Sota, á Colección CGAC, á obra de Misha Bies Golas e á fotografía de Paco Rocha. Durante a rolda de prensa o conselleiro estivo acompañado polo secretario xeral de Cultura, Anxo Lorenzo; polo director do centro, Miguel von Hafe; e polo comisario da mostra de De la Sota, Moisés Puente. O acto de apertura das exposicións realizarase esta tarde ás 20 horas, coa presenza do secretario xeral e do director do CGAC.

Percorrido por De la Sota
A primeira planta do centro albergará ata o vindeiro 15 de xuño ‘100 anos con Alejandro de la Sota’, unha exposición conmemorativa organizada en colaboración coa Fundación Alejandro de la Sota e a Fundación ICO. A mostra realiza un extenso percorrido pola vida, a obra e o maxisterio do arquitecto pontevedrés, unha das figuras coa traxectoria máis relevante e intensa da historia recente da arquitectura española, que se adscribiu na posguerra española aos postulados da modernidade europea e americana en conexión coa obra de arquitectos como Mies van der Rohe.

A exposición, que conta con material biográfico, debuxos, bocetos, fotografías, maquetas e mobles deseñados por el e custodiados pola súa fundación, fai un percorrido pola súa traxectoria, parándose nas diferentes etapas da súa produción.

Alejandro de la Sota (Pontevedra, 1913- Madrid, 1996) está considerado como un dos mestres da arquitectura española do século XX, labor polo que recibiu numerosos premios nacionais de arquitectura e a Medalla de Ouro ao Mérito das Belas Artes. A súa obra, coñecida internacionalmente, foi obxecto de exposicións en lugares como a Universidade de Harvard ou a Architectural Association de Londres.

Profesor na Escuela Técnica Superior de Arquitectura de Madrid (ETSAM), a súa estela serviu de referencia a varias xeracións de arquitectos españois. Tras obter o título de arquitecto en 1941, traballou no Instituto Nacional de Colonización, unha etapa que culminou coa construción do pobo de Esquivel (Sevilla, 1952-1963) e a casa Arvesú (Madrid, 1953-1955). A partir de entón marca unha liña de traballo que precede ao Goberno Civil de Tarragona (1957-1964), considerada a súa obra mestra. Nesa prolífica época realiza ademais a súa obra máis recoñecida, o Ximnasio do Colexio Maravillas (Madrid, 1960-1962) considerado polo crítico británico William Curtis a obra máis salientable da arquitectura española contemporánea. Na década dos sesenta explora as posibilidades de novos materiais en obras como a Casa Varela en Vilalba (Madrid, 1964-1968); culminando a súa traxectoria nos oitenta co edificio de Correos e Telecomunicacións en León (1981-1984).

Actividade expositiva
Ademais, Vázquez Abad presentou hoxe outras tres mostras que poderán visitarse do 16 de abril ao 15 de xuño de 2014 neste espazo. Baixo o título ‘Col.’ e comisariada por Miguel von Hafe as salas da planta baixa do centro abriranse ao público cunha mostra sobre as últimas adquisicións da Colección CGAC centrada na obra de artistas galegos, nacionais, portugueses e latinoamericanos como François Bucher, Fermín Jiménez Landa, André Sousa, André Cepeda, Suso Fandiño, Vicente Arrieta, Usue Arrieta & Vicente Vázquez, Chelo Matesanz, Fabio Morais, Waltercio Caldas, Pamen Pereira, Patricia Esquivias, Loreto Martínez Troncoso, Gabriel Pericás e José Luis Seara.

Así mesmo, o CGAC acollerá ‘27 Negros’, do artista galego Misha Bies Golas, unha obra coral integrada por 27 monocromos negros composta por 27 artistas (Teo Soriano, Nacho Martín Silva, Carlos Maciá, Mikeldi Pérez Urkijo, Nuria Fuster, Alain Urrutia, Antonio González, Din Matamoro, Miren Doiz, Manuel Eirís, Julia Spínola, Guillermo Pfaff, José Manuel Vidal Vidal, Ion Macareno, Amaya González Reyes, Kiko Pérez, Xoan Torres, Juan López, Ian Waelder, Diego Vites, Jorge Varela, Dai KS, Kepa Garraza, Vítor Mejuto, Ángela Cuadra, Suso Fandiño e Mar Vicente).

Ademais, o centro albergará a exposición fotográfica ‘Naturalmente humano’, de Paco Rocha, comisariada por Christina Ferreiro.

4 de abril do 2014 O CGAC presenta 'As miñas cousas en observación', a primeira retrospectiva en España de Chelo Matesanz

Centro Galego de Arte Contemporánea (CGAC)

A Consellería de Cultura, Educación e Ordenación Universitaria presentou esta mañá no Centro Galego de Arte Contemporánea (CGAC) ‘As miñas cousas en observación’, a primeira exposición retrospectiva da artista Chelo Matesanz en España. A mostra, que se inaugura hoxe, 4 de abril, ás 20:00 horas, reúne máis de cen pezas da artista desde os seus primeiros traballos a principios dos anos noventa ata a actualidade, entre as que se inclúen obras nunca antes expostas e unha instalación específica para as salas do CGAC.

Trátase dunha “panorámica de gran significado sobre unha das artistas máis singulares e relevantes da súa xeración, que desenvolve na súa obra o seu compromiso persoal coa plástica sobre a base da autenticidade, da exploración técnica e de elementos emocionais”. Así o explicaba esta mañá o secretario xeral de Cultura, Anxo Lorenzo, na rolda de prensa de presentación da mostra, onde estivo acompañado pola propia artista, pola comisaria da exposición, Chus Martínez; e polo director do CGAC, Miguel von Hafe.

No seu traballo, Matesanz reflexiona acerca de cuestións relacionados coa práctica artística. Cuestiona as categorías e os xéneros tradicionais da arte poñendo en dúbida as habilidades técnicas e conceptos como a xenialidade do artista e a orixinalidade da obra de arte, entre outros. Na súa obra constrúe unha complexa cartografía de temáticas e procedementos principalmente pictóricos subvertidos desde o humor e a crítica.

As salas do CGAC acollen esculturas, vídeos, pinturas, instalacións, costuras e colaxes espallados en catro territorios metafóricos diferenciados que atenden a cuestións fundamentais e recorrentes na obra da artisa. Temas como a infancia, a violencia, o humor, a sexualidade, as iconas infantís ou a enfermidade afróntanse baixo a súa singular mirada, que batalla contundentemente cos condicionantes sociais, artísticos e culturais arredor da muller e da súa representación. Un feminismo que Chelo Matesanz aborda tanto desde a simpatía como desde a disidencia e a ironía.

Obradoiro ‘Sexualidade metafórica’
Como complemento á exposición, Chelo Matesanz propón un taller relacionado coa súa obra e centrado na sexualidade como linguaxe. A actividade, que se realizará do 8 ao 10 de abril, en horario de 17:00 a 20:00 horas, está dirixida a todo tipo de público interesado nas artes plásticas, a expresión artística e no tema proposto no taller, polo que non é necesario ter un coñecemento previo da arte.

Ao longo destes tres días levaranse a debate os códigos de comunicación, os modos e os modelos colectivos da sociedade contemporánea. Analizarase a sexualidade agochada nos textos e nas imaxes que se valen de metáforas, figuras retóricas e recursos que alteran ou multiplican os seus significados.

O taller consistirá en construír metáforas a través de situacións, obxectos, imaxes ou textos. As pezas crearanse para exhibirse no Espazo de Proxectos do CGAC.

Artista vinculada a Galicia
Chelo Matesanz (Reinosa, Cantabria, 1964) mantén unha vinculación profesional e persoal con Galicia desde hai moitos anos profesionalmente e persoalmente a Galicia. É profesora titular de Pintura na Facultade de Belas Artes de Pontevedra, onde impartiu docencia ao longo dos últimos vinte anos.

A súa traxectoria artística deriva da actividade iniciada en 1986. Desde entón realizou múltiples exposicións individuais e colectivas. Obtivo a bolsa de formación e axuda a investigadores do departamento de Cultura, Universidades e Investigación do Goberno Vasco e a bolsa da fundación Marcelino Botín, Santander. Participou na ‘Mostra de arte nova’ do Ministerio de Cultura e recibiu o Premio JASP ao mellor artista novo en Arco 96. Ten obras en coleccións de distintas entidades públicas e privadas como a Fundación Coca-Cola, a Colección Testimoni, a Deputación de Murcia, Artiumou o Centro Galego de Arte Contemporánea.

22 de marzo do 2014 O CGAC abre a exposición 'The mind on fire', do artista estadounidense James Welling

Centro Galego de Arte Contemporánea (CGAC)

A Consellería de Cultura, Educación e Ordenación Universitaria presenta no Centro Galego de Arte Contemporánea (CGAC) a primeira individual institucional de James Welling en España. The Mind on Fire é o título desta exposición do artista estadounidense, que poderá visitarse no CGAC desde hoxe ata o próximo 16 de xuño.

A mostra, que foi presentada esta mañá polo secretario xeral de Cultura, Anxo Lorenzo; polo director do CGAC, Miguel von Hafe; e mais polo comisario, Anthony Spira; conta con máis de cento cincuenta obras que recrean algunhas das principais exposicións neoiorquinas deste artista nos anos oitenta. A través desta exposición, o artista reflicte a evolución da súa linguaxe abstracta e a súa experimentación con efectos fotográficos.

Xunto con figuras como Barbara Kruger e Cindy Sherman, Welling foi membro da Pictures Generation; un grupo de artistas radicado en Nova York moi influente na década dos setenta e oitenta que logrou que a fotografía fose integrada pouco a pouco como a disciplina máis popular da arte contemporánea.

Achegamento á esencia da percepción
A exposición inclúe colaxes, cadros, notas e outros obxectos de vocación experimental nos que o autor cuestiona os parámetros da fotografía poñendo o acento en cómo vemos por enriba do que vemos. Welling traballa con motivos simples e repetitivos cos que pretende aproximarse á esencia da percepción.

Esta tarde, ás 20:00 horas, o secretario xeral de Cultura inaugurará de xeito oficial a exposición.

23 de febreiro do 2014 Cultura e Educación organiza a vindeira semana no CGAC o proxecto ‘Queres ser arte contemporánea? Diálogos con Camilo Franco’

Centro Galego de Arte Contemporánea (CGAC)

A Consellería de Cultura, Educación e Ordenación Universitaria organiza do 26 de febreiro ao 1 de marzo no Centro Galego de Arte Contemporánea (CGAC) o proxecto ‘Queres ser arte contemporánea? Diálogos con Camilo Franco’. Esta acción enmárcase dentro do programa de actividades paralelas e complementarias á mostra ‘93’, coa que o museo conmemora o seu vixésimo aniversario.

O xornalista e crítico cultural, Camilo Franco, entrevistará aos visitantes do CGAC para rexistrar cal é o nivel de implicación, de atención, de dedicación ou de interpretación que os espectadores teñen respecto ás obras de arte contemporánea que se exhiben neste centro. O público poderá participar desde a experiencia, desde a fantasía, desde a curiosidade ou desde a descrenza na arte.

Os encontros, que se desenvolverán do 26 de febreiro ao 1 de marzo en horario de 11,00 a 20,00 horas, durarán arredor de 15 minutos e tomarán como punto de partida o hall do CGAC para internarse a continuación na mostra ‘93’, que ocupa os tres andares do centro. A interacción comezará polas motivacións xerais para ir entrando nos detalles da interpretación segundo as preferencias dos espectadores.

A cada unha das persoas entrevistadas faráselle un retrato no espazo que elixa ou coa peza que escolla, procurando que as imaxes establezan unha relación entre o espectador e a obra. O resultado destes diálogos compartiranse diariamente no blog http://artecontemporaneacgac.wordpress.com que se poderá acceder a través da páxina web do CGAC.

As persoas interesadas poderán participar neste traballo de xeito espontáneo ou ben concertando unha cita a través do correo electrónico cgac.educacion@xunta.es

Recoñecido profesional
O xornalista Camilo Franco (Ourense, 1963) desenvolveu varios proxectos culturais, entre as que destacan o seu papel como comisario na mostra colectiva Paralelo 42 (Casa da Parra, 1989) ou a transformación nunha exposición dos relatos do seu libro ‘Palabras contadas’ (Fundación Luís Seoane, 2007).

Tamén deselvoveu outras iniciativas como o os proxectos nos que traballa cos espectadores a través de experiencias como ‘Queres ser un personaxe de novela?’ (Culturgal, 2011) ou ‘Queres ser ou non un personaxe de teatro?’ (Fiot, 2012). Asemade, ten publicadas varias obras de narrativa: A lúa no cénit (Ediciós do Castro, 1988), En malos pasos (Xerais, 1995), Por conto alleo(Vieiros, 1999; Galaxia, 2003) e Palabras contadas (Xerais, 2007).