Museos de Galicia

Museo de Belas Artes da Coruña

20 de xaneiro do 2017 O Museo de Belas Artes da Coruña amplía a súa colección coa obra O discurso, de Díaz Pardo

Museo de Belas Artes da Coruña

O Museo de Belas Artes da Coruña vai incorporar á súa colección a obra ‘O discurso’, de Isaac Díaz Pardo, despois de que a Deputación da Coruña cedese o cadro realizado polo intelectual e galeguista no ano 1946 á Consellería de Cultura, Educación e Ordenación Universitaria da Xunta de Galicia. A cesión favorecerá o acceso da cidadanía a esta obra a través do devandito museo de xestión autonómica.

O secretario xeral de Cultura, Anxo Lorenzo; o presidente e a vicepresidenta da Deputación, Valentín González e Goretti Sanmartín, respectivamente; e a directora do Museo de Belas Artes, Ángeles Penas, participaron hoxe no acto de cesión desta obra artística de gran valor, realizada por unha figura excepcional da cultura galega como é Díaz Pardo, tanto desde o punto de vista artístico como desde a súa faceta fundamental de promotor empresarial e cultural. Así o asegurou o secretario xeral de Cultura, quen destacou “a conservación, a posta en valor e a difusión do noso patrimonio cultural” como os principais obxectivos desta colaboración institucional entre os gobernos autonómico e provincial.

Segundo explicou Anxo Lorenzo, o depósito do lenzo no Museo de Belas Artes facilitará o acceso á obra por parte de toda a cidadanía, que proximamente se poderá visitar na sala de arte galega do século XX do museo.

Díaz Pardo no Museo de Belas Artes

Ademais de ampliar a colección permanente, coa incorporación á súa colección da obra ‘O discurso’, o Museo de Belas Artes da Coruña enriquece e completa a presenza de Díaz Pardo nela, representada na actualidade por tres pezas de pequeno formato: os óleos ‘Nu’ e ‘Xentes que ollan’ –o primeiro foi un depósito do propio autor e o segundo, unha doazón de Maruxa Seoane, muller do pintor Luís Seoane– e a pintura sobre madeira Cruz con Santiago Peregrino, doada por José Seijo Rubio.

“Ese home excepcional que foi Díaz Pardo pintou ‘O discurso’ na mesma década na que nacía a colaboración entre a Deputación da Coruña e o Museo de Belas Artes”, explicou o secretario xeral. Foi concretamente en 1944 cando se produciu o primeiro depósito de obras na antiga sede do museo, con pezas de Ovidio Murguía, Imeldo Corral e Juan Luis López.

Desde entón, foron diversas as pezas que a Deputación depositou na colección permanente do museo, de autores e de autoras galegos de referencia como Laxeiro, Prieto Nespereira, Felipe Bello, Carlos Maside ou Manuel Colmeiro, así como doutros autores fundamentais como Francisco Goya, coa cesión de álbums de gravados do artista en 1983, concretamente, 80 estampas da serie ‘Los desastres de la guerra’ e outras 80 estampas da serie ‘Los caprichos’.

Cunhas dimensións de 1,66 x 1,96 metros, a peza ‘O discurso’ está datada en 1946, década na que Isaac Díaz Pardo abandona a influencia da pintura académica para decantarse por un estilo cada vez máis personalizado. Como ocorre co resto de obras desta época, o tema central é a figura humana, recreada en amplos volumes e cun gran protagonismo do debuxo.

Galería

  • Imaxe da presentación

  • Imaxe da presentación

  • Imaxe da presentación

28 de abril do 2016 Presentación do número 1 do Boletín do Museo de Belas Artes, cun monográfico sobre arte e emocións

Museo de Belas Artes da Coruña

Presentación do boletín
Presentación do boletín

O Museo de Belas Artes da Coruña súmase á actividade editorial desenvolvida por tantos outros museos que, dende hai anos, xa sexa a través das súas asociacións de amigos ou directamente, editan boletíns nos que publican periodicamente o resultado das súas actividades e investigacións ata converterse, nalgúns dos casos, en publicacións de referencia non marco da comunidade educativa e no ámbito da cultura en xeral.

Número 1. Monográfico arte e emocións
O primeiro número deste boletín presentouse ao público en forma de monográfico, no que se recollen as conferencias presentadas con motivo das xornadas celebradas o pasado outubro de 2014 no Museo de Belas Artes, e organizadas en colaboración coa Universidade Internacional Menéndez Pelayo.  

A presentación levouse a cabo o 14 de abril no Salón de Actos do Museo e nela participaron Anxo M. Lorenzo Suárez (secretario xeral de Cultura da Xunta de Galicia), Ángeles Penas Truque (directora do Museo) e Domingo Bello Janeiro (director da UIMP Galicia)

Iniciase así unha nova etapa para o Museo de Belas Artes, no que o seu equipo se propón traballar e responsabilizarse para facer deste boletín unha publicación de referencia, onde lles move a vontade de manter unha excelencia e un nivel intelectual, asumindo o compromiso de orientala de acordo coas directrices que actualmente definen a calidade da xestión editorial e os contidos das revistas académicas.

Non nos cabe dúbida algunha de que esta publicación, dirixida non só a historiadores da arte, artistas, arquitectos, especialistas en estética, investigadores e profesionais relacionados coa historia, a práctica e a teoría das artes, senón tamén a todos aqueles públicos interesados en coñecer e afondar sobre os fondos do museo, a súa actividade e as súas funcións, terá unha importante repercusión en todos os ámbitos do coñecemento.

Contidos do Boletín:

  • Presentación. Ángeles Penas Truque. Directora do Museo de Belas Artes da Coruña
  • Emoción en el rostro, conmoción en el alma: imágenes religiosas en la pintura barroca española. Mª del Mar Albero Muñoz. Universidad de Murcia
  • Panorama sobre la unión de risa y llanto en la obra de Baltasar Gracián. Aurora González Roldán. Universidad Nacional Autónoma de México
  • Las formas simples de la imagen en el arte prehistórico. José Carlos Bermejo Barrera / Mar Llinares García. Universidad de Santiago de Compostela
  • Renuncia al amor y brujería. Un motivo religioso en el cine de Hollywood. María Tausiet. Doctora en Historia por la Universidad de Zaragoza
  • Afectos y pasiones en tratados de retórica y técnica vocal. Del stile rappresentativo al bel canto. Lucía Díaz Marroquín. Universidad Complutense de Madrid
  • La arena y el viento. Las emociones en la medicina del romanticismo alemán. Luis Montiel. Universidad Complutense de Madrid
  • La economía moral de la ambición o el deseo inmoderado de elevación. Javier Moscoso Sarabia. Instituto de Historia. Consejo Superior de Investigaciones Científicas (CSIC)

 

8 de abril do 2015 A exposición O primeiro Picasso leva recibidas máis de 30.000 visitas

Museo de Belas Artes da Coruña

O secretario xeral de Cultura, Anxo Lorenzo, e o alcalde da Coruña, Carlos Negreira, presentaron esta mañá o catálogo da exposición ‘O primeiro Picasso. A Coruña 2015’, que xa foi visitada desde a súa inauguración, o pasado 19 de febreiro, por 30.056 persoas e que permanecerá no Museo de Belas Artes da Coruña ata o vindeiro 24 de maio.

O secretario xeral de Cultura afirmou que, cando se clausure a mostra, -que aborda de xeito exclusivo, por vez primeira, a etapa coruñesa do pintor-, “o seu catálogo nos permitirá conservar a memoria deste destacado proxecto expositivo, así como tamén acceder á reflexión científica que conteñen as súas páxinas, de diversa autoría”.

“Esta valiosa publicación ábrenos as portas para afondar na traxectoria vital e creativa dunha das figuras máis relevantes da historia universal da arte”, asegurou Anxo Lorenzo durante a presentación, na que tamén participou Manuel Mosquera en representación do museo. Ademais, referiuse ao interese do catálogo para favorecer o intercambio cultural con centros museísticos tanto do resto do Estado español como do exterior, así como cos prestamistas das obras que conforman a exposición.

Neste sentido, recordou que, de xeito habitual, o Museo de Belas Artes da Coruña, de titularidade estatal e xestionado pola Consellería de Cultura, Educación e Ordenación Universitaria, vén realizando un intercambio de publicacións sobre as súas exposicións con máis de 80 museos de España e do estranxeiro, “o que nos permite dar a coñecer en todo o mundo o traballo realizado polos nosos centros museísticos”.

Un catálogo con destacadas contribucións
Xunto coas achegas da comisaria da exposición, Malén Gual, e da directora do museo, Ángeles Penas, a publicación inclúe unha contextualización histórica a través da que Xosé Ramón Barreiro se aproxima á cidade herculina na que Picasso viviu entre os anos 1891 e 1895. Os debuxos de Picasso na Escola de Belas da Coruña centran a contribución de Elena Pardo, que, xunto con Rubén Ventureira, fai un percorrido polo bestiario predilecto do pintor, con especial paixón pola tauromaquia, as pombas e os cabalos.

Rubén Ventureira recupera para o catálogo as colaboracións ilustradas de Picasso en xornais e revistas da época, mentres que Antón Castro ofrece unha imaxe do costumismo e do paisaxismo que o mozo Pablo Ruiz aborda nas súas primeiras escenas populares, como representación da Galicia marítima e rural do seu tempo.

Rafael Inglada afonda nos cadernos de Picasso nos que se albiscan debuxos que incorporará posteriormente á súa produción artística, mentres que Eduard Vallés se centra no seu artigo nos comezos do pintor malagueño como retratista. Tamén inclúe o catálogo o traballo de Marilyn McCully sobre os modelos picassianos, dos que destacan “A rapaza dos pés descalzos”, “O home da gorra” ou o retrato de seu pai realizado na Coruña.

Outra das colaboracións coas que conta o catálogo é a de César Antonio Molina, que analiza a pegada cultural que no pintor deixou A Coruña, unha cidade á que non regresará, malia que manterá contacto e amizade con artistas e escritores galegos como Luís Seoane, Celso Emilio Ferreiro e Camilo José Cela.

A etapa galega do pintor, en máis de 200 pezas
No marco do período que o pintor pasou na cidade herculina, entre 1891 e 1895, a mostra reúne máis de 200 pezas –81 delas do propio Picasso– que xiran a redor de catro grandes eixos artísticos: a súa obra na Coruña, a obra posterior ao seu paso pola cidade pero que garda relación co período galego, a obra doutros pintores galegos contemporáneos á estancia do artista na cidade e material diverso do século XIX vinculado coa obra realizada polo artista malagueño en Galicia.

Baixo unha estrutura cronolóxica, a exposición aborda 11 núcleos temáticos como son o contexto histórico, a formación académica, o bestiario (animais como pombas ou touros, elementos simbólicos recorrentes que se converterán en icónicos na súa obra), xornais e caricaturas, cadernos, paisaxes, costumismo, familia, retratos, morriña e fotografías.
A exposición, que se presenta como un dos eventos máis destacados da axenda cultural de Galicia en 2015 e tamén como unha iniciativa destacada a nivel estatal, está promovida polo Concello da Coruña e a Fundación Emalcsa, xunto coa colaboración da Consellería de Cultura e Educación da Xunta de Galicia.

6 de marzo do 2015 O Museo de Belas Artes ofrece unha ampla bibliografía sobre a vida e a obra de Picasso

Museo de Belas Artes da Coruña

Con motivo da actual exposición temporal "O primeiro Picasso. A Coruña 2015", o Museo de Belas Artes da Coruña lembra que a súa biblioteca conta cunha amplia bibliografía sobre a vida e a obra de Picasso, que se achega aos 140 títulos.

Na seguinte ligazón pódese acceder ao catálogo para realizar a busca. Todas as publicacións se poden consultar na propia biblioteca segundo as condicións establecidas na web do museo.

De entre todas elas, o Museo de Belas Artes realizou unha pequena selección daquelas publicacións onde aparece obra da súa etapa coruñesa, ou onde se fala da súa vida neses anos, que se pode consultar nun taboleiro en Pinterest.

22 de outubro do 2014 A arte e as emocións centran o encontro que se celebra no Museo de Belas Artes da Coruña

Museo de Belas Artes da Coruña

O Museo de Belas Artes da Coruña da Consellería de Cultura, Educación e Ordenación Universitaria acolle desde hoxe e ata o venres 24 de outubro a actividade ‘Arte e emocións’, un encontro promovido pola Universidade Internacional Menéndez Pelayo (UIMP) para abordar o estudo das prácticas, os obxectos e as representacións das emocións ao longo da historia da arte.

Este espazo para a reflexión, o debate e a posta en común de coñecementos foi inaugurado hoxe polo director director da UIMP de Galicia, Domingo Bello; pola directora do museo, Ángeles Penas; e polo secretario xeral de Cultura, Anxo Lorenzo, quen destacou as diversas perspectivas que abordará o encontro, como a presenza das emocións nas diversas manifestacións artísticas, a súa capacidade para favorecer a creación e as sensacións producidas no espectador.

Para isto, o curso presenta unha vía de aproximación histórica, que tratará de situar as obras no marco da cultura, a situación social e a estética predominante en determinadas épocas, como a antigüidade clásica, o medievo ou o Barroco; e unha vía de carácter temático, en función da iconografía e os seus significados.

Visión especializada e inédita
Atendendo ao carácter transversal do proxecto, o encontro conta cun grupo de especialistas de disciplinas diversas como a historia cultural, a antropoloxía, a historia da ciencia, a filosofía, a historia da arte e a literatura. “Eles e elas, recoñecidos investigadores e investigadoras de diversas universidades que traballaron na materia ou que o están a facer na actualidade, a través de publicacións, artigos, exposicións etc., serán os encargados de guiar ese achegamento á arte e ás emocións, para ofrecer unha visión especializada e rigorosa, e, nalgúns casos, tamén practicamente inédita”, afirmou Anxo Lorenzo.

A risa e o pranto na obra de Baltasar Gracián, as emocións no rostro en imaxes relixiosas da pintura barroca española, as paixóns e o pensamento no mundo antigo, as emocións no cine, os sentimentos no romanticismo alemán, a expresión na pintura do século XIX, os afectos en tratados de retórica e técnica vocal, as paixóns da modernidade e as emocións a través do corpo na arte contemporánea son algúns dos temas que se abordarán desde hoxe ata o venres 24 de outubro neste encontro.

18 de setembro do 2014 O Museo de Belas Artes achégase á arquitectura contemporánea suíza

Museo de Belas Artes da Coruña

O Museo de Belas Artes da Coruña ofrece desde hoxe a mostra ‘Paisaxe e sustentabilidade na arquitectura contemporánea Suíza’, que reúne en catro apartados como se configura a arquitectura do país alpino contemporáneo e cal son as súas ofertas para o público. Esta selección de obras revela tendencias en torno ao coidado do ambiente natural ou á integración deste nos tecidos urbanos.

A exposición foi inaugurada polo conselleiro de Cultura, Educación e Ordenación Universtaria, Xesús Vázquez Abad, acompañado do embaixador de Suíza en España, Thomas Kolly; do delegado do goberno en Galicia, Samuel Juárez e do secretario xeral de Cultura, Anxo Lorenzo.

Esta exposición itinerante aglutina pezas procedentes de dúas mostras que chegan por primeira vez a España. Por unha banda “Swiss Positions: 33 takes on sustainable approaches to building”, presenta a través de excelentes fotografías, unha visión complexa da cuestión do desenvolvemento sostible e, por outra, “The Swiss Touch in Landscape Arquitecture” que ofrece un percorrido pola tradición, a actualidade e o futuro da arquitectura da paisaxe no país helvético, campo de probas dalgunhas das máis interesantes investigación recentes.

Con esta exposición o Museo de Belas Artes continúa a aposta por manter na súa programación mostras dedicadas ás diversas tendencias da arquitectura, neste caso en colaboración coa Escola de Arquitectura da Coruña e a Embaixada de Suíza en España.

O titular de Cultura e Educación subliñou na súa intervención que “o obxectivo desta mostra non é outro que aproximarnos aos autores suízos e aos seus proxectos de especial interese, para tratar de xerar un pensamento crítico entre arquitectura e sustentabilidade”. Vázquez Abad rematou facendo un recoñecemento expreso á Embaixada de Suíza en España “por achegarnos a riqueza da súa arquitectura, a súa capacidade de innovación e beleza, como referente de país avanzado a nivel mundial”.

Composición da mostra
O primeiro bloque da mostra está baseado na contextualización “alpina” da arquitectura contemporánea Suíza, o que supón un tema de vital importancia para un país dotado dunha xeografía montañosa. A pesar de todos os problemas ambientais que xera o turismo alpino, e incluso a acumulación de chalets estandarizados sobre os outeiros, atopamos obras sublimes, como a capela de San Bieito, que deseñou en 1988 en Sumvitg Peter Zumthor. Sen dúbida, o máximo representante da nova arquitectura suíza. No seu país natal, o arquitecto concentrou a súa creatividade nesta capela que retoma os arquetipos construtivos locais e os converte nunha solución contemporánea que aumenta, sen destruír, a paisaxe cultural.

O segundo apartado está formado polas paisaxes rurais e suburbanas, onde se atopa a presenza sobresaínte da infraestrutura, na que neste país destaca o creador Robert Maillart, como un enxeñeiro visionario del século XX temperán, cuxas pontes xa son un patrimonio da historia. Seguindo nesta tradición atópanse obxectos sobresaíntes como o estadio Letzigrund en Zurich, deseño dos arquitectos Bétrix & Consolascio do ano 2007, pero tamén tarefas de pequena escala como a ponte peonil do pobo de Vals, que concibiron Conzett, Bronzini, Gartmann en 2009.

Na terceira sección, o suburbano, coinciden a construción de signos sobresaíntes como a escola que Bonnard & Woeffray proxectaron no ano 2009, e que outorga valor simbólico á educación das masas suburbanas; e a orientación cara os espazos interiores, en alta densidade, para gañar espazos libres nas aforas, como o concibiron Guidotti Architetti en 2010 na casa Forini, en Monte Carasso.

O final do percorrido atopamos o contexto urbano, en especial na capital financeira Zurich, pero tamén en Basilea, onde no 2005 o despacho de Diener & Diener realizou unha estrutura complexa e atractiva para o Forum do Campus da empresa Novartis, ou en Berna, onde o despacho :mlzd fixo no 2009 unha extensión ao Museo Histórico, un cubo cuberto de espellos, que reflexa a valiosa substancia arquitectónica histórica na cidade helvética.

30 de xullo do 2014 Unha mostra conmemorará no Museo de Belas Artes da Coruña o 120 aniversario da primeira exposición de Picasso na cidade

Museo de Belas Artes da Coruña

A consellería de Cultura, Educación e Ordenación Universitaria, o Concello da Coruña e mais a Fundación EMALCSA subscribiron hoxe un convenio de colaboración a través do cal conmemorarán o 120 aniversario da primeira exposición de Pablo Picasso na cidade cunha mostra que albergará o Museo de Belas Artes – dependente da Consellería- entre febreiro e maio de 2015. O conselleiro, Xesús Vázquez Abad, e o alcalde e presidente da devandita Fundación, Carlos Negreira, asinaron hoxe este acordo, que se enmarca na programación que a cidade herculina dedicada ao pintor malagueño durante o vindeiro ano, precisamente recordando este fito significativo da pegada do artista na Coruña.

A exposición funcionará como o eixe principal da conmemoración do evento ‘120 anos da Primeira Exposición de Picasso. A Coruña, febreiro-maio de 2015’. Consellería asumirá a organización e difusión da propia exposición, a restauración das pezas que o precisen, a catalogación e dixitalización do material que se utilice na mostra, así como toda a programación didáctica e de conferencias que se vincule á mesma.

Durante a sinautura tamén estiveron presentes o secretario xeral de Cultura, Anxo Lorenzo; a delegada territorial da Xunta en Coruña, Belén do Campo; a concelleira de Cultura da Coruña, Ana María Fernández; a comisaria da mostra, Malén Gual; e a directora do Museo de Belas Artes, Ángeles Pensas.

O Museo de Belas Artes, un espazo idóneo
Vázquez Abad amosou a súa satisfacción por que o Museo de Belas Artes poida acoller esta mostra, “o que é unha clara mostra da excelencia e alta cualificación do traballo do persoal deste centro, así como de que as condicións necesarias de conservación e de seguridade que reúne o museo fan del o espazo idóneo para acoller a exposición”. “Os meus agradecementos -engadiu- ao Museo de Belas Artes polo labor dinamizador da cultura que desenvolve na sociedade coruñesa e pola súa activa implicación nesta efeméride picassiana que celebraremos o ano próximo”.

Así mesmo, felicitou ao Concello pola programación de actividades que está a preparar para celebrar esta efeméride picassiana no 2015, “coa que dá o paso definitivo para reafirmar á Coruña como a terceira desas cidades españolas, xunto con Madrid e Barcelona, nas que Picasso forxou a súa personalidade artística”.

2 de xullo do 2014 O Museo de Belas Artes acolle a presentación do libro-cd 'Doce canciones gallegas'

Museo de Belas Artes da Coruña

A Consellería de Cultura, Educación e Ordenación Universitaria acollerá no Museo de Belas Artes a presentación do disco-libro ‘Doce canciones gallegas’ mediante un miniconcerto mañá no Museo de Belas Artes da Coruña ás 19.30 horas. Nel, Begoña Salgueiro e Brais González interpretarán dúas das `Doce cancións galegas´.

A colaboración da soprano e o pianista achega música contemporánea con textos poéticos clásicos da literatura galega. A colección, reúne importantes compositores españois como Rosalía De Castro, Cabanillas, Curros Enríquez ou Leiras Pulpeiro. Na súa publicación, tamén participaron outras figuras coma os profesores Luís Costa e Xosé Carlos Bermúdez, e a artista plástica Menca Estévez.

A peza, é froito dunha encomiable tarefa de investigación e creatividade multidisciplinar, aportando como principal novidade a gravación conxunta dos doce temas, levada a cabo no Auditorio de Galicia baixo o patrocinio de Radio Galega e o selo da editorial Andavira. A súa existencia supón a recuperación e difusión dun importante patrimonio poético-musical, practicamente descoñecido para o público galego.

A iniciativa de Antonio Fernández-Cid
`Doce canciones gallegas´ fíxose orixinariamente realidade, hai 63 anos, grazas ao empeño do crítico musical galego Antonio Fernández-Cid, quen acadou que a Deputación ourensá encargara doce pezas musicais a algúns dos máis destacados compositores de mediados do século XX. As pezas foron estreadas o 15 de xuño de 1951 pola soprano Carmen Pérez Durías e a pianista Carmen Díaz Martín na cidade de Ourense. As mesmas intérpretes foron tamén protagonistas da estrea madrileña, que tivo lugar unha semana despois, o 22 de xuño, baixo o patrocinio do Centro Galego.

26 de xuño do 2014 "2naFronteira" propoñen no Museo de Belas Artes da Coruña un percorrido musical pola poesía de Díaz Castro

Museo de Belas Artes da Coruña

O Museo de Belas Artes da Coruña da Consellería de Cultura, Educación e Ordenación Universitaria será o escenario da presentación do novo disco do grupo 2naFronteira, ‘Zapatiños para Díaz Castro’, na cidade herculina. Carmen Penim (voz e harmonio) e Maurizio Polsinelli (piano e harmonio) propoñen un percorrido polos temas do seu novo traballo discográfico, baseado no poemario ‘Nimbos’, do poeta e tradutor lucense Xosé María Díaz Castro.

Na actuación, que terá lugar mañá, venres, 27 de xuño, ás 19:30 horas, os dous artistas convidarán o público a realizar unha viaxe musical polos versos do escritor ao que a Real Academia Galega lle dedica en 2014 as Letras Galegas.

´Nimbos’, ‘Noite do mundo’, ‘Alalá do verme e a estrela’, ‘Esmeralda’, ‘No novo ceo’, ‘Penélope’ e ‘Coma un río’ son algunhas das pezas que conforman o último traballo discográfico desta formación musical, que lle rende unha homenaxe musical ao poeta e tradutor de Guitiriz.

11 de abril do 2014 Reapertura da sala de Sargadelos do Museo de Belas Artes da Coruña

Museo de Belas Artes da Coruña

O 11 de abril inaugurouse a reapertura da Sala Sargadelos do Museo de Belas Artes, coa presenza de Anxo Lorenzo, secretario xeral de Cultura da Consellaría de Cultura, Educación e Ordenación Universitaria e Ángeles Penas Truque, directora do museo.

O Museo de Belas Artes conta na área de exposición permanente cunha sala onde se exhibe a colección de louza de Sargadelos, a cal estivo pechada nos últimos tempos por motivos derivados de problemas estruturais no edificio.

Esta paréntese temporal foi aproveitada para revisar o discurso museográfico da sala, facendo segundo os casos unha reordenación ou unha nova selección de obxectos co fin de mostrar o amplo espectro de variedades tanto obxectuais como decorativas con que conta a colección do museo. Pero principalmente, dotouse á exposición dun soporte informativo necesario que facilita o seu seguimento no discorrer evolutivo da produción de Sargadelos. A información preséntase en distintos niveis e compleméntase con imaxes, gráficos ou mapas, ademais de novos soportes tecnolóxicos que se incorporarán nun breve espazo de tempo.

O percorrido na sala iníciase cunha información xeral distribuída en varios paneis, que contextualizan á Galicia socio-económica dunha época de cambio entre dous séculos (XVIII-XIX), na que Ibáñez encontra os factores idóneos para acometer o establecemento dun complexo industrial. Os paneis tamén ofrecen información da figura do fundador e do seu espírito emprendedor, capaz de marcar unha traxectoria ascendente dende unha actividade comercial e navieira ata a fabril, que desenvolverá no lugar de Sargadelos (Cervo, Lugo). Os últimos paneis esbozan a historia do complexo industrial dende a súa creación e evolución, ao longo das distintas etapas tanto administrativas coma técnicas, ata o seu peche definitivo en 1875. Por último un panel mostra como as marcas tamén sintetizan información sobre as distintas etapas da fábrica.

No interior das vitrinas continúa o discurso museográfico mostrando información en dous niveis distintos, que se corresponde respectivamente coas técnicas de decoración e dentro destas, coa diversidade de series decorativas que se foron desenvolvendo ao longo das distintas etapas de produción.

En breve engadirase ao discurso museográfico información particular sobre unha serie de pezas, á que se poderá acceder mediante unha pantalla táctil que incorporará efectos visuais en formato 3D.

Galería

  • Vista parcial da nova Sala de Sargadelos

    Vista parcial da nova Sala de Sargadelos

  • Vista parcial da nova Sala de Sargadelos

    Vista parcial da nova Sala de Sargadelos

  • Vista parcial da nova Sala de Sargadelos

    Vista parcial da nova Sala de Sargadelos

20 de febreiro do 2014 Preséntase a instalación de Xurxo Gómez Chao no Museo de Belas Artes da Coruña

Museo de Belas Artes da Coruña

Anxo Lorenzo presentou esta mañá en rolda de prensa a instalación do artista coruñés Xurxo Gómez Chao
Anxo Lorenzo presentou esta mañá en rolda de prensa a instalación do artista coruñés Xurxo Gómez Chao

A Consellería de Cultura, Educación e Ordenación Universitaria, representada polo secretario xeral de Cultura, Anxo Lorenzo, presentou esta mañá en rolda de prensa a instalación que o artista coruñés Xurxo Gómez Chao acaba de realizar no Museo de Belas Artes da Coruña. Trátase dunha monumental peza suspendida no espazo situado baixo o lucernario das salas 1, 3 e 5 do museo, que foi construída no marco do obradoiro para adultos ‘Artistas no museo’.

O secretario xeral asegurou durante a presentación que iniciativas coma esta permiten ofrecerlle ao público a oportunidade de achegarse á obra e ao sistema de traballo dun artista plástico, así como de participar dos seus procesos. Así mesmo, Anxo Lorenzo destacou que constitúen unha canle para implicar os artistas galegos na actividade habitual do museo, dando a coñecer a súa obra e facéndoos, ao mesmo tempo, partícipes da actividade cultural desenvolvida pola institución.

Construción con materiais e diversos obxectos
Influenciado por artistas como Friedrich, Turner, Monet ou Hokusai, o coruñés Xurxo Gómez recorre na súa obra a temas como a natureza, o home e o tempo, así como a exploración de territorios descoñecidos e inquietantes. Neste caso, centrou o seu traballo na elaboración dun proxecto artístico baseado na construción dunha xigantesca retícula, confeccionada a base de diversos obxectos e materiais (ramas, follas, árbores, las de cores, bonecas etc.).

Ademais, da dita instalación resultou unha interesante colección de fotografías artísticas, a través das que se despregan múltiples puntos de vista nos que a peza contemporánea interactúa coa arquitectura e as coleccións de pintura antiga do museo. Trátase, polo tanto, de dúas obras nunha, a instalación e as fotografías resultantes.

Conversa sobre o proceso creativo
Xurxo Gómez Chao e o alumnado do obradoiro –Alberte Sánchez Regueiro, Pedro Abad Vidal, Jacinto Ruíz, Alfonso Rego López e Félix Andrade Pérez– conversarán hoxe co público no Museo de Belas Artes da Coruña, ás 19:00 horas, para dar a coñecer o proceso creativo desenvolvido na formulación e creación deste proxecto.

A actividade na que se enmarca esta instalación, ‘Artistas no museo’, foi iniciada en 2012 coa colaboración de Xavier Correa Corredoira e este ano celebrará a súa terceira edición. Xunto con esta iniciativa, o Museo de Belas Artes vén desenvolvendo, desde hai máis de 10 anos, outros proxectos nunha liña similar, como son os obradoiros de gravado, nos que coñecidos nomes do mundo das artes, como son os pintores e gravadores Omar Kessel, Ane Heyvaert, Isabel Pintado ou Ali Ali, comparten a súa obra, coñecementos e experiencia co público coruñés.

20 de decembro do 2013 Cultura e Educación pon en valor a obra de Urbano Lugrís a través do Museo de Belas Artes da Coruña

Museo de Belas Artes da Coruña

A Consellería de Cultura, Educación e Ordenación Universitaria, a través do Museo de Belas Artes da Coruña, colabora na posta en valor de Urbano Lugrís coa apertura dun novo espazo especificamente deseñado para situar de xeito permanente o mural ‘Vista da Coruña 1830’ que o artista galego realizou no ano 1959 na casa madrileña dos seus familiares, os Lugrís-Muñoyerro.

A imaxe permaneceu no domicilio ata finais dos oitenta, no que foi doada polos irmáns Lugrís Alonso-Muñoyerro ao Ministerio de Cultura, que acordou o seu traslado ao Museo de Belas Artes. Esta institución museística foi a responsable da súa restauración, de xeito que o seu estado de conservación actual da peza pode cualificarse de moi bo. A obra reviste unha especial importancia ao tratarse dun dos poucos murais que se conservan en coleccións públicas e que vai a estar exposto dun xeito permanente.

‘Vista da Coruña 1830’
A obra, cunhas dimensións de cento vinte e un por douscentos vinte centímetros e realizada en temple sobre xeso, representa unha vista fabulada e en formato panorámico da cidade da Coruña, co aspecto que esta idealmente tería no ano 1830. A perspectiva urbana que se nos presenta corresponde á fachada portuaria, resaltando de forma onírica os elementos máis representativos: a Torre de Hércules ao fondo de cor rosa, a cidade vella con casas xeométricas de distintas cores, e a baía co Castelo de Santo Antón e, na súa contorna, distintas embarcacións.

29 de novembro do 2013 Inaugúrase no Museo de Belas Artes da Coruña a mostra “Confluencias 1975-2006”

Museo de Belas Artes da Coruña

O conselleiro de Cultura, Educación e Ordenación Universitaria, Xesús Vázquez Abad, inaugurou hoxe no Museo de Bellas Artes da Coruña a mostra “Confluencias 1975- 2006”, con obras de Jaime Quessada (1937- 2007) e o seu fillo Xaime Quessada Blanco (1975- 2006).

A mostra que poderá ser visitada ata o 2 de marzo esta composta por preto de corenta obras asinadas polos artistas ourensáns transmite o diálogo entre as distintas creacións pictóricas e unha reflexión sobre os seus puntos de encontro no marco produtivo.

Sobre a mostra, impulsada pola Consellería, Vázquez Abad destacou que “é un encontro emocionante, onde as formas e as cores serven tamén de soporte para unha formación intelectual que medrou, cunha solidez fóra do común, a través de dúas mentes e dúas sensibilidades conectadas na paixón pola arte. Quizais a inmensa potencia destes dous artistas, Jaime Quessada e Xaime Quesada Blanco, poida levarnos á ilusión dun resplandor orfo, no que un parte da nada e cédelle ao outro a creación demiúrxica, coma un testemuño limitado ao fío xeracional”.

Ao tempo que recordou aos autores dos que dixo que “a apertura de Jaime Quessada, a forma na que Xaime Quessada Blanco fixo renacer o pulo recibido, responden a unha atmosfera concreta, na que incardinaron a súa natureza. Os dous, pai e fillo, veñen dunha Galicia na que a arte e a paisaxe conviven en simbiose; na que a tradición depositou desde culturas moi distantes elementos valiosísimos, libres de alardes, e destinados á duración longa dos séculos”.

Así o conselleiro resaltou a importancia da obra do pai e o fillo dos que sinalou que “creo que nos atopamos ante unha experiencia vital emocionante, de transmisión de valores dun pai a un fillo, como modelo do que deita un tempo no tempo que lle sucede. Cada obra das que imos ver deseguida, e cada pincelada ou cada trazo, teñen ese pulo extraordinario, nacido da verdade, da creación como acto afirmativo que nos abraza”.

Confluencias
As 39 pinturas e debuxos que reúne “Confluencias” –aproximadamente a metade de cada un dos creadores– foron realizados a partir de finais da década dos setenta no caso de Jaime Quessada e desde mediados dos noventa, no de Xaime Quesada Blanco, describindo en conxunto un argumento creativo que ten como eixo central o universo persoal e artístico compartido por ambos. Incídese, pois, nas referencias comúns, aínda que constatando as lóxicas diferenzas estilísticas e xeracionais que, pola súa banda, servirán como referencia para entender a evolución da pintura galega nas últimas décadas do século XX.

O percorrido complétase cun documental de 21 minutos de duración realizado a partir de material audiovisual inédito sobre ambos artistas. Está editado a partir de dúas entrevistas realizadas a cada un dos artistas, entre os anos 90 e o 2000. Este vídeo esta baseado nas distintas opinións que os artistas, pai e fillo, teñen sobre a arte.

A exposición ofrecerá ao público unha nova e excelente oportunidade de se achegar á produción pictórica de Jaime Quessada como figura de referencia na arte galega do século XX, cunha relevante significación como artista e intelectual comprometido co seu tempo que transmite desde os diferentes ámbitos a través dos que desenvolve a súa obra: pintura, cartelismo, gravado, escultura, muralismo e literatura. Afondarase, ao tempo, na curta pero intensa traxectoria artística de Xaime Quesada Blanco, quen interpretou e incorporou o legado do seu pai desde unha perspectiva propia, non exenta de compromiso e carga experimental, na que destaca a súa temperán vocación e paixón polo emprego das novas tecnoloxías e as poéticas xeométricas.