Museos de Galicia

Museo Arqueolóxico Provincial de Ourense

27 de febreiro do 2017 Unhas 8.000 persoas visitaron as dúas exposicións organizadas polo Museo Arqueolóxico Provincial de Ourense na Sala de exposicións Afundación

Museo Arqueolóxico Provincial de Ourense

O domingo 19 de febreiro remataron as dúas exposicións que o Museo Arqueolóxico Provincial de Ourense organizou na Sala de exposicións Afundación en Ourense.

Baixo a coordinación de Xulio Rodríguez González, director do Museo e Avelino Rodríguez González, a exposición "A procura do pasado. Orixe e desenvolvemento da arqueoloxía en Ourense" reflicte como o Museo Arqueolóxico Provincial de Ourense e a súa historia como institución están intimamente ligados á investigación arqueolóxica desenvolvida ao longo dos anos na provincia de Ourense. Responsables desta simbiose, entre outros, foron os membros da Comisión Provincial de Monumentos de Ourense que, co seu traballo e dedicación, conseguiron crear o museo ao tempo que impulsaron a actividade arqueolóxica na provincia desde finais do século XIX ata os anos 70 do século XX. Destacan as figuras da talla de Marcelo Macías, Arturo Vázquez Nuñez, Manuel Díez Sanjurjo, Florentino López Cuevillas, Xaquín Lorenzo Fernández, Xesús Ferro Couselo, Xesús Taboada Chivite, Conde Valvis, Rubén García Álvarez, Manuel Chamoso Lamas ou Laureano Prieto, entre outros. Amósanse fotografías destes persoeiros e pezas arqueolóxicas directamente relacionadas coa súa actividade como o Guerreiro de Armeá, o Sedente de Xinzo, as xoias de Regodeigón, a Tabula de Castromao ou o Mosaico da Cigarrosa.

O conselleiro de Cultura, Educación e Ordenación Universitaria, Román Rodríguez, e o alcalde de Ourense, Jesús Vázquez Abad, foron os encargados de inaugurar esta mostra que ata o día da súa clausura foi visitada por un total de 4.549 persoas. A exposición se completaba con visitas guiadas e obradoiros; a estas actividades paralelas asistiron 996 persoas.

Esta exposición trasladouse para ser amosada no Museo das Peregrinacións e de Santiago.
 
A outra exposición, "Documento estético. Fotografía de Ourense do Marqués de Santa María del Villar", fai un percorrido por algunhas das paisaxes culturais da provincia a través da mirada de Diego Quiroga Losada, Marqués de Santa María del Villar (1880 – 1976), fotógrafo de orixinal personalidade, cunha profunda preocupación pola protección e defensa do patrimonio cultural. Foi visitada por 3.431 persoas.

Galería

  • Imaxe da exposición

  • Visita á exposición

  • Obradoiro ligado á exposición

  • Imaxe da exposición

2 de febreiro do 2015 O Museo Arqueolóxico de Ourense participa no Gothic Ivories Project

Museo Arqueolóxico Provincial de Ourense

O Museo Arqueolóxico Provincial de Ourense asinou en xaneiro de 2014 un interesante convenio de colaboración co The Courtauld Institute of Art para participar no Gothic Ivories Project.

Este proxecto, dirixido polo profesor John Lowden e pola doutora Catherine Yvard, ten por obxecto reunir e difundir os marfís góticos dispersos por todos os museos e coleccións do mundo nun catálogo electrónico que permite buscas por iconografía, procedencia, orixe, restauracións e substitucións, falsificacións modernas, e outros aspectos relevantes para o coñecemento da evoraría gótica.

Un ano despois danse a coñecer os resultados deste fantástico proxecto.A peza coa que o Museo Arqueolóxico participa é unha delicada folla de díptico de orixe francés, do século XIV, na que aparece representada a Virxe Gloriosa entre dous anxos turiferarios baixo unha arcada gótica.

Pódese consultar na web do proxecto a ficha completa así como as fotografías de detalle deste fermoso marfil.

27 de novembro do 2014 O lenzo Os Satélites exhíbese en Ourense nunha mostra sobre Parada Justel

Museo Arqueolóxico Provincial de Ourense

Os Satélites
Os Satélites

A exposición Os satélites. Parada Justel inaugurouse hoxe coa presenza do conselleiro de Cultura, Educación e Ordenación Universitaria, Xesús Vázquez Abad. Organizada polo Museo Arqueolóxico Provincial de Ourense, permanecerá aberta ao público até vindeiro 2 de febreiro no Centro Municipal José Ángel Valente, sito na antiga sede do Banco de España. Segundo Vázquez Abad, a mostra pon de relevo “o inmenso valor artístico da obra de Parada Justel, pero tamén a forma na que, pacientemente, imos construíndo novos espazos, para sentir o orgullo de pertencer a esta terra”.

O titular de Cultura e Educación asegurou que esta mostra resulta “unha xustísima homenaxe a un membro da extraordinaria Xeración Doente, dese grupo de catro xenios: Ovidio Murguía, Xaquín Vaamonde, Jenaro Carrero e, por suposto, o propio Ramón Parada Justel que, nas súas vidas, tan fugaces, racharon os moldes da plástica do seu tempo e asinaron lenzos que os sitúan nun cumio pictórico perenne, recoñecible como galego e de alcance universal”. Finalmente, Xesús Vázquez Abad felicitou ao director e o equipo do Museo Arqueolóxico de Ourense, aos profesionais que acometeron a restauración do lenzo e montaxe da mostra, e ás diversas administracións e institucións colaboradoras.

Ao acto, asistiron ademais o alcalde de Ourense, Agustín Fernández; o delegado da Xunta na provincia, Rogelio Martínez; e a xefa territorial da Consellería, Mercedes Gallego; e o comisario da exposición e director do Museo Arqueolóxico Provincial de Ourense, Xulio Rodríguez.

Os satélites, medalla Nacional de 1899
Esta exposición ten como obxectivo divulgar o lenzo Os satétites, unha das obras máis senlleiras do pintor ourensán nado en Esgos, Ramón Parada Justel (1871-1902). Trátase dun cadro de gran formato, premiado cunha medalla na Exposición Nacional de 1899, que permaneceu nunha colección particular e recentemente foi adquirido pola Xunta de Galicia, pasando a incorporarse nas coleccións do Museo Arqueolóxico ourensán.

A exposición, que se vertebra arredor do excepcional lenzo Os Satélites, complétase con outras dezasete pezas do pintor, unha escolma que pretende achegar ao público un percorrido pola súa traxectoria artística. A mostra inclúe unha serie de paneis que explican o minucioso proceso de restauración ao que foi sometida a obra, que recupera así a súa forza e beleza orixinal.

O Museo ofrecerá diariamente e en dúas quendas, ás 12 e ás 20 horas, visitas guiadas gratuítas á exposición. Nestas darase a coñecer o cadro Os satélites, explicando o seu recente proceso de restauración, e farase un percorrido pola obra pictórica de Ramón Parada Justel para divulgar a súa traxectoria artística.

14 de outubro do 2014 Inauguración da exposición "O padre Feijoo. Cidadán libre da república literaria"

Museo Arqueolóxico Provincial de Ourense

O presidente da Xunta, Alberto Núñez Feijoo, presidiu onte, 13 de outubro, a inauguración da exposición "O padre Feijoo. Cidadán libre da República literaria". A exposición, organizada polo Museo Arqueolóxico de Ourense, pódese visitar no centro social de Afundación na Praza Maior de Ourense ata o 30 de novembro.

O presidente salientou no seu discurso a figura do Padre Feijoo que foi “un cidadán libre que buscou a liberdade a través da verdade”, e un autor “involucrado co seu tempo”, e destacou tamén que foi “un galego de berce, formación e pensamento”. O presidente da Xunta concluíu destacando a vixencia do pensamento do Padre Feijoo, e asegurando que os visitantes da mostra “non atoparán un vestixio do pasado, senón algo seu e do seu tempo. Sentirán que son portadores de valores que merecen ser conservados”, indicou.

Pola súa parte, o conselleiro de Cultura, Jesús Vázquez, destacou a importancia da reivindicación da figura do Padre Feijoo. O director do Museo Arqueolóxico de Ourense, e responsable da mostra, Xulio Rodríguez, subliñou que a mostra se articula en dous grandes eixos temáticos: O Padre Feijoo e Ourense, por un lado, e o Padre Feijoo e a ilustración, por outro.

15 de xullo do 2014 O número de visitantes ao Museo Arqueolóxico de Ourense aumentou en 2013 nun 68%, respecto ao ano anterior

Museo Arqueolóxico Provincial de Ourense

O conselleiro de Cultura, Educación e Ordenación Universitaria, Xesús Vázquez Abad, afirmou hoxe no Parlamento de Galicia que “o compromiso da Xunta de Galicia co Museo Arqueolóxico de Ourense é total, como tamén o do actual Goberno Central. Así o demostran –engadiu- o amplo programa de posta en valor dos fondos que se está a levar acabo a Consellería e o feito de que por fin se veña de retomar o proxecto de rehabilitación da súa sede”. Segundo o conselleiro, todo este traballo que a Xunta vén realizando dende anos atrás tamén se reflicte na boa acollida que as novas propostas do Museo Arqueolóxico de Ourense están a ter entre os cidadáns, posto que no ano 2013 as visitas ao centro aumentaron nun 68% respecto ao ano anterior.

O conselleiro anunciou que o obxectivo da Consellería é continuar enriquecendo este museo, e por ese motivo inauguraranse dúas novas mostras sobre o ensaísta e pensador Padre Feijóo e sobre o pintor da ‘xeración doente’ Parada Justel. Tamén lembrou que o Ministerio publicou hai apenas un mes a licitación dos traballos para a elaboración do anteproxecto, proxectos básico, de execución e actividade, e demais labores para a súa rehabilitación, cun orzamento base de case 724.000 euros, o titular de Cultura e Educación recordou que “a reactivación da rehabilitación prodúcese grazas aos requerimentos realizados dende o Goberno Autonómico e ao compromiso dunha Administración Central responsable”.

Ampla programación cultural
No tocante á posta en valor dos fondos, o conselleiro salientou que o Museo Arqueolóxico de Ourense non só non deixou de ter actividade nestes anos, senón que “realiza un amplísimo labor”. Neste sentido, recordar que o Museo ofrece na sala de San Francisco unha excelente escolma de escultura provincial; presenta mensualmente unha peza arredor da que se organizan relatorios de expertos e publicacións divulgativas; programa de forma periódica exposicións temporais, tales como a organizada sobre ‘O Camiño Real de Castela’ no Museo Municipal, ou a do pasado ano sobre a propia ‘Restauración no museo’.

Ademais, esta institución participa tamén en exposicións en liña, como as promovidas no marco da Rede Dixital de Museos (‘Mulleres ante a adversidade’ e ‘Ausencias e silencios’); e organiza outras actividades puntuais (obradoiros, concertos, recreacións 3D e visitas guiadas a xacementos, mostras e á propia sede do museo, etc.). Doutra banda, Vázquez Abad non se esqueceu do crucial labor nos eidos da restauración, da recollida de materiais arqueolóxicos e da colaboración e asistencia investigadora que leva a cabo o museo.
 

2 de decembro do 2013 Xesús Vázquez salienta a importancia da Comisión de monumentos históricos e artísticos de Ourense na defensa do patrimonio

Museo Arqueolóxico Provincial de Ourense

O conselleiro de Cultura, Educación e Ordenación Universitaria, Xesús Vázquez Abad, salientou hoxe a importancia da Comisión de Monumentos Históricos e Artísticos Provincial “na difusión da historia galega e ourensá e na defensa do Patrimonio Cultural, tarefas que, como herdeiro, segue a desenvolver nos nosos días o Museo provincial, dependente da Consellería “. Fíxoo na presentación do 33 volume dos anexos do Boletín Auriense – publicado polo Museo Arqueolóxico Provincial de Ourense e o Grupo Marcelo Macías-, un acto no que participaron tamén o secretario xeral de Cultura, Anxo Lorenzo; o director do museo, Xulio Rodríguez; e o presidente do Grupo Marcelo Macías e autor da publicación, Francisco Fariña Busto.

Vázquez Abad destacou a traxectoria de máis dun século da Comisión “coa defensa da cultura e do patrimonio coma eixo central de traballo”, ademais de ser “un fito fundamental para a eclosión cultual do Ourense do primeiro terzo do século XX, o ambiente europeísta e aberto no que nace e se alimentan intelectualmente os integrantes da Xeración Nós e os seus coétaneos e sucesores”.

Posta en valor
Deste xeito explicou que a publicación hoxe presentada “vén facer xustiza a este labor”, ademais de permitir albiscar “a entrega xenerosa e desprendida dos seus integrantes e a vontade de servizo público, para lograr a conservación, coñecemento, difusión e defensa dos fondos bibliográficos e dos fondos artísticos”. Neste sentido o conselleiro sinalou o traballo dos membros daquela Comisión como un exemplo a seguir “para as administracións que hoxe en día desenvolvemos o nobre cometido de velar pola conservación do legado cultural e patrimonial para a súa transmisión ás xeracións vindeiras”; en tempos, como aqueles, de escaseza de recursos, pero mantendo “todo o esforzo e ilusión na recuperación e preservación dos elementos que conforman a memoria colectiva de Galicia”.

O conselleiro quixo agradecer ao Museo Provincial – “un dos tesouros más significativos do patrimonio ourensán”- e ao Grupo Marcelo Macías, a liña de traballo conxunta que desenvolven a través do anuario ‘Boletín Auriense’, “e destes estudos monográficos, que contribúen ao mellor coñecemento da historia de Ourense, engrosando así mesmo os fondos da biblioteca do Museo”. “A publicación que hoxe presentamos vén afianzar esta misión conxunta, compartida pola Consellería, e que agardamos teña continuidade durante moitos anos máis”, rematou.

Editado polo Museo Arqueolóxico Provincial e polo Grupo Marcelo Macías, o volume fai un repaso polos estudos realizados e actividades desenvolvidos pola Comisión de Monumentos Históricos e Artísticos Provincial desde o seu nacemento en 1844, no marco da regulación da xestión do patrimonio histórico e monumental, mobilizado coma consecuencia da Desamortización de Mendizábal. O obxectivo destas comisións provinciais era o de adoptar as medidas oportunas para salvar da súa destrución os edificios, obxectos artísticos e lembranzas históricas, tras a supresión dos conventos que os conservaban.

15 de novembro do 2013 Inauguración da mostra ‘A restauración no museo: criterios e intervencións no Museo Arqueolóxico Provincial de Ourense’

Museo Arqueolóxico Provincial de Ourense

O conselleiro de Cultura, Educación e Ordenación Universitaria, Xesús Vazquez Abad, inaugurou hoxe a exposición ‘A restauración no museo: criterios e intervencións no Museo Arqueolóxico Provincial de Ourense’. Vázquez Abad asegurou que esta mostra é “unha porta aberta á actividade museística dun ente vivo, o resultado dun traballo tecnicamente elevadísimo que permite que a mensaxe emitida nun pasado xa remoto se manteña na plenitude do seu pulo”.

Esta exposición ten como obxectivo impulsar e potenciar o coñecemento dos bens patrimoniais nas súas diferentes facianas e procesos ao que son sometidos desde a súa entrada no centro museístico. Segundo o titular de Cultura e Educación, “grazas ao traballo dos restauradores, os museos manteñense como templos da memoria, de formas de sentir e de ver, na que como unha viaxe retrospectiva lévanos ao momento no que as mans do artista deron por rematada cada unha destas achegas”.

Asemade, Vázquez Abad incidiu en que “tras as técnicas e os criterios de restauración hai profesionais extraordinariamente cualificados que se encargan de desenvolver formas cada vez máis sutís e eficaces, para conseguir deste xeito manter vivo ese alento que nos transmite a obra de arte”. Finalmente, o conselleiro felicitou ao Museo Arqueolóxico polo seu gran labor e animou a todos os galegos a coñecer o traballo deste centro.

Ao acto, asistiron ademais o xerente da Fundación Novacaixagalicia, Pedro Otero, e o director Museo Arqueolóxico Provincial de Ourense, Xulio Rodríguez. A mostra presentada hoxe poderá visitarse ata o 9 de febreiro do 2014 no Centro Social Novacaixagalicia.

O museo dende dentro
Esta mostra pretende ser algo máis do que unha exposición dos seus fondos. Os labores de conservación e restauración dalgunhas das súas pezas encontraranse por primeira vez co público galego (radiografías, analíticas, tratamentos, etc) e achegarán aos cidadáns o arduo e curioso traballo que se agocha tras as portas do Museo Arqueolóxico Provincial de Ourense.

A mostra está composta por máis de vinte esculturas de madeira policromada, un retablo e unha táboa pintada cunha crucifixión –atribuída a Ambrosius Benson-. A exposición abrangue un amplo ábano cronolóxico, no que se encontran representados os diferentes movementos artísticos, e na que figuran mestres escultores da talla de Juan de Juni ou Mateo de Prado.

Os paneis informativos permiten coñecer a metodoloxía utilizada durante os procesos de escudo e intervención, así como os resultados acadados en cada unha das pezas, explicando os criterios de conservación, as diferentes técnicas e procesos de restauración que se empregaron e, finalmente, os resultados visibles nas obras unha vez rematados o proceso. 

10 de xullo do 2013 Visitas guiadas para descubrir o conxunto arqueolóxico ourensán de Santomé

Museo Arqueolóxico Provincial de Ourense

A Consellería de Cultura, Educación e Ordenación Universitaria colabora co Grupo Marcelo Macías na difusión e posta en valor do conxunto arqueolóxico-natural de Santomé, en Ourense. A través do Museo Arqueolóxico Provincial de Ourense (MAPOU), o departamento que dirixe Xesús Vázquez Abad apoia a xestión do programa de visitas gratuítas ao xacemento, durante os meses de xullo, agosto e setembro.

O secretario xeral de Cultura, Anxo Lorenzo, visitou esta mañá o xacemento, onde tivo ocasión de comprobar o valor patrimonial e natural do conxunto de Santomé. A converxencia dos valores históricos, característicos dun complexo xacemento arqueolóxico, cos naturais derivados dunha vexetación peculiar, converten este lugar, situado a escasamente tres quilómetros da capital da provincia de Ourense, nun espazo privilexiado de grande interese cultural.

Na súa visita, o secretario xeral de Cultura estivo acompañado pola xefa territorial e o coordinador da Área Cultural da Consellería de Cultura e Educación en Ourense, Mercedes Gallego e Gerardo Pumar, respectivamente; polo director do MAPOU, Xulio Rodríguez; e mais pola concelleira de Cultura de Ourense, Ana Garrido.

Programa de visitas guiadas 

As visitas gratuítas ao conxunto arqueolóxico-natural de Santomé realízanse de xoves a domingo en horario de mañá, de 11:30 a 13,30 horas, e de tarde, de 17:30 a 21:00 horas, e comezan na caseta de información do xacemento. As visitas de grupos poden concertarse a través do Museo Arqueolóxico Provincial de Ourense, nos teléfonos chamar aos teléfonos 988 223884 e 988 230430.

O castro está asentado nun esporón rochoso sobre o río Loña que lle serve de defensa natural polo sur e o oeste e completa o dispositivo defensivo cunha muralla, foso e terraplén. As intervencións realizadas na croa permiten contemplar un entramado artellado a partir dunha rúa central, que desemboca nun espazo máis amplo a modo de praza, resultado dun proceso de ocupación e reocupación do sector castrexo.

No poboado tardorromano escaváronse dúas unidades habitacionais, que, con lixeiras variantes, reproducen o mesmo esquema funcional, organizadas a partir dun espazo central aberto, a modo de patio con reminiscencias no adro na casa romana.